საქართველოს საგარეო საქმეთა მინისტრის პირველი მოადგილე დავით ზალკალიანი რუმინეთის ეროვნული დღისადმი მიძღვნილ საზეიმო ღონისძიებას დაესწრო, რომელიც საქართვლოში რუმინეთის საელჩოს ორგანიზებით გაიმართა.
დავით ზალკალიანმა მოწვეულ სტუმრებს სიტყვით მიმართა და რუმინელ ხალხს ეროვნული დღესასწაული მიულოცა.
საკუთარ გამოსვლაში მინისტრის პირველმა მოადგილემ ისაუბრა საქართველოსა და რუმინეთს შორის არსებულ მრავალსაუკუნოვან, ისტორიულ კავშირებზე. მან ყურადღება გაამახვილა ანთიმოზ ივერიელის როლზე ორი ქვეყნის ისტორიაში.
„მოხარული ვარ აღვნიშნო, რომ ჩვენს შორის არსებული თანამშრომლობა, რომელიც დაფუძნებულია ურთიერთპატივისცემის, თანადგომის და ისტორიული მეგობრობის პრინციპებზე და ღირებულებებზე, პერმანენტულად მყარდება. რუმინეთი საქართველოს ევროპული და ევროატლანტიკური ინტეგრაციის ერთ-ერთ ყველაზე აქტიური მხარდამჭერია,“- აღნიშნა დავით ზალკალიანმა.
მინისტრის პირველმა მოადგილემ მადლობა გადაუხადა რუმინეთს ევროკავშირის სადამკვირვებლო მისიის (EUMM) ფარგლებში გაწეული ყველაზე დიდი კონტრიბუციისათვის. ასევე, მან რუმინეთის მხარეს მიულოცა, საელჩოს მიერ 2013-2016 წლებში ნატო-ს საკონტაქტო საელჩოს ფუნქციის წარმატებით შესრულება.
„რუმინეთი და საქართველო გეოგრაფიულად არიან დაკავშირებული, შავი ზღვა კი არ გვყოფს, არამედ გვაერთიანებს. ამ კონტექსტში, ჩვენი სურვილია მაქსიმალურად ავითვისოთ თანამშრომლობის პოტენციალი, განსაკუთრებით ისეთ სფეროებში, როგორიცაა ტრანსპორტი და ენერგეტიკა, ვინაიდან ჩვენ წარმოვადგენთ ბუნებრივ ხიდს ევროპასა და აზიას შორის,“ – აღნიშნა მინისტრის პირველმა მოადგილემ.
რუმინეთის ეროვნული დღისადმი მიძღვნილ საზეიმო მიღებას საკანონმდებლო და აღმასრულებელი ხელისუფლების წევრები, ქვეყანაში აკრედიტებული დიპლომატიური კორპუსის წარმომადგენლები და სხვა მოწვეული სტუმრები დაესწრნენ.
0