პრეტენზიები ისმოდა, რომ საქართველოს მთავრობამ რაღაც ვერ გააკეთა დროულად და ამიტომ, ჩვენ გავხდით მსხვერპლი გარკვეული პროცესების, თუმცა ვიზალიბერალიზაციის შესახებ სამოქმედო გეგმა ჩვენ ”აღმოსავლეთ პარტნიორობის” წევრებს შორის შევასრულეთ ყველაზე მალე, – ამის შესახებ მიხეილ ჯანელიძემ შემაჯამებელ პრესკონფერენციაზე განაცხადა.
მისივე თქმით, საქართველომ გეგმა დაგვიანებით, მხოლოდ 2013 წლის დასაწყისში მიიღო, თუმცა ამის შემდეგ ეს გეგმა შესრულდა რეკორდულ დროში.
”მინდა გაცნობოთ, რომ საქართველომ ”აღმოსავლეთ პარტნიორობის” წევრ ქვეყნებს შორის ყველაზე მოკლე ხანში შეასრულა ის საშინაო დავალება, რომელიც საჭირო იყო ვიზალიბერალიზაციის შესახებ გადაწყვეტილების მისაღებად. ანუ, ვიზალიბერალიზაციის სამოქმედო გეგმა ჩვენ შევასრულეთ ყველაზე მალე.
სამწუხაროდ, ჩვენ გეგმა მივიღეთ ყველაზე დაგვიანებით, მხოლოდ 2013 წლის დასწყისში. სამწუხაროდ, სხვა ქვეყნებმა მიიღეს ბევრად ადრე, მათ შორის უკრაინამაც და მოლდოვამ, მაგრამ მას შემდეგ, რაც ჩვენ ეს გეგმა მივიღეთ 2013 წლის დასაწყისში, ეს შევასრულეთ რეკორდულ დროში.
ასევე ჩვენ შევასრულეთ ყველაზე ნაკლები მონიტორინგის მისიის საჭიროებით და ეს ხაზს უსვამს, რომ ჩვენ მოვახდინეთ ძალიან ეფექტურად ყველა იმ რეფორმის განხორციელება, რომელიც საქართველოს მთავრობის წინაშე იდგა”, – განაცხადა ჯანელიძემ.
მინისტრმა ვრცლად ისაუბრა ვიზალიბერალიზაციის პროცესში უკვე განხორციელებულ და დაგემილ პროცედურებზე.
”ჩვენ ველოდებით, რომ მომავალი წლის დასაწყისში, უახლოეს თვეებში ეს პროცედურული ნაწილიც დასრულდება და საქართველოს მოქალაქეები შეძლებენ მოკლევადიანი ვიზიტებით ესტუმრონ ევროკავშირის წევრ ქვეყნებს უვიზოდ. ეს არის ისტორიული შესაძლებლობა. ეს ატარებს არა მხოლოდ პრაქტიკულ, არამედ პოლიტიკურ მნიშვნელობასაც და ჩვენ ამ შესაძლებლობას აუცილებლად გავუხსნით ჩვენ მოქალაქეებს. ეს ასევე ატარებს ძალიან პრაქტიკულ და პოლიტიკურ მნიშვნელობას შერიგების და რეინტეგრაციის პროცესისთვის”, – განაცხადა ჯანელიძემ.
0