ვერ მომინელებია წარწერა ”ნაციონალური მოძრაობის” წევრების ნიკა მელიას და ელენე ხოშტარიას ბანერზე, სადაც მოსახლეობას ეკონომიკური დანაშაულებების დეკრიმინალიზაციას ჰპირდებიან, – ამის შესახებ ბიძინა ივანიშვილმა რუსთავში მედიასთან შეხვედრაზე განაცხადა. ივანიშვილმა რამდენიმე დღის წინ, ”რუსთავი 2”-ის მიერ მისთვის დასმულ კითხვაზე ისაუბრა, სადაც მას ჰკითხეს, ის უფრო დიდი პატრიოტია თუ მიხეილ სააკაშვილი და განაცხადა, რომ ამ სიყვარულში გაჯიბრება სწორი არ არის.
”სიყვარულით ტრაბახი არ არის ჩემთვის მისაღები. სამშობლო უნდა გიყვარდეს და თუ არ გიყვარს, ესაა პრობლემა. რომ არ უყვართ, ამის მაგალითი გვაქვს უამრავი. ვერ მომინელებია წარწერა ”ნაციონალური მოძრაობის” წევრების ნიკა მელიას და ელენე ხოშტარიას ბანერზე, სადაც მოსახლეობა ჰპირდებიან პენსიებს, სამუშაო ადგილებს და ეკონომიკური დანაშაულებების დეკრიმინალიზაციას. როგორ წარმოგიდგენიათ ეს, როდესაც ყველაზე არაკორუმპირებული ქვეყანა ვართ. მათ დროს კი ყველაფერი კრიმინალური იყო და ესენი დღეს გვპირდებიან დეკრიმინალიზაციას, რამხელა ცინიზმია ამაში ჩადებული.
ნიკა მელიაზე არ მაქვს დიდი ინტელექტუალური წარმოდგენა, რამდენად ახერხებს შეფასებას, მაგრამ ელენე ხოშტარიასთან კამათიც მქონია და საკმაოდ კარგად შეუძლია ანალიზი და შეფასება. მშვენივრად იცის ხოშტარიამ, რა იყო, როგორი კრიმინალური იყო ეკონომიკა და დღეს რომ მსგავსი არაა. ეკონომიკურ დეკრიმინალიზაციას რომ პირდება, ეს ქვეყანა უყვარს მას თუ არა, ამაზე მაქვს კითხვის ნიშანი. თუმცა, რომ გავყვეთ ახლა და მის გუნდს შევხედოთ, ის შეიძლება მამა აბრამის ბატკანივით დარჩეს. ”რუსთავი 2” არის ”ნაციონალური მოძრაობის” სახე და სარკე და როდესაც პატრიოტიზმზე სვამს კითხვას, ერთადერთი მიზანი აქვს, როგორმე ივანიშვილი და სააკაშვილი დააყენოს პარალელში. რომელ პატრიოტიზმზე ვსაუბრობთ, როდესაც ეს ტელევიზია თაღლითურ მეთოდებს იყენებს, როგორ მოატყუონ მოსახლეობა”, -განაცხადა ივანიშვილმა და აღნიშნა, რომ ”რუსთავი 2”-ის აგიტაციის მსხვერპლი გახდა მოსახლეობის ნაწილი.
0