მერია სქოლიოზისა და ბრტყელტერფიანობის დიაგნოსტიკას აფინანსებს

თბილისის მერიის „ორთოპედიულ დაავადებათა სკრინინგისა და აღდგენითი თერაპიის“ ახალი ქვეპროგრამის ფარგლებში, სქოლიოზისა და ბრტყელტერფიანობის დიაგნოსტიკა 18 ათასამდე ბავშვს და მოზარდს ჩაუტარდა და მათგან 13 100-ს დაავადება დაუდგინდა.
ჯანდაცვისა და სოციალური მომსახურების საქალაქო სამსახურის უფროსი გელა ჩივიაშვილი ქვეპროგრამის მიმდინარეობის გაცნობის მიზნით, 130-ე სკოლას და აღდგენითი თერაპიის ცენტრ „ბაზის“ ეწვია, სადაც სკრინინგის და აღდგენითი თერაპიის პროცესს უშუალოდ დაესწრო.
გელა ჩივიაშვილის განცხადებით, თბილისის მერიის 2016 წლის ქვეპროგრამა ითვალისწინებს თბილისის მუნიციპალიტეტში რეგისტრირებულ 4-დან 15 წლის ასაკის ჩათვლით, ბავშვებსა და მოზარდებში სქოლიოზისა და ბრტყელტერფიანობის დიაგნოსტიკას.

„თბილისის მერია გამოკვლევას წელიწადში ერთხელ სრულად აფინანსებს. დიაგნოსტიკის ფარგლებში გამოვლენილი დაავადებების აღდგენითი თერაპია კი, პაციენტებს, რომლებსაც „სოციალურად დაუცველი ოჯახების მონაცემთა ერთიან ბაზაში“ 70 001-მდე სარეიტინგო ქულა აქვთ, მომსახურება წელიწადში ერთხელ უფინანსდებათ სრულად, ხოლო ყველა სხვა პირს, ვინც საყოველთაო ჯანდაცვის სახელმწიფო პროგრამის მოსარგებლეა – 70%-ის მოცულობით“ – განაცხადა გელა ჩივიაშვილმა.
აღდგენითი თერაპია მოიცავს – სამკურნალო ვარჯიშს, სამკურნალო მასაჟს, ფიზიოთერაპიას და საჭიროების შემთხვევაში რენტგენოგრაფიას.
აღდგენითი თერაპიის ცენტრის „ბაზის“ ერთ-ერთი დამფუძნებლის, პროფესორ გოგი ჩახუნაშვილის განცხადებით, სკრინინგის მიზანია ძვლოვანი სისტემის დეფორმაციისა და ჯანმრთელობის მდგომარეობის შემდგომი გართულებების თავიდან აცილება. „თუ სქოლიოზის პრევენცია არ ჩატარდა როგორც წესი და რიგია, შედეგები იქნება სავალალო“, – განაცხადა გოგი ჩახუნაშვილმა.