მინდა აღვნიშნო, რომ გამჭვირვალობის შესახებ კანონპროექტი ითვალისწინებს ერთადერთ რამეს – „ენჯეოების” და შესაბამისი მედიასაშუალებების მიერ წელიწადში ერთხელ ფინანსური დეკლარაციების წარდგენას

პრემიერ-მინისტრმა ირაკლი კობახიძემ პრესკონფერენცია გამართა.
“მინდა, გამოვეხმაურო როგორც „უცხოური გავლენის გამჭვირვალობის შესახებ” კანონპროექტის მეორე მოსმენით განხილვას, ისე – გუშინ განვითარებულ მოვლენებს. კიდევ ერთხელ მინდა აღვნიშნო, რომ გამჭვირვალობის შესახებ კანონპროექტი ითვალისწინებს ერთადერთ რამეს – „ენჯეოების” და შესაბამისი მედიასაშუალებების მიერ წელიწადში ერთხელ ფინანსური დეკლარაციების წარდგენას. ეს კანონპროექტი უმნიშვნელოვანეს წვლილს შეიტანს საქართველოს სახელმწიფო სუვერენიტეტის განმტკიცებაში. გარდა ამისა, ეს კანონპროექტი უმნიშვნელოვანეს წვლილს შეიტანს პოლიტიკური უმცირესობის იმგვარი ძალადობრივი ქმედებების პრევენციაში, როგორიც გუშინ ვიხილეთ.
2020 წლიდან, „ენჯეოების” აქტიური მონაწილეობით, ვიხილეთ რევოლუციის ორი წარუმატებელი მცდელობა. შეგახსენებთ, 2020 წელს „ენჯეოებმა” გააყალბეს პარალელური ხმის დათვლის შედეგები, გააყალბეს მონაცემები ოქმებში ზედმეტობების შესახებ, გააყალბეს ინფორმაცია ცესკოს მიერ არჩევნების შედეგების თითქოსდა დაგვიანებით გამოქვეყნების შესახებ. „ენჯეოების” ეს სიყალბე სრულად უცხოური წყაროებიდან იყო დაფინანსებული. სწორედ ამ გაყალბებამ მოუმზადა რადიკალურ ოპოზიციას ნიადაგი პარლამენტის საბოტაჟისა და რიგგარეშე საპარლამენტო არჩევნების მოთხოვნისთვის. არჩევნების ლეგიტიმაციის არაღიარების კამპანიას, ასევე უცხოური დაფინანსებით, აწარმოებდნენ „ნაცმოძრაობის” კუთვნილი კონკრეტული მედიასაშუალებები. საბოლოოდ, 2020 წლის ოქტომბერში დაწყებული რევოლუციის მცდელობა მხოლოდ 2021 წლის ოქტომბერში დასრულდა, როდესაც საზოგადოებამ „ქართულ ოცნებას” ნდობა თვითმმართველობის არჩევნებშიც დაუდასტურა. რევოლუციის მეორე მცდელობა უკრაინაში ომის დაწყებასთან ერთად დაიწყო. როგორც გახსოვთ, 2022 წლის აპრილში ბაკურიანში შეიკრიბნენ რადიკალური პარტიების, „ენჯეოებისა” და მედიასაშუალებების წარმომადგენლები, რომლებმაც ძალადობრივი რევოლუციების ცნობილ ექსპერტთან, პიტერ აკერმანთან ერთად, დაგეგმეს რევოლუციური სცენარი, რომელიც ივნისში საქართველოსთვის კანდიდატის სტატუსის არმინიჭების შემდეგ უნდა ამოქმედებულიყო. ეს სცენარი ივნისში მართლაც ამოქმედდა, როდესაც საქართველოს სრულიად უსამართლოდ არ მიენიჭა კანდიდატის სტატუსი. 2022 წლის ივნისში „ენჯეოებმა” ნიღაბი ჩამოიხსნეს, პოლიტიკურ სცენაზე ავიდნენ და მთავრობის გადადგომა და მათი მონაწილეობით ე.წ. ტექნიკური მთავრობის ჩამოყალიბება მოითხოვეს. რევოლუციური მცდელობები მხოლოდ მას შემდეგ დასრულდა, რაც 2023 წლის დეკემბერში საქართველომ კანდიდატის სტატუსი მიიღო. მთლიანობაში, რადიკალურმა პარტიებმა, „ენჯეოებმა” და მედიასაშუალებებმა 3 წელი არ დაასვენეს ეს ქვეყანა. ამ ყველაფრის მიუხედავად, საქართველოს ნომინალური ეკონომიკა დოლარში 2021-2023 წლებში გაორმაგდა. თუმცა, რომ არა რევოლუციური მცდელობები, საქართველოს ეკონომიკა დამატებით 5 მილიარდი დოლარით მაინც გაიზრდებოდა, რაც ნიშნავს, რომ სახელმწიფო ბიუჯეტში ყოველწლიურად მილიარდი დოლარით მეტი მაინც შევიდოდა, ეს ყველაფერი კი არსებული სახელმწიფო პროგრამებისა და პროექტების მნიშვნელოვნად გაფართოების საშუალებას მოგვცემდა. შესაბამისად, „ენჯეოების” გაუმჭვირვალობა საქართველოს სახელმწიფოს არა მხოლოდ პოლიტიკურ პრობლემებს უქმნის, არამედ მისი ეკონომიკის განვითარებისა და ბიუჯეტის გაზრდისთვისაც მნიშვნელოვან დაბრკოლებას წარმოადგენს. აღარაფერს ვამბობ იმაზე, რომ „ენჯეოებისა” და შესაბამისი მედიასაშუალებების გაუმჭვირვალობა გამოიყენება მათ მიერ იმგვარი საქმიანობის განსახორციელებლად, რომლებიც ქართული სახელმწიფოს და საზოგადოების ინტერესებს პრინციპულად ეწინააღმდეგება. ესაა – ნარკოტიკების პროპაგანდა, ლგბტ-პროპაგანდა, მართლმადიდებელ ეკლესიაზე პერმანენტული შეტევა, რელიგიური სარჩულით პოლიტიკური ინტერვენცია, სახელმწიფო ინსტიტუტების შერყევის მცდელობა, სტრატეგიული ეკონომიკური პროექტების განხორციელებისთვის დაბრკოლებების შექმნა. უმჯობესია, რადიკალური ოპოზიციის რამდენიმე ძალადობრივი აქცია ვიხილოთ ახლა, ვიდრე საქართველო რადიკალიზმისა და ე.წ. პოლარიზაციის ჩაკეტილ წრეში დავტოვოთ. ამის არდაშვება არის ჩვენი, როგორც ხელისუფლების, პასუხისმგებლობა ამომრჩევლის წინაშე, რომელმაც ქვეყნის მართვის მანდატი მოგვანიჭა. გარდა ამისა, როგორც უკვე აღინიშნა, ამ დღეებში რადიკალური პოლიტიკური უმცირესობა ანიავებს იმ ძალადობრივ რესურსს, რომელიც ოქტომბრის ბოლოსთვის უნდა შემოენახა, რაც საარჩევნოდ მომზადებული რევოლუციური სცენარის პრევენციას ეფექტურად უზრუნველყოფს. გამჭვირვალობა არის ერთ-ერთი უმთავრესი ევროპული ღირებულება. ვერავინ დაამტკიცებს იმას, რომ „ენჯეოების” მიერ წელიწადში ერთხელ დეკლარაციის გამოქვეყნება ევროპულ პრინციპებს ეწინააღმდეგება. ამის მიუხედავად, კვლავაც ვრცელდება კონკრეტული უცხოელი პოლიტიკოსებისა და ჩინოსნების ცილისმწამებლური ნეგატიური განცხადებები გამჭვირვალობის შესახებ კანონპროექტთან დაკავშირებით. კიდევ ერთხელ მოვუწოდებ საქართველოში მოქმედ ელჩებს, რომლებიც შესაბამის ქვეყნებს წარმოადგენენ: თუ რაიმე არგუმენტი აქვთ, დავსხდეთ საზოგადოების წინაშე და გავმართოთ საჯარო დისკუსია კანონპროექტთან დაკავშირებით. ჩვენ მზად ვიყავით და ახლაც ნებისმიერ დროს მზად ვართ, გავითვალისწინოთ პარტნიორების არგუმენტირებული რეკომენდაციები. ის ფაქტი, რომ შესაბამისი ქვეყნები, ერთი მხრივ, საქართველოს შიდაპოლიტიკურ დებატებში პირდაპირ ერევიან, ხოლო, მეორე მხრივ, მათი ოფიციალური წარმომადგენლები დღემდე უარს ამბობენ საჯარო დისკუსიაზე, ადასტურებს, რომ მათ, სინამდვილეში, კანონპროექტის წინააღმდეგ არავითარი არგუმენტი არ აქვთ. არგუმენტები მით უმეტეს ვერ იარსებებს, რომ ამგვარი კანონები მათთანაც მოქმედებს და თუ არ მოქმედებს, აქტიურად განიხილება. თუმცა, მაინც გვეუბნებიან, რომ კანონის მიღება არ უნდა გავბედოთ. ასეთ პირობებში, მათი მხრიდან ცილისმწამებლური განცხადებების კვლავაც გავრცელება და მშრალი შანტაჟის ენით საუბარი უკიდურესად არაევროპული და არადასავლურია. ყველა ცილისმწამებლური განცხადების ავტორი იზიარებს პასუხისმგებლობას იმ ძალადობაზე, რომელიც გუშინ რადიკალური პოლიტიკური უმცირესობის შესრულებით ვიხილეთ. კოლექტიური „ნაცმოძრაობის” ძალადობრივ ქმედებებზე პასუხისმგებლობას, ასევე, სრულად იზიარებენ აქციების ორგანიზატორი და წარმმართველი რადიკალური პარტიები, „ენჯეოები” და მათი წარმომადგენლები. ყველას ვაფრთხილებთ, საკუთარი მორალური და სამართლებრივი პასუხისმგებლობა სათანადოდ გაიაზრონ. პასუხისმგებლობა ეკისრება ყველა იმ სუბიექტს, რომელიც მთელი ერთი წლის მანძილზე ძალადობისა და მოძალადეების რომანტიზებას ახდენდა და კოლექტიური „ნაცმოძრაობის” ძალადობრივი ახალგაზრდული დაჯგუფებების წევრებს გულწრფელ ახალგაზრდებს უწოდებდა. საუბარი იყო მოძალადე ახალგაზრდებზე, რომლებიც კეზერაშვილის, ხაზარაძის და კონკრეტული უცხოელი დონორების მიერ ფინანსდებიან. ესენია: „ნაცმოძრაობის”, „ლელოს” და „ახალის” ახალგაზრდული ორგანიზაციები, რომლებიც 100-მდე მოძალადე ახალგაზრდას აერთიანებს. აგრეთვე, ესენია ძალადობრივი დაჯგუფებები: „ტალღა”, „ჯიუტები”, „ნაბიჯი”, „თბილისი პრაიდი”, „ჯენზი”, „წერტილი”, „დაფიონი”, „სტუდენტები ევროპული მომავლისთვის”, „მოძრაობა თავისუფლებისთვის”, „სირცხვილია”, „ფრანკლინის კლუბი” და „მომავლის აკადემია”, რომლებიც კოლექტიური „ნაცმოძრაობის” ერთგულ 200-მდე მოძალადე ახალგაზრდას აერთიანებს. მოვუწოდებ ყველა მოქალაქეს, გაემიჯნოს ამ დაჯგუფებების ძალადობრივ ქმედებებს, რომლებიც მთლიანად ვიწროპარტიული და ანტისახელმწიფოებრივი მოტივებით არის ნაკარნახევი. საინტერესოა, რომ გასული წლების განმავლობაში ამ ძალადობრივ დაჯგუფებებში მილიონობით დოლარი ჩაიდო, თუმცა, მათ, საბოლოოდ, მხოლოდ 300-მდე მოძალადე ახალგაზრდის რეკრუტირება შეძლეს. დარწმუნებული ვარ, ეს რესურსიც ოქტომბრამდე დიდწილად განიავდება. რაც შეეხება გუშინდელ ძალადობრივ აქციას, რომელიც სრულად აკერმანის სახელმძღვანელოს მიხედვით დაიგეგმა და წარიმართა: მიტინგის ძალადობრივი და კანონსაწინააღმდეგო ხასიათი გამოიხატა როგორც საქართველოს პარლამენტის შენობის პიკეტირებით, ისე სამართალდამცავების მიმართ ფიზიკური ძალადობითა და შეურაცხყოფით, პოლიციელებისთვის სხვადასხვა საგნის – მათ შორის შუშის ბოთლებისა და ქვების სროლით. პოლიტიკური უმცირესობის, კოლექტიური „ნაცმოძრაობის” ძალადობრივი ქმედებების გამო, გუშინ აუცილებელი გახდა 6 პოლიციელის ჰოსპიტალში გადაყვანა, მათ შორის ერთ-ერთს აღენიშნებოდა თვალბუდის ფსკერის მოტეხილობა და დასჭირდა გადაუდებელი ოპერაცია. ასევე, გუშინდელი ძალადობრივი აქციის შემდეგ, სხვადასხვა ნაკლებად მძიმე დაზიანებით კლინიკებში გადაყვანილ იქნა 4 მომიტინგე, რომლებიც მალევე გაეწერნენ კლინიკებიდან. რა თქმა უნდა, არ იყო სასიამოვნო ლევან ხაბეიშვილის დაზიანებების ხილვა. ასევე, შეკრების დაშლის დროს დაფიქსირდა რამდენიმე სამწუხარო ინციდენტი. სამწუხაროა, რომ ძალადობა შობს ძალადობას. თითოეული ადამიანის ფიზიკურ დაზიანებაზე პასუხისმგებლობა ეკისრება ყველა იმ სუბიექტს და ადამიანს, რომელიც მთელი ამ დროის განმავლობაში ახალისებდა და იწონებდა ძალადობას, აქეზებდა ძალადობას პოლიციელების წინააღმდეგ, იწონებდა ელისაშვილის მიპარვით ძალადობას, ძალადობდა სიტყვიერად ხელისუფლების წარმომადგენლებზე, როდესაც მათ სხვადასხვა უკიდურესად შეურაცხმყოფელი ფორმით მოიხსენიებდნენ. ზოგადად, რადიკალური ოპოზიციის, მდიდარი „ენჯეოების” და მათი მედიასაშუალებების ერთადერთი იარაღი არის ძალადობა. ამით გამოირჩეოდა კოლექტიური „ნაცმოძრაობა” ხელისუფლებაში ყოფნის პერიოდში და ამით გამოირჩევა ის ახლაც. ძალადობისთვის კანონის წინაშე ყველა უმკაცრესად აგებს პასუხს. ის ფაქტიც, რომ გამჭვირვალობის შესახებ კანონზე მათ არაფერი აქვთ სათქმელი, მაგრამ ამ კანონს მაინც უხეშ იარლიყებს აწებებენ, მათი ძალადობრივი ბუნების კიდევ ერთი გამოვლინებაა. მინდა, მადლობა გადავუხადო შინაგან საქმეთა სამინისტროს, პოლიციელებს, რომლებმაც მასშტაბური ძალადობისა და შეურაცხყოფის მიუხედავად, შეძლებისდაგვარად ეფექტიანად მოახერხეს ძალადობის აღკვეთა და საზოგადოებრივი უსაფრთხოების დაცვა.
რა თქმა უნდა, დღესაც ველით, რომ რადიკალური პოლიტიკური უმცირესობის აქცია მიიღებს ძალადობრივ და კანონსაწინააღმდეგო ხასიათს. ეს ყველაფერი გამოხატული იქნება, პირველ რიგში, სახელმწიფო შენობების პიკეტირების მცდელობით, პოლიციელებზე ძალადობით და მათი შეურაცხყოფით. საქართველო არის დემოკრატიული სახელმწიფო და აქ უფლება მშვიდობიან შეკრებასა და გამოხატვაზე განუხრელად არის დაცული. ამასთან, მოვუწოდებ ყველას, თავი შეიკავონ ძალადობრივი და კანონსაწინააღმდეგო ქმედებებისგან. ყველა მოძალადე და სამართალდამრღვევი კანონის წინაშე უმკაცრესად აგებს პასუხს. მოვუწოდებ სამართალდამცავებს, გამოავლინონ მაქსიმალური მოთმინება. მესმის, რომ მარტივი არ არის ძალადობისა და შეურაცხყოფის რეაგირების გარეშე დატოვება. თუმცა, ვთხოვ ყველას, მაქსიმალური მოთმინებით დაუპირისპირდნენ მომიტინგეების ნებისმიერ ძალადობრივ თუ კანონსაწინააღმდეგო ქმედებას. სამართალდამცავების მხრიდან ნებისმიერი გადამეტებული ძალის გამოყენება რადიკალური ოპოზიციის მიერ გამოყენებული იქნება საკუთარი ძალადობრივი ქმედებების გადასაფარად. ძალიან მალე დასრულდება გამჭვირვალობის შესახებ კანონის მიღება, რითაც შეიქმნება მყარი საფუძველი საქართველოში გრძელვადიანი მშვიდობისა და სიმშვიდის უზრუნველყოფისათვის. ამ ქვეყნის საბოლოოდ დამშვიდება არის აუცილებელი პირობა საქართველოს დემოკრატიული სისტემის განმტკიცებისთვის, ეკონომიკის შეუქცევადი განვითარებისა და შესაბამისად, საქართველოს ევროკავშირში ინტეგრაციისათვის”.

ტელეკომპანია „იმედი”, მანჩი გაბელია: “თქვენ შეეხეთ ორივე საკითხს, თუმცა დავაზუსტებ, 15 მარტიდან ჩვენ თვალს ვადევნებთ, ერთი მხრივ, პროცესს საკანონმდებლო ორგანოში, მეორე მხრივ, მის გარეთ – აქციებს. ორივე პროცესი არის პროგრესირებადი და ჯერჯერობით ამ ტალღას ემოციური რეგრესის ნიშნები არ აქვს. თქვენ, როგორც მთავრობის მეთაური, როგორ ხედავთ ვითარების განმუხტვის შესაძლებლობას? ასევე ჩვენ გუშინ ვიხილეთ, რომ აგრესიული დამოკიდებულება და გზავნილები არის, მათ შორის, შინაგან საქმეთა სამინისტროს მისამართით, იყო განცხადებები დევნაზე. ორივე შემთხვევაში თუ არსებობს გეგმა და როგორია თქვენეული ხედვა ვითარების განმუხტვასთან დაკავშირებით”?

ირაკლი კობახიძე: “რეალურად მარტივად არის საქმე. კონკრეტული ძალებისთვის პოლარიზაცია, რადიკალიზმი არის საკუთარი ინტერესების რეალიზების მთავარი ინსტრუმენტი და ამ კუთხით ენჯეოების გაუმჭვირვალობა მათთვის ასრულებს ძალიან მნიშვნელოვან როლს. სწორედ ენჯეოების გაუმჭვირვალობა აძლევს მათ საშუალებას, რომ საქართველო დატოვონ ე.წ. პოლარიზაციის, იგივე რადიკალიზმის, ჩაკეტილ წრეში. სწორედ იმიტომ ეწინააღმდეგებიან შესაბამისი ძალები გამჭვირვალობის შესახებ კანონის მიღებას, რომ მათ სურთ, ქვეყანა მუდმივად ამყოფონ რადიკალიზმის და ე.წ. პოლარიზაციის რეჟიმში. გახსოვთ, რა ხდებოდა 2020 წლის ბოლოს, 2021 და 2022, შემდეგ 2023 წელს. 3 წლის განმავლობაში ქვეყანა იყო მუდმივი რევოლუციური სცენარების განხორციელების მცდელობის პირობებში და ეს აწყობთ კონკრეტულ ძალებს, მაგრამ ეს არ აწყობს ქართულ სახელმწიფოს და, რა თქმა უნდა, ქართულ საზოგადოებას. შესაბამისად, იმისთვის, რომ ჩვენ გრძელვადიან პერსპექტივაში დავამშვიდოთ ეს ქვეყანა, აუცილებელია ამ კანონის მიღება. იქნება, რა თქმა უნდა, აქციები დღეს, მესამე მოსმენის, ვეტოს გადალახვის დროს, თუმცა ჩვენ თუ გავიტანთ ყველაფერს და, რა თქმა უნდა, გავიტანთ ამ კანონს, ამ შემთხვევაში იქნება რამდენიმედღიანი დისკომფორტი, თუმცა გრძელვადიან პერსპექტივაში წლობით დავაზღვევთ ამ ქვეყანას პოლარიზაციისა და რადიკალიზმისგან. ეს არის ძალიან პრინციპული ეროვნული ამოცანა. თუ ჩვენ არ გავარღვევთ ამ ე.წ. პოლარიზაციის და რადიკალიზმის ჩაკეტილ წრეს, ძალიან გაგვიჭირდება, გავხდეთ ევროკავშირის წევრი ქვეყანა. ჩვენ გვჭირდება სწორედ ამ ე.წ. პოლარიზაციის დაძლევა და ვითარების დამშვიდება იმისათვის, რომ უზრუნველყოფილი იყოს ქვეყანაში გრძელვადიანი მშვიდობა, სიმშვიდე და საქართველოს ევროკავშირში ინტეგრაცია”.

„ტვ პირველი”, რუსუდან დუმბაძე: “საუბარი დაიწყეთ წინადადებით, ერთადერთ რამეს ითვალისწინებს ეს კანონი, რომ დეკლარაცია შეივსოს არასამთავრობო ორგანიზაციების მიერ წელიწადში ერთხელ, მაგრამ შემდეგ ამ განცხადების დიდი ნაწილი დაუთმეთ არასამთავრობო ორგანიზაციების მიზანს რევოლუციის შესახებ. მინდა, რომ ამიხსნათ, რაღაცნაირად ვერ ვეწევი ლოგიკას, რომელიც თქვენ აღმოგაჩნდათ მარტო, როგორც ჩანს. დამაწიეთ, თუ შეიძლება – რევოლუციის პრევენციაა თქვენი მოტივაცია თუ წელიწადში ერთხელ არასამთავრობო ორგანიზაციამ დეკლარაცია შეავსოს, თუ დეკლარაციის შევსებით რევოლუციის პრევენციაა? დეკლარაციას თუ შეავსებს, რევოლუციურ მიზანს მიზნობრიობაში წარმოგიდგენიათ, რომ ვინმე ჩაწერს?”

ირაკლი კობახიძე: “დაგეხმარებით, რომ დამეწიოთ. რაც შეეხება გამჭვირვალობის კავშირს რევოლუციის პრევენციასთან, აქ სინამდვილეში ძალიან მარტივად არის საქმე. მაგალითად, რომ ავიღოთ იგივე პარტიების კანონმდებლობა – პოლიტიკური პარტიები ვალდებული არიან, წარადგინონ დეკლარაციები ანტიკორუფციული სამსახურის წინაშე არა მარტო ყოველწლიურად, არამედ უფრო ხშირად, უფრო მაღალი სტანდარტი მოქმედებს გამჭვირვალობის პოლიტიკური პარტიებისთვის, ვიდრე გათვალისწინებულია ამ ახალი კანონით. პარტიების გამჭვირვალობის მიზანი არის ის, რომ არასწორი გავლენების ქვეშ არ მოექცნენ პოლიტიკური პარტიები და, შესაბამისად, არასწორი გავლენების ქვეშ არ მოექცეს პოლიტიკური სისტემა. ეს არის აპრობირებული მეთოდი მთელ მსოფლიოში. თითქმის ყველგან პოლიტიკური პარტიების საქმიანობა, მათი ფინანსები არის გამჭვირვალე სწორედ იმისათვის, რომ არასწორი გავლენების ქვეშ არ მოექცეს ქვეყანა, იმისათვის, რომ დაცული იყოს სახელმწიფო სუვერენიტეტი. აქაც ზუსტად იმავესთან გვაქვს საქმე, თუ იქნება გამჭვირვალე ენჯეოების საქმიანობა, ამ შემთხვევაში კონკრეტულ დონორებს გაუჭირდებათ ისეთი ორგანიზაციების დაფინანსება პოლარიზაციის მიზნით, როგორებიცაა „სირცხვილია”, „დროა” და ა.შ. მაგალითად, კონკრეტული ორგანიზაცია, რომელიც პირდაპირ ექვემდებარება ევროკავშირს – EED აფინანსებდა ამ ქვეყანაში პოლარიზაციას, კერძოდ, აფინანსებდა რეალურად პოლიტიკურ პარტია „დროას”, რომელიც არის ერთ-ერთი ყველაზე მაპოლარიზებელი პოლიტიკური სუბიექტი ამ ქვეყანაში, თან აფინანსებდა არა რაღაც პროექტებისთვის, არამედ პირდაპირ პარტიის აქტივისტების ხელფასებს და ოფისების ხარჯებს იხდიდა, რაც არის კონსტიტუციის უხეში დარღვევა, ზოგადად კონსტიტუციური პრინციპების უხეში დარღვევა და, რაც არის მთავარი, ჩვენთვის პოლარიზაციის პირდაპირი დაფინანსება, ამას აკეთებდა ევროკავშირი. ჩვენთვის გაუგებარია, რატომ შეიძლება, ევროკავშირის ფონდი იხდიდეს ფულს პოლარიზაციაში, როცა იმავდროულად ევროკავშირი გთხოვს დეპოლარიზაციას. ასეთი მაგალითი არის არაერთი; არის „სირცხვილიას” მაგალითი. იყო შემთხვევები, როდესაც არჩევნების არალეგიტიმურად წარმოჩენის კამპანიას პირდაპირ აფინანსებდა კონკრეტული უცხოური ფონდი, ორგანიზაცია”.

„ტვ პირველი”, რუსუდან დუმბაძე: “ეს მაგალითები მოგვისმენია, თქვენ საუბრობთ, რომ არასწორი გავლენებისგან უნდა იყოს თავისუფალი, როგორც არის პოლიტიკური პარტიები – თუ მათი დაფინანსების წყაროები მოგწონთ, თქვენთვის სწორია, მაშინ როგორ ამბობთ, რომ ეს პარტიები რევოლუციას აწყობენ, ან მათი მიზანი რევოლუციაა? თუ პოლიტიკურ პარტიებს კანონმდებლობით აზღვევთ, რომ არასწორი გავლენები, არასწორი ფინანსები ამ პარტიებში არ მივიდეს, მაშინ მოგწონთ ის წყაროები, თქვენთვის სწორია, თუ სწორი გზებით იღებენ ისინი დაფინანსებას, რევოლუციას როგორ აწყობენ?”

ირაკლი კობახიძე: “არასწორი მიმართულებით მიდიხართ. როდესაც რაღაც არ არის გამჭვირვალე, იქ არის რისკები, პარტიების შემთხვევაში საზოგადოებისთვის გამჭვირვალეა პარტიების დაფინანსება და აქედან გამომდინარე, საზოგადოებას შეუძლია, ჩაიხედოს ვინ აფინანსებს ამა თუ იმ პარტიას და, შესაბამისად , რა გავლენას ექვემდებარება შესაბამისი სუბიექტი ამ ქვეყანაში. აქაც ენჯეოების გამჭვირვალობის მთავარი მიზანი არის ის, რომ საზოგადოება იყოს ინფორმირებული ამ ყველაფერთან დაკავშირებით. ჩვენ ხომ არ ვამბობთ, რომ EED-ს ავუკრძალოთ, მაგალითად, „დროას” ან „სირცხვილიას” დაფინანსება, ამას კანონი არ ამბობს. ის ამბობს ერთადერთ რამეს, საზოგადოებისთვის უნდა იყოს გამჭვირვალე ეს ყველაფერი და საზოგადოება რომ დაინახავს, რომ ცუდი რაღაცები ფინანსდება ამ ქვეყანაში, მაგალითად, აღნიშნული კონკრეტული ფონდიდან, ამ შემთხვევაში EED-ს, მას აღარ ექნება მოტივაცია, რომ ეს ცუდი რაღაც დააფინანსოს. ეს არის გამჭვირვალობის მთავარი მიზანი, ამოცანა, რაც არის უბრალოდ კლასიკა, ხომ? ამას ემსახურება ეს კანონი. მგონი, ცოტათი მაინც დამეწიეთ”.

„ტვ პირველი”, რუსუდან დუმბაძე:” შარშან, როცა ეს კანონი გაიწვიეთ, შარშანაც მოგწონდათ ეს კანონპროექტი, წელსაც მოგწონთ და არგუმენტები არც შარშან და არც წელს თქვენთვის არ არსებობს. მე და თქვენ რამდენიმე დღის წინ საუბარი გვქონდა არგუმენტებთან დაკავშირებით, დღეს ვფიქრობ, რა შედეგი აქვს თქვენთან არგუმენტებზე საუბარს. არცერთი არგუმენტის მოსმენა არ გინდათ და საერთოდ არ ასხივებთ მოტივაციას, ბატონო ირაკლი, რომ რომელიმე არგუმენტი შეგიძლიათ, გაიაზროთ და გააცნობიეროთ”.

ირაკლი კობახიძე: “მითხარით ერთი არგუმენტი”.

„ტვ პირველი”, რუსუდან დუმბაძე: “ერთი არგუმენტი არის ჩემთვის გუშინ ქუჩაში გამოსული ადამიანები. შარშან თქვენთვის ეს არგუმენტი იყო, როდესაც თქვენ ეს კანონპროექტი უკან გაიწვიეთ, თქვენ თქვით, რომ პრევენციას ახდენთ ქვეყანაში ვითარების ესკალაციის, მე ზუსტად მახსოვს, რომ თქვენ ამბობდით ამას, ანუ ესკალაციის ასარიდებლად ჩვენ ამ კანონპროექტს უკან გავიწვევთ და პასუხისმგებლობას ვიღებთ. ესკალაცია არ არის, რაც გარეთ ხდება? წეღან რომ საუბრობდით ვითარების დამშვიდებაზე, როგორ წარმოგიდგენიათ, ეს არ არის ესკალაცი”ა?

ირაკლი კობახიძე: “თქვენ ახლა აღიარეთ, რომ არგუმენტი არ გაქვთ”.

„ტვ პირველი”, რუსუდან დუმბაძე: “კიდევ ვინ უნდა თქვას ან რა უნდა დაემუქროს ქვეყანას, სენატორებისგან წერილი მიიღეთ; რა უნდა დაემუქროს ყველას ერთად, რომ გაიწვიოთ უკან თქვენი კანონი, რომლის გარეშეც 12 წელი გაუმჭვირვალე პროცესს იტანდით, თურმე რევოლუციის პრევენციას ამდენი ხანი ვერ ახდენდით”.

ირაკლი კობახიძე: “ვერ ვახდენდით და ამიტომ იყო რევოლუციის 2 მცდელობა 2020-დან 2023 ჩათვლით, ვერ ვახდენდით იმიტომ, რომ არ იყო გამჭვირვალობის კანონი. მარტივ კითხვას გისვამთ, მითხარით ერთი არგუმენტი, რის გამოც შეიძლება კანონი არ მოგწონდეთ”.

„ტვ პირველი” რუსუდან დუმბაძე: “თქვენ უტევთ დასავლეთს, როცა ქვეყნის ინტეგრაცია არის მთავარი მიზანი, ეს თქვენ ჩაწერეთ კონსტიტუციაში. ორი განცხადებაა, ერთი ევროპელი მაღალჩინოსნების და ერთი თქვენი. თქვენ შარშან პოლიტიკური პასუხისმგებლობა აიღეთ, რომ კანონს უკან გაიწვევდით და წელს პირობა დაარღვიეთ და მაინც დააბრუნეთ და გადაწყვეტილება ვინც უნდა მიიღოს, ის ამბობს, რომ ამით ვერ მოხდება ჩვენი ევროინტეგრაცია. ვის დავუჯეროთ”?

ირაკლი კობახიძე: “10 წუთია გთხოვთ ერთი არგუმენტის თქმას და თქვენი არგუმენტი არის – აბა, წაიკითხეთ 14 სენატორის წერილი და აბა, ნახეთ, რას ამბობს ქუჩაში ვიღაცო”.

„ტვ პირველი”, რუსუდან დუმბაძე: “არასამთავრობო ორგანიზაციები არ დაირქმევენ უცხო ქვეყნის გამტარებლის იარლიყს, ბატონო ირაკლი. თქვენ ამბობთ, რომ ეს კარგი ტერმინია”.

ირაკლი კობახიძე: “რაც შეეხება იმას, აყენებს თუ არა ეს კანონი ერთ სიბრტყეზე მტერს და მოყვარეს. ეს არის იმხელა სამარცხვინო, მარტივი სპეკულაცია, რომ ასეთი მეორე ვერ წარმომიდგენია, გეტყვით რატომ – მაგალითად, არსებობს კანონი პოლიტიკური პარტიების შესახებ, ამ კანონის მიხედვით, პარტიის დაფინანსება არის აკრძალული ნებისმიერი ქვეყნიდან, იქნება ეს რუსეთი, ამერიკა, ევროპა, აფრიკა თუ ავსტრალია, ანუ ნებისმიერი ქვეყნიდან და კონტინენტიდან არის აკრძალული პარტიის დაფინანსება. ზუსტად იგივე სპეკულაციური მიმართულებით თქვენ შეგიძლიათ დაამტკიცოთ, რომ პარტიების კანონი მთელი ამ წლების განმავლობაში ერთ სიბრტყეზე აყენებდა მტერს და მოყვარეს. ეს ხომ უმარტივესი, სამარცხვინო სპეკულაციაა. პირველი არგუმენტი ხომ გაგიბათილეთ. არის პარტიების შესახებ კანონი, რომელიც ერთ სიბრტყეზე აყენებს ყველა ქვეყანას, შესაბამისად, ეს, რაზეც მიდიოდა საუბარი, მთელი ამ ხნის განმავლობაში, რომ თითქოს ეს ნიშნავს ევროკავშირის ან ამერიკის მტრად გამოცხადებას, არის ცარიელი სიყალბე იმიტომ, რომ უკვე მოქმედებს საქართველოში წლებია პარტიების შესახებ კანონი, რომელიც ამბობს, რომ, მაგალითად, ამერიკას, ევროპას, ეკრძალება საქართველოში პარტიების დაფინანსება. არათუ გამჭვირვალობაზეა საუბარი, საერთოდ ეკრძალებათ პარტიების დაფინანსება. ეს ნიშნავს იმას, რომ ამერიკა არის მტრად გამოცხადებული პოლიტიკური პარტიების შესახებ კანონით?! რომელიც, თუ არ ვცდები, 1997 წელს არის მიღებული და იქიდან მოქმედებს, არავის შეუცვლია”.

„ტვ პირველი”, რუსუდან დუმბაძე: “თქვენ საუბრობთ ენჯეოებზე, რომელთაც აქვთ ქვეყანაში რევოლუციის მიზანი, ეს არასამთავრობოები ფინანსდებიან დასავლეთიდან, ანუ თქვენ დასავლეთიდან ხედავთ რევოლუციის, დესტაბილიზაციის საფრთხეს. ასე ხედავთ თანაბრად საფრთხეებს რუსეთიდან და დასავლეთიდან. შეიძლება, თანაბრადაც ვერ ხედავთ”.

ირაკლი კობახიძე:” ესეც სპეკულაციაა. რაც შეეხება საფრთხეებს, საიდანაც მეტი საფრთხე მოდის, იქ კიდევ უფრო მეტად ვმუშაობთ და ამის შედეგი არის ის, რომ თუ, მაგალითად, საუბარი გაქვთ ქვეყანაზე, რომელსაც ოკუპირებული აქვს ქვეყნის ტერიტორიების 20%, თუ პრორუსული პარტიები და საარჩევნო სუბიექტები 2013-2014 წლებში ამ ქვეყანაში იღებდნენ ხმების 20%-ზე მეტს, ახლა იღებენ 2-3 %-ს. ხედავთ რაშია საქმე, მაგრამ ეს არ ნიშნავს იმას, რომ სხვა მიმართულებებით არ უნდა ვიზრუნოთ სახელმწიფოს სუვერენიტეტის დაცვაზე. როცა გიფინანსებენ ღიად, უხეშად, ამ ქვეყანაში მაპოლარიზებელ ორგანიზაციებს, იქ რატომ არ უნდა დავიცვათ სახელმწიფო სუვერენიტეტი, იქ არ არის დასაცავი? ამიტომ არის, რომ ნებისმიერი კანონი, რა თქმა უნდა, ყველა ქვეყანას ერთ სიბრტყეზე უნდა აყენებდეს. სუვერენიტეტი უნდა იყოს დაცული, იმიტომ ჰქვია ამ ქვეყანას დამოუკიდებელი სახელმწიფო, რომ მან საკუთარი ინტერესები უნდა დაიცვას ყველა მიმართულებით. ყველა კითხვაზე გიპასუხეთ, ვერც მეუბნებით ვერაფერს. ვერცერთი არგუმენტი ვერ დამისახელეთ ამ კანონის წინააღმდეგ”.

„ტვ პირველი”, რუსუდან დუმბაძე: “თქვენ ამბობთ, რომ ამ კანონით ევროინტეგრაცია მოხდება ისევ ისე, როგორც შარშან სტატუსი მივიღეთ. ეს არის ღირსებით ევროპისკენ? – სპეცრაზმით, წყლის ჭავლით, ახალგაზრდების დარბევით. არაპროპორციული ძალა რატომ გამოიყენეთ ბატონო ირაკლი გუშინ? სახალხო დამცველმა თქვა და მას ვერ დააბრალებთ გლობალური ომის პარტიის წევრობა”.

ირაკლი კობახიძე:” არა, ეს არ მითქვამს, დაჩქარდება ევროინტეგრაცია იმიტომ, რომ ჩვენ თუ თავიდან ავიცილებთ რევოლუციური პროცესების თუნდაც გონებაში გავლებას, ეს, რა თქმა უნდა, მხოლოდ და მხოლოდ დააჩქარებს. ქრონოლოგიურად გავარჩიოთ, რა მოხდა გუშინ, მიიღო თუ არა შეკრებამ კანონსაწინააღმდეგო ხასიათი. ზუსტად არის კანონმდებლობით გაწერილი, სხვათა შორის საერთაშორისო სტანდარტების შესაბამისად, როდის იღებს შეკრება კანონსაწინააღმდეგო ხასიათს. ერთ-ერთი მთავარი საფუძველი არის პიკეტირება და აქ საუბარია უმთავრესი კონსტიტუციური ორგანოს შენობის პიკეტირებაზე – პირველი მყარი არგუმენტი. კანონსაწინააღმდეგო ხასიათი თავიდანვე მიიღო შეკრებამ, როდესაც პიკეტირებისთვის ჭიშკართან გადაინაცვლეს მომიტინგეებმა. ეს არის საერთაშორისო სტანდარტი და ქართული კანონი, ეს პირველი. მეორე – ძალადობა, შეურაცხყოფა სამართალდამცავების წინააღმდეგ, ესეც იყო აშკარად სახეზე, არაერთი, უამრავი ფაქტი. იყო ინციდენტები, იყო სამწუხარო ფაქტები, მაგრამ მთლიანობაში რომ ევროპულად მოქმედებდა სამართალდამცავი სტრუქტურა, ამაზე მეტყველებს ერთი მარტივი რამ, ასეთი რამ არ ხდება ხოლმე, ევროპაში ამას ვერ ნახავთ, 6 პოლიციელია დაშავებული და 5 მომიტინგე. როგორც წესი არის 1/10-ზე თანაფარდობა, როდესაც ასეთი მასშტაბის ძალადობრივი მიტინგები იმართება ხოლმე ევროპის ქვეყნებში. რაც შეეხება ჰოსპიტალიზაციას, 6 პოლიციელს დასჭირდა კლინიკაში გადაყვანა, ასევე – 5 მომიტინგეს”.

„ტვ პირველი”, რუსუდან დუმბაძე:”ბატონო ირაკლი, პიკეტირებაზე როდესაც საუბრობთ და დეპუტატები რომ გამოსულიყვნენ პარლამენტიდან, მაშინ დაიწყო დარბევა, ეს აქციის მონაწილეები რომ ქვემოთ უკვე ჩამოვიდნენ რუსთაველის გამზირზე და იქ დაიწყო წყლის ჭავლი, ეს არის პროპორციული ძალა? სახალხო დამცველმა ასე ზუსტად წუთებით შეისწავლა”.

ირაკლი კობახიძე: “პიკეტირება იყო პირველი კანონსაწინააღმდეგო ქმედება, შესაბამისად, შინაგან საქმეთა სამინისტროს ჰქონდა სრული უფლება, რომ ის ტერიტორია გაეწმინდა და ტერიტორიის გაწმენდის დროს, რა თქმა უნდა, იყო იქ ძალის გამოყენება, რაც იყო აბსოლუტურად პროპორციული. ამის შემდეგ დაიკავა კონკრეტული პოზიციები შინაგან საქმეთა სამინისტრომ ჭიშკრის ქვემოთ და ასეთი გეგმა იყო, რაზეც მე პირადად მქონდა საუბარი შინაგან საქმეთა მინისტრთან. ღამის 23:00 საათისთვის ვესაუბრე შინაგან საქმეთა მინისტრს და ასეთი გეგმა გვქონდა, იკლებდა უკვე იქ შეკრებილი ადამიანების რაოდენობა, უკვე სერიოზული გადინება იყო და ჩვენი გეგმის მიხედვით 00:00 საათზე მთლიანად უნდა გასულიყო ეზოში სპეცრაზმის ძალები. როდესაც დაინახეს მომიტინგეებმა, რომ მათი რაოდენობა სერიოზულად იკლებდა, არ უნდოდათ ამის ასე დატოვება და დაახლოებით 23:20 საათზე დაიწყო უხეში ძალადობა პოლიციელების წინააღმდეგ. ეს გამოიხატებოდა საგნების სროლით, რის შედეგადაც მიადგათ უმეტესად პოლიციელებს დაზიანებები. ეს გამოიხატებოდა ძალიან უხეში შეურაცხყოფით, გინებაზე აღარ მაქვს საუბარი. დაკავებულია გულწრფელი ახალგაზრდა, რომელიც პირდაპირ მივიდა და ერთ-ერთ პოლიციელს სახეში შეაფურთხა. ასეთი რაღაცები ხდებოდა, უმძიმესი პროვოკაციები. დაახლოებით 23:20 საათზე შეკრების ამ ნაწილმა მიიღო უხეშად ძალადობრივი ხასიათი მაშინ, როდესაც, შეთანხმებული ვიყავით შინაგან საქმეთა მინისტრთან ერთად, რომ 00:00 საათზე უნდა დაეტოვებინა სპეცრაზმს მთლიანად პერიმეტრი და გადასულიყო ეზოში. აბსოლუტურად მშვიდობიანად დასრულდებოდა ეს ყველაფერი. მომიტინგეები რამდენჯერმე დაუბრუნდნენ იმ ადგილს იმისათვის, რომ კიდევ ერთხელ წარემართათ საკუთარი აგრესიული ქმედებები. ეს არის ფაქტების კონსტატაცია.
დარწმუნებული ვართ, დღესაც აუცილებლად გადავლენ ძალადობაზე მომიტინგეები, ამისთვის მობილიზებული ჰყავთ 300-კაციანი საგანგებო ძალადობრივი ჯგუფი. ეს არის იმ ე.წ. ახალგაზრდული ორგანიზაციების ჯგუფები, რომლებსაც არსებითად აფინანსებენ კეზერაშვილი, ხაზარაძე და კონკრეტული წყაროებიდან დაფინანსებული სხვა დაჯგუფებები, რაც კანონის მიღების შემდეგ გამჭვირვალე გახდება. ეს 300-კაციანი დაჯგუფებების ერთობლიობა დღესაც გადავა ძალადობაზე. წარმოვიდგინოთ იგივე სცენარი, რომ არის სპეცრაზმი, რომელსაც დაუშენენ ქვებს, შუშის ბოთლებს, გადავლენ პირდაპირ ხელჩართულ დაპირისპირებაზე, რა უნდა გააკეთოს ამ დროს სპეცრაზმმა?! კანონთან დაკავშირებით ვერცერთი არგუმენტი ვერ მოიტანეთ და, რაც შეეხება სპეცრაზმის მოქმედებებს, ვერცერთ საკითხთან დაკავშირებით არგუმენტი ვერ თქვით. რაც შეეხება გადაცდომებს, იყო რამდენიმე ძალიან სამწუხარო ინციდენტი, როდესაც მაგალითად გაუსწორდნენ კონკრეტულ მომიტინგეებს. ძალიან რთულია მოთმენა პოლიციელებისთვის. როდესაც მოდის კონკრეტული მომიტინგე და სახეში გაფურთხებს, ყველა ვერ უძლებს ამას, უმეტესობამ გაუძლო, 100-იდან 1-მა ვერ გაუძლო და ამიტომ იყო რამდენიმე სამწუხარო ინციდენტი. რაც შეეხება ხაბეიშვილის შემთხვევას, რა თქმა უნდა, დაზიანებები არის ძალიან მძიმე, მას სჭირდება, ბუნებრივია, შესწავლა და ეს არის ყველაზე სამწუხარო ინციდენტი მთელი გუშინდელი დღის განმავლობაში. იყო ცალკეული ინციდენტები, მაგრამ რაც შეეხება შეკრების ძალადობრივ ხასიათს, კანონის მიხედვით და კანონის მიღმაც ვერავითარ შემთხვევაში ვერ დადგება ეჭვქვეშ და ის, რომ იძულებული იყო სპეცრაზმი, გამოეყენებინა შესაბამისი ზომები, ესეც ვერავითარი ფორმით ვერ დადგება ეჭვქვეშ. როდესაც დღეს ქვებს, შუშის ბოთლებს დაუშენენ სპეცრაზმს, იმავე ზომების გამოყენება დასჭირდებათ, წყლის ჭავლი, აირი და ნებისმიერი სხვა ზომა, რაც არის გათვალისწინებული პროპორციულობის პრინციპით”.

„ტვ პირველი”, რუსუდან დუმბაძე: “რიტორიკული კითხვა მაქვს, რაც ეს კანონი დააბრუნეთ, მას მერე გამიჩნდა და ბარემ ვისარგებლებ ბატონო ირაკლი, ძალაუფლების დასათმობად მზადება დაიწყეთ, თუ ჯერ არა და თუ იცით, ბიძინა ივანიშვილი რას ფიქრობს”?

ირაკლი კობახიძე: “რა გვეტყობა ამის?! ძალაუფლება საერთოდ არ არის მნიშვნელოვანი ფაქტორი, მნიშვნელოვანი ფაქტორი არის ის, რომ აგენტურა არ შეიძლება დაბრუნდეს ხელისუფლებაში, ქვეყანა უნდა მართოს ხალხის მიერ არჩეულმა ხელისუფლებამ და არა თავს მოხვეულმა აგენტურამ, შესაბამისად, უნდა გაკეთდეს ყველაფერი იმისათვის, რომ აგენტურას არათუ პრაქტიკული, თეორიული შანსიც არ დარჩეს ამ ქვეყანაში და ეს კანონიც ამას ემსახურება. ჩვენ არჩევნებზე არაფერი გვემუქრება. 61,5 პროცენტი იყო ბოლო კვლევის თანახმად ჩვენი რეიტინგი, ანუ არჩევნების მოგება შეგვიძლია თავისუფლად, მაგრამ ეს კი არ არის მთავარი – ჩვენ მოვიგეთ 2020 წელსაც არჩევნები და ვართ იმის შემდეგ ხელისუფლებაში, მაგრამ ამ სამი წლის განმავლობაში იყო რევოლუციის ორი მცდელობა. ეს რომ არ ყოფილიყო, ჩვენი ეკონომიკა დღეს მინიმუმ 5 მილიარდი დოლარით მეტი იქნებოდა, მარტივად შეიძლება ამ ყველაფრის დათვლა. 5 მილიარდი დოლარით მეტი როცა არის შენი ეკონომიკა, ასეთ დროს შეგიძლია, მილიარდი დოლარით მეტი დაამობილიზო სახელმწიფო ბიუჯეტში, მილიარდი დოლარით მეტი ნიშნავს იმას, რომ რა პროექტებიც კეთდება, იმაზე ბევრად მეტი შეგიძლია გააკეთო, შეგიძლია სოციალურ პროგრამას მოახმარო და ა.შ. ეს ყველაფერი საბოლოო ჯამში, გამუდმებული მცდელობა ვითარების არევის, რევოლუციის და ა.შ., ჩვენ ვერ გვარყევს. ხომ ხედავთ, ზედიზედ რვა არჩევნები მოვიგეთ და მეცხრე არჩევნებსაც მოვიგებთ, მაგრამ ქვეყანას არ ასვენებენ, მის ეკონომიკას არ ასვენებენ, ამიტომ გვჭირდება სტაბილური სამომავლო განვითარებისთვის მყარი საფუძვლების შექმნა და ამას ემსახურება გამჭვირვალობის კანონი”.

„რუსთავი 2″, სალომე უერთაშვილი: ” თუ ვითარება უფრო მეტად გამწვავდა, პროტესტმაც მასშტაბური ხასიათი მიიღო და გაგრძელდა ეს ყველაფერი, უნდა ველოდოთ თუ არა, რომ ხელისუფლებამ სიტუაციის დამშვიდების მიზნით მესამე მოსმენა გადადოს? თქვენ არაერთხელ გითქვამთ, რომ ეს არჩევნები იქნებოდა ერთგვარი რეფერენდუმი და გამარჯვების შემთხვევაში, თუკი იყო ასე, შესაძლებელია თუ არა, რომ მესამე მოსმენა სწორედ ამის შემდეგ განხორციელდეს”?

ირაკლი კობახიძე: “ჩვენ გვექნება ორ კვირაში მესამე მოსმენა, აქედან დაახლოებით ერთ თვეში, 4 კვირაში, იქნება ვეტოს დაძლევა, ჩვენ ზოგჯერ მიგვითითებენ ხოლმე ვენეციის კომისიაზე, რომ იქნებ დაიცადოთ და ა.შ. ეს ვენეციის კომისიის დასკვნა მანამდე ჩამოდის, ვიდრე მოხდება ვეტოს დაძლევა. გახსოვთ შარშან, რას ვამბობდით ჩვენ – საოცრებაა, რასაც ახლა გავიხსენებ. პირველი მოსმენით მივიღეთ კანონი, შემდეგ ვთქვით ასეთი რამ – ვაგზავნიდით ვენეციის კომისიაში და ვენეციის კომისიიდან დასკვნის მიღებამდე საერთოდ აღარ გავაგრძელებდით კანონის განხილვას, ეს პირობა იყო დადებული. ამის მიუხედავად, პირდაპირ გამოვიდნენ, უხეშად, აქაური აგენტურა და მათი მეგობრები და პირდაპირ გვითხრეს, ვენეციის კომისიაში გაგზავნაც კი არ გაბედოთო. წარმოიდგინეთ, რასთან გვაქვს საქმე. ასეთ რაღაცებს რომ ვიხსენებთ, გვრჩება აღქმა, რომ ვიღაცებს უნდათ, ეს ქვეყანა არასოდეს დაასვენონ. 2023 წელს ცდილობდნენ ვიღაცები ქვეყნის რყევას; იმას, რომ არ დაესვენებინათ, მოეწყოთ რევოლუცია და აქ არ მაქვს საუბარი ევროკავშირზე. ევროკავშირი, სამწუხაროდ, იმ მომენტში მოექცა სერიოზული ზეწოლის ქვეშ. უკრაინაში ომის დაწყების შემდეგ უფრო გამარტივდა მასზე ზეწოლა სხვადასხვა მიზეზის გამო და მოხდა ისე, რომ 2022 წელს ჩვენ უსამართლოდ, ყოველგვარი ახსნის გარეშე, რა ახსნა შეიძლება მოუძებნო, თუ რატომ არ მოგვცეს 2022 წლის ივნისში კანდიდატის სტატუსი? რამე ახსნა აქვს ამას? ხომ არავითარი ახსნა არ აქვს. მოლდოვას აძლევ, დსთ-ს წევრს, უკრაინას აძლევ, საქართველოს არ აძლევ. კორუფციის კუთხით იცით რა ხდება უკრაინაშიც და მოლდოვაშიც. კორუფციაში იხრჩობა ორივე ქვეყანა, პირდაპირ რომ ვთქვათ. ინსტიტუტების სისუსტე, სასამართლო პრობლემები და ა.შ. იმ ორ ქვეყანას აძლევ სტატუსს, საქართველოს – არა. ამას ხომ არავითარი ახსნა არ აქვს. მაშინ ევროკავშირი მოექცა სერიოზული ზეწოლის ქვეშ და აბსოლუტურად უსამართლოდ არ მოგვენიჭა კანდიდატის სტატუსი, რაც გამოყენებულ იქნა რევოლუციის მცდელობისთვის. საბოლოოდ ჩვენ მოვახერხეთ, შეგვენარჩუნებინა მშვიდობა, თავიდან აგვეცილებინა დესტაბილიზაცია და ბოლოს მივიღეთ კანდიდატის სტატუსიც. თუ იქნები პრინციპული შენს გადაწყვეტილებებში, ამ შემთხვევაში იგივე შედეგს მიიღებ – შეინარჩუნებ მშვიდობას, სტაბილურობას და წახვალ კიდევ უფრო წინ ევროინტეგრაციის მიმართულებით. მაშინ ჩვენ პრინციპულად რომ არ გვებრძოლა და ბოლომდე არ გაგვეტანა ყველაფერი, დღეს არ გვექნებოდა არც მშვიდობა, არც სტაბილურობა და უკან მოგვრჩებოდა საერთოდ ევროკავშირი, როგორც ეს უკრაინის შემთხვევაში ხდება, აქედან გამომდინარე, მთავარია ეროვნული ღირსების და პრინციპების ბოლომდე დაცვა. ამას თუ გავაკეთებთ, შედეგებს მივიღებთ ყველა მიმართულებით, ამ კანონსაც მივიღებთ და ევროკავშირის წევრიც გავხდებით ყველაზე ადრე”.

„რუსთავი 2″, სალომე უერთაშვილი: “მესამე მოსმენის გადადება არ მოხდება”?

ირაკლი კობახიძე: “მესამე მოსმენა ჩატარდება ორ კვირაში. აქედან ოთხ კვირაში იქნება ვეტოს დაძლევა, სტანდარტულად ასეა. აქედან გამომდინარე, თუ ვინმეს აინტერესებს ვენეციის კომისიის რეკომენდაციების ნახვა, ამის საშუალება ექნება ვეტოს დაძლევამდე და ვნახოთ, რა ეწერება იქ. გამომდინარე იქიდან, რომ ეს არის უმარტივესი კანონი, არის სულ რამდენიმე გვერდი და წერია ერთადერთი რამ, რომ წელიწადში ერთხელ უნდა გამოქვეყნდეს დეკლარაციები, როგორ შეიძლება, ამაზე ვინმეს ჰქონდეს რაიმე სამართლებრივი კონტრარგუმენტი. როგორ შეიძლება, ვინმემ თქვას, რომ ხალხს არ უნდა ჰქონდეს ინფორმაცია NGO-ების დაფინანსების შესახებ. როგორ შეიძლება, ევროკავშირმა ან ვენეციის კომისიამ თქვას, რომ გამჭვირვალობის მინიმალური სტანდარტი ცუდია. უბრალოდ, ბუნებაში ვერ იარსებებს ეს არგუმენტი. დაელოდონ ვენეციის კომისიის დასკვნას და დაელოდონ სამართლებრივ არგუმენტებს ვენეციის კომისიის დასკვნაში. თუ ნახავენ სამართლებრივ არგუმენტს ვენეციის კომისიის დასკვნაში, ერთად ვნახოთ ეს ყველაფერი”.

„რუსთავი 2″, სალომე უერთაშვილი: ” ელოდებით თუ არა ვითარების უფრო მეტ ესკალაციას იმ ფონზე, როდესაც ყოველ საღამოს ჩვენ ვხედავთ მომიტინგეებს, ახალგაზრდებს და სამართალდამცველებს ერთმანეთის პირისპირ და მოწოდებაც მოვისმინეთ სამართალდამცველების მისამართით”?

ირაკლი კობახიძე: “რადიკალურ დაჯგუფებებს, ოპოზიციას, კოლექტიურ „ნაცმოძრაობას” სხვა შანსი არ აქვს, რომ დღეს არ სცადონ კიდევ ერთხელ ესკალაცია, რადიკალიზაცია, თუმცა წარმატების არავითარი რესურსი არ აქვთ. ასეთი აქციები იმართება უამრავ ევროპულ ქვეყანაში. შედარებაც შეუძლებელია იმასთან, რაც გუშინ ხდებოდა. როგორ შეიძლება ეს ყველაფერი, როცა პოლიტიკური უმცირესობა ატარებს აქციას, თუნდაც ძალადობრივს, როგორ შეიძლება, ეს გახდეს პოლიტიკური უმრავლესობის მიერ გადაწყვეტილების შეცვლის მიზეზი. შარშან სხვა ვითარება იყო. შარშან ჩვენი მხარდამჭერების მნიშვნელოვანი ნაწილიც შფოთავდა ამ კანონთან დაკავშირებით. არ იყო დარწმუნებული, რომ ეს კანონი იყო კარგი. შარშან იყო ეს ვითარება, მაგრამ რაც შეეხება წლევანდელ მოცემულობას, წელს საზოგადოების უდიდესი ნაწილი მხარს უჭერს გამჭვირვალობის შესახებ კანონს. აქედან გამომდინარე, წელს უმრავლესობის ნების წინააღმდეგ ვერ დავყვებით უმცირესობის ნებას, მით უმეტეს, როდესაც ეს უმცირესობა არის გამორჩეული ძალიან მძიმე წარსულითა და აწმყოთი”.

რადიო „თავისუფლება”, გელა ბოჩიკაშვილი: “თქვენც ისაუბრეთ, რომ სამართალდამცავების მხრიდან იყო გარკვეული შემთხვევები, როდესაც ჩანდა კადრებში ძალადობის შემთხვევები. თქვენი ინფორმაციით, თუ თანამშრომლობს შინაგან საქმეთა სამინისტრო სპეციალურ საგამოძიებო სამსახურთან, რომ დადგინდეს, ვინ იყვნენ ის კონკრეტული სამართალდამცავები, რომლებიც ძალადობდნენ. ალბათ ნანახი გექნებათ თქვენ სახეში ჩარტყმის შემთხვევაც, თუმცა აღსანიშნავია, რომ ამ სამართალდამცავების ნაწილს მხოლოდ თვალები უჩანდათ და თუ გქონდათ კომუნიკაცია შინაგან საქმეთა სამინისტროსთან ამ მხრივ, როგორ შეიძლება დადგინდეს, ეს კონკრეტული სამართალდამცავები ვინ იყვნენ”.

ირაკლი კობახიძე: “რაც შეეხება თანამშრომლობას, რა თქმა უნდა, აბსოლუტურად ღია ვართ და იქნება კოორდინაცია სტრუქტურებს შორის იმისათვის, რომ შესწავლილ იქნას თითოეული საკითხი. ცალსახაა, ბუნებრივია ამასთან დაკავშირებით პოზიცია”.

რადიო „თავისუფლება”, გელა ბოჩიკაშვილი: “არის თუ არა რაიმე შემთხვევა, როდესაც მმართველი პარტია განიხილავს გასული წლის მსგავს სცენარს, როდესაც კანონპროექტს უკან წაიღებს”?

ირაკლი კობახიძე: “არა, რა თქმა უნდა, ეს კანონი არის იმდენად მნიშვნელოვანი სახელმწიფოს სუვერენიტეტის განმტკიცებისთვის, რომ დაუშვებელია აქ კომპრომისი. პოლარიზაცია ძალიან მძიმე ფორმით გამოხატული 2004-2012 წლებშიც, მანამდეც იყო პოლარიზაცია, მაგრამ მაშინ ამის მიზეზი იყო ის, რომ წინა ხელისუფლება, „ნაციონალური მოძრაობა” პირდაპირ პატიმრებს აწამებდნენ, 15 000-ით მეტი პატიმარი ჰყავდათ ციხეში. აბსოლუტურად უდანაშაულო ადამიანები ჰყავდათ ციხეში გამომწყვდეული, ტოტალური ბიზნესის რეკეტი და ა.შ. ეს განაპირობებდა საბოლოო ჯამში პოლარიზაციას. მედიის მიტაცება – პირდაპირ შეიჭრნენ ტელეკომპანია „იმედში” , მანამდე „რუსთავი 2″, საზოგადოებრივი მაუწყებელი მიიტაცეს და ა.შ., არჩევნებს აყალბებდნენ. ეს, რა თქმა უნდა, ქმნიდა პოლარიზებულ გარემოს. ამის შემდეგ ეს დანაშაულებრივი პოლიტიკური ძალა დარჩა ოპოზიციაში. ამან განაპირობა, რა თქმა უნდა, იმთავითვე პოლარიზაციის მაღალი ხარისხი და ეს არის შენარჩუნებული. განსაკუთრებით გამწვავდა ეს ე.წ. პოლარიზაცია, ანუ სინამდვილეში რადიკალიზაცია 2020-2021-2022-2023 წლებში. საზოგადოება უკვე დაღლილია იმ ყველაფრით, რაც ხდება – ყოველ წელს ცდილობენ რევოლუციის მოწყობას, გამოდიან და ლაპარაკობენ, რომ არაფერს იმსახურებს ეს ქვეყანა, მათ შორის, არც ევროინტეგრაციას და ა.შ. საზოგადოება ხომ დაიღალა ამ ყველაფრით. რა თქმა უნდა, ყველა პრობლემას ერთი კანონი ვერ მოაგვარებს, მაგრამ ეს კანონი არის ერთი მნიშვნელოვანი ნაბიჯი იმისათვის, რომ ჩვენ პოლარიზაციის, იგივე რადიკალიზმის ჩაკეტილი წრე გავარღვიოთ. ეს ხომ ჩვენი ეროვნული ამოცანაა, ეს ხომ თქვენც გინდათ, როგორც საქართველოს მოქალაქეს. ხომ არ ვიქნებით მუდმივად ამ რეჟიმში, რომ „ნაციონალურმა მოძრაობამ” ყოველ წელს სცადოს, არჩევნების შედეგების მიუხედავად, რევოლუციის მოწყობა, ხელისუფლებაში დაბრუნება. ჩაკეტილი წრე უნდა გაირღვეს და ეს იმდენად მნიშვნელოვანი ეროვნული ამოცანაა, რომ ამ კანონზე უარის თქმა უბრალოდ არავითარ შემთხვევაში არ შეიძლება”.

რადიო „თავისუფლება”, გელა ბოჩიკაშვილი: “თქვენ ყოველთვის იხსენებთ ხოლმე, რომ სულ მცირე ორჯერ იყო საქართველოში რევოლუციის მცდელობა, თქვენი ხელისუფლებაში ყოფნის დროს, უნდა ველოდოთ თუ არა ამ კანონის მიღების შემდეგ რაიმე სამართლებრივ მიმართულებას ამ კუთხით, რადგან ხელისუფლების დამხობა სამართლებრივ კვალიფიკაციაში ჯდება და შესაძლოა, სისხლის სამართლის კვალიფიკაცია მიეცეს. დაწყებულია თუ არა გამოძიება საქართველოს კანონმდებლობით, ეს დაცული სივრცეა, ასე ვთქვათ, რევოლუციის მოწყობის ნაწილში, ანუ აკრძალულია. თუ აპირებს ხელისუფლება, რაიმე ტიპის სამართლებრივი შეფასება მისცეს და აქამდე თუ იყო მსგავსი შემთხვევები, რატომ არ მიეცა მსგავსი შეფასება. როგორი არის თქვენი გეგმა ამ მხრივ”?

ირაკლი კობახიძე: “რევოლუციის მცდელობა ყოველთვის არ არის დანაშაული. მაგალითად, ჩვენ ვნახეთ რევოლუციის მოწყობის ღია მცდელობა 2022 წლის ივნისში. როცა შენ, არჩევნების მიუხედავად, არჩევნების მიღმა ითხოვ მთავრობის გადადგომას და შენი მონაწილეობით მთავრობის ჩამოყალიბებას, ანუ არჩევნებში მანდატი არ მიგიღია, ხარ რაღაც ენჯეო და გინდა, შენ დააკომპლექტო მთავრობა, ეს არის რევოლუცია, მაგრამ აღნიშნული არ არის რევოლუციის ის ფორმა, რომელიც შეიძლება იყოს დასჯადი. რევოლუციის მცდელობა შეიძლება იყოს დასჯადი იმ შემთხვევაში, თუ მას თან ახლავს კონკრეტული პარალელური დანაშაულები. მაგრამ როდესაც გამოდიხარ და რეალურად რევოლუციისკენ მიგყავს ქვეყანა, მაგრამ ამას არ ახლავს თან პარალელური დანაშაულები, ეს შეიძლება, არ დაკვალიფიცირდეს, როგორც სისხლის სამართლის დანაშაული. ანუ არსებობს დანაშაულებრივი რევოლუციის მცდელობა და შეიძლება არსებობდეს ისეთი რევოლუციის მცდელობა, რომელიც არ კვალიფიცირდება, როგორც სისხლის სამართლის დანაშაული. რევოლუციის მცდელობა იყო 2020-2021-2022-2023 წლებში, მაგრამ რაც შეეხება დანაშაულის კვალიფიკაციის მინიჭებას, ეს არ არის ჩემი ფუნქცია. ეს არის სამართალდამცავი უწყებების ფუნქცია, თუ ისინი ნახავენ პარალელურ დანაშაულებს, რომლებიც იქნა ჩადენილი ამ მცდელობებთან ერთად, ამ შემთხვევაში შეიძლება, ასეთი საკითხიც დადგეს. მეორეც, ზოგადად შეიძლება, ასეთ გამუდმებული მცდელობები გახდეს თეორიულად პოლიტიკური პარტიის აკრძალვის ინსტრუმენტი. თქვენ იცით, რომ ამ ინსტრუმენტს ძალიან აქტიურად იყენებენ მაგალითად დღეს უკრაინასა და მოლდოვაში. თუ კონკრეტული პოლიტიკური პარტია არ ასვენებს ქვეყანას, თეორიულად ეს შეიძლება, გახდეს პოლიტიკური პარტიის აკრძალვის საფუძველიც, თუმცა მე ამაზე ვერ ვისაუბრებ. ეს არის შესაბამისი სამართალდამცავი სტრუქტურების გადასაწყვეტი”.

რადიო „თავისუფლება”, გელა ბოჩიკაშვილი: “გამოძიება ხომ მიმდინარეობდა ამ კუთხით, პასუხისგებაში ვინმე თუ მიეცა”?

ირაკლი კობახიძე: “გამოძიებას რაც შეეხება, რაც შეეხება, მაგალითად, ცნობილ „კანვასის” ტრენინგებს, „კანვასის” ტრენინგის ვიდეო არის აშკარა მტკიცებულება იმისა, რომ მიზანმიმართულად მზადდებოდა ამ ქვეყანაში რევოლუცია, მაგრამ რაც შეეხება დანაშაულის მხარეს, ის უნდა გამოიძიოს კონკრეტულმა სამართალდამცავმა უწყებამ, მაგრამ ეს არ ნიშნავს იმას, რომ რევოლუცია არ მზადდებოდა. აქაც იყო იგივე შემთხვევა, უცხოური ფული იყო ჩართული საქმეში და პირდაპირ ამზადებდნენ დღისით, მზისით რევოლუციას ამ ქვეყანაში – იყო თუ არა აქ პლუს დანაშაულის ნიშნები, ეს უნდა დაადგინოს სამართალდამცავმა უწყებამ და არა პრემიერ-მინისტრმა. მიმდინარეობს გამოძიება ამასთან დაკავშირებით და გაგრძელდება ეს პროცესი, ეს არ არის მარტივი საკითხი გამომდინარე იქიდან, რომ მხოლოდ ეს ვიდეო საკმარისი არ არის დანაშაულის დასადგენად. ამის მიღმა შენ უნდა გამოიძიო დამატებითი გარემოებები, რასაც დრო სჭირდება”.

ტელეკომპანია „მთავარი”, ნატაშკა ჯახუტაშვილი: “თქვენი გამოსვლებიდან ჩანს, რომ საერთოდ არ გაინტერესებთ რას ამბობენ დასავლეთში, რა მოწოდებები აქვთ ჩვენს საერთაშორისო პარტნიორებს”.

ირაკლი კობახიძე: “ძალიან მაინტერესებს”.

ტელეკომპანია „მთავარი”, ნატაშკა ჯახუტაშვილი: “არ ითვალისწინებთ, მაგალითად, ევროკავშირის რეკომენდაციებს, აშშ-ის მოწოდებებს, ამის ნათელი მაგალითია რუსული კანონის შემობრუნება. არჩევნებთან დაკავშირებით თუ ჩვენს საერთაშორისო პარტნიორებს ექნებათ მწვავე და კრიტიკული შეფასებები და თუ, მაგალითად, ისინი არჩევნების სამართლიანობას არ აღიარებენ ან ეჭვქვეშ დააყენებენ, თქვენ რას აპირებთ, საქართველო გახდება მეორე ბელარუსი, მეორე რუსეთის ფედერაცია და ოფიციალურად მზად ხართ, რომ გაწყვიტოთ ყველანაირი თანამშრომლობა ჩვენს სტრატეგიულ პარტნიორებთან”?

ირაკლი კობახიძე: “რაც შეეხება არჩევნებს. თეორიულ საკითხებზე ვერ ვისაუბრებ, მაგრამ მინდა გავიხსენო, რა ხდებოდა 2020 წელს. 2020 წელს ჩვენ მოვისმინეთ ძალიან მძიმე და უხეში ბრალდებები საქართველოს ხელისუფლების მიმართ არჩევნების გაყალბებასთან დაკავშირებით. ამაზე საუბრობდნენ ელჩები, კონკრეტული პოლიტიკოსები. ძალიან უხეში და მძიმე ბრალდებები იყო 2020 წელს, რაც ეფუძნებოდა სინამდვილეში ენჯეოების მიერ დასკვნების გაყალბებას. ცნობილი პარალელური ხმის დათვლა, ცნობილი ზედმეტობები”.

ტელეკომპანია „მთავარი”, ნატაშკა ჯახუტაშვილი: “არ გაყალბებულა წინა არჩევნები”?

ირაკლი კობახიძე: “არა, რა თქმა უნდა. გაყალბდა „პივიტი”. უცხოური დაფინანსებით გაყალბდა პარალელური დათვლის მონაცემები, რაც შემდეგ გახდა საბაბი კოლექტიური „ნაცმოძრაობისთვის”. ეს კანონი რომ მიიღება, ამის შემდეგ გაიგებს ხოლმე საზოგადოება, ვისი დაფინანსებით ყალბდება ხოლმე პარალელური დათვლის შედეგები. აქამდე არ იყო ეს ყველაფერი გამჭვირვალე. ჩვენ გვაქვს ეს ინფორმაცია, მაგრამ არ მინდა ვისაუბრო, ეს არის წარსული, მაგრამ როგორც კი ეს კანონი იქნება მიღებული, საზოგადოება გაიგებს, თუ ვისი დაფინანსებით ყალბდება, მაგალითად, პარალელური დათვლის შედეგები ან ზედმეტობის შესახებ მონაცემები”.

ტელეკომპანია „მთავარი”, ნატაშკა ჯახუტაშვილი: “არჩევნებთან დაკავშირებით გვიპასუხეთ, თუ კრიტიკული იქნება შეფასებები, თქვენ დეკლარირებულად უარს იტყვით ევროინტეგრაციაზე? ჩვენს ევროპულ მომავალზე? რუსულ კანონს იღებთ, რაზეც ყველა თანხმდება. დასავლეთში ქვეყანა არ დარჩენილა, რომელიც არ გამოხმაურებია ამ ამბავს, ყველა მოგიწოდებთ, რომ უკან გაიწვიოთ”.

ირაკლი კობახიძე: “არგუმენტი მითხარით, თქვენმა კოლეგამ ვერ თქვა არგუმენტი, თქვენ მითხარით ერთი არგუმენტი”.

ტელეკომპანია „მთავარი”, ნატაშკა ჯახუტაშვილი:”არგუმენტი უამრავია, თავიდან ბოლომდე ეს კანონი არის რუსული, პუტინის რეჟიმმა იდენტური კანონი მიიღო 2012 წელს რეპრესიების მიზნით. თქვენ მტრად აცხადებთ აშშ-ს, ევროკავშირის წევრ სახელმწიფოებს და გინდათ, რომ რეპრესიები განახორციელოთ არასამთავრობოებზე. სიცრუეში არიან შეყვანილები ჩვენი პარტნიორები? მარტო რუსეთს მოსწონს ეს კანონი და მარტო რუსეთი გაქებთ. „ქართულ ოცნებას” მხარდამჭერი ჰყავს მარტო რუსეთი”.

ირაკლი კობახიძე: “ამ სპეკულაციურ განცხადებებზე ვერ გიპასუხებთ. ეგ არცერთი არგუმენტი არ არის. თქვენ თქვით, რომ ეს არის რუსული კანონი, რაც არის უმარტივესი სიყალბე, სიცრუე და ვინც ამბობს, რომ ეს კანონი არის რუსული, ის არა მარტო იტყუება, არამედ ცრუპენტელობს. ეს არის ტყუილის ყველაზე უხეში ფორმა. რატომ არის ეს ცრუპენტელობა, რას ითვალისწინებს, მაგალითად, რუსული კანონი. რუსული კანონი, გარდა იმისა, რომ ითვალისწინებს დეკლარაციების ჩაბარებას, ითვალისწინებს მაგალითად იმას, რომ რამდენიმე თვით შეიძლება პირდაპირ ჩაჯდეს სახელმწიფო კონტროლი არასამთავრობო ორგანიზაციაში. პირდაპირ ჩაჯდება იქ. შეიძლება შეაჩეროს არასამთავრობო ორგანიზაციის საქმიანობა ამ კონტროლის განხორციელების პროცესში; საერთოდ აკრძალოს ამ არასამთავრობოს საქმიანობა; სისხლის სამართლის საქმე აღძრას როგორც ორგანიზაციის, ისე მასში დასაქმებული ადამიანების წინააღმდეგ. გარდა ამისა, რუსული კანონი ითვალისწინებს ბრენდირებას, რაც გულისხმობს იმას, რომ როდესაც არა მარტო ორგანიზაცია, არამედ, მაგალითად, როცა ტელევიზიით გამოდის კონკრეტული პირი და საუბრობს ასეთი ორგანიზაციის სახელით, მას ქვევით ეწერება ტიტრებში, რომ ის არის უცხოელი აგენტი, ეს, ასე ვთქვათ, ამერიკული სტანდარტია. რუსულ კანონში არის 10 საკითხი, რომელიც მას აქცევს რეპრესიულად. ჩამოგითვალეთ 10 პუნქტი, რაც წერია რუსულ კანონში, ძალიან უხეში პუნქტებია, საიდანაც არცერთი არ წერია ქართულ კანონში. რანაირად არის ქართული კანონი რუსული, ლოგიკა ხომ გაქვთ, მე-9 კლასის განათლება მაინც ხომ გაქვთ”?!

ტელეკომპანია „მთავარი”, ნატაშკა ჯახუტაშვილი: “თქვენი ამოცანა არ არის, რომ თავისუფალი ხმა ჩაახშოთ და გააუქმოთ არასამთავრობოები”?

ირაკლი კობახიძე: “ეს რომ გვდომოდა, გადმოვწერდით რუსულ კანონს. ვისაც აქვს მე- 9 კლასის განათლება, დამეთანხმება იმაში, რომ როცა 10 რაღაც წერია რუსულ კანონში უხეში, რეპრესიული და აქ არცერთი არ წერია, არ შეიძლება ამ კანონს უწოდო რუსული”.

ტელეკომპანია „მთავარი”, ნატაშკა ჯახუტაშვილი: “ოლაფ შოლცს მე-9 კლასის განათლება აქვს, ბატონო ირაკლი? თქვენთან ერთად იდგა ერთობლივ ბრიფინგზე და გაგაკრიტიკათ. სახელმწიფო დეპარტამენტზე რა პასუხი გაქვთ, ცრუპენტელობენ ისინიც? საერთაშორისო პარტნიორებს რას ეუბნებით, როდესაც მხოლოდ რუსეთს მოსწონს ეს კანონი და სხვა არავის, მათ შორის არც აშშ-ს, ეს რაზე მიანიშნებს:?

ირაკლი კობახიძე: “ჩემი უმცროსი შვილი, რომელიც არის მესამე კლასში, ასეთ რაღაცას არ შემომიბრუნებდა ახლა, პასუხისმგებლობაც ექნებოდა და განათლებაც საკმარისი ამისთვის. რაც შეეხება უცხოელებს, რომლებიც იტყუებიან ამ კანონთან დაკავშირებით და არგუმენტების გარეშე ამბობენ, არ გაბედოთ ამის მიღებაო, მათ ეკისრებათ პასუხისმგებლობა, ისინი არიან თანაზიარნი იმ პასუხისმგებლობის, რომელიც უკავშირდება კოლექტიური „ნაცმოძრაობის” მიერ განხორციელებულ ძალადობას. მნიშვნელობა არ აქვს ვინ არის, ვინც ამ კანონპროექტთან დაკავშირებით იტყუება, ყველა იზიარებს პასუხისმგებლობას იმ ძალადობაზე, რომელიც ჩვენ ვიხილეთ გუშინ კოლექტიური „ნაცმოძრაობის” მიერ, კეზერაშვილის, ხაზარაძის და სხვა სუბიექტების მიერ დაფინანსებული ახალგაზრდების შესრულებით. არავის აწყობს გამჭვირვალობა, არავის უნდა, რომ მისი ფინანსები იყოს გამჭვირვალე. ჩვეულებრივი ამბავია”.

ტელეკომპანია „მთავარი”, ნატაშკა ჯახუტაშვილი: “თქვენ მზად ხართ, რომ საბოლოოდ უარი თქვათ ევროკავშირთან თანამშრომლობაზე ან გაწყვიტოთ თანამშრომლობა? რუსული კანონია და ამიტომ”.

ირაკლი კობახიძე: “რა გვეტყობა?! ეს კანონი არის აუცილებელი პირობა იმისა, რომ ჩვენ უფრო დავაჩქაროთ პროცესი. ჩემი უმცროსი შვილი ასეთ რამეებს არ იტყვის. განათლების, ინტელექტის და სინდისის ამბავია ეს ყველაფერი”.

ტელეკომპანია „მთავარი”, ნატაშკა ჯახუტაშვილი: “შეიძლება გუშინდელ აქციაზე გკითხოთ, თქვენ ნახეთ კადრები როგორ გამეტებით ურტყამდნენ ახალგაზრდებს? ქალებს და ბავშვებს”?

ირაკლი კობახიძე: “ეს იყო მიტინგის დაშლა. იყო გადაცდომები, ინციდენტები, მაგრამ მთლიანობაში ეს იყო მიტინგის დაშლა ევროპული სტანდარტებით. რაც შეეხება გადაცდომებს და ინციდენტებს, ამასთან დაკავშირებით, ბუნებრივია, ყველა საკითხი იქნება შესწავლილი. რამდენიმე სამწუხარო ინციდენტი იყო, რომელიც იქნება შესწავლილი. რაც შეეხება მთლიანობაში შეკრებას და მიტინგს, ძალიან მკაფიოდ დასტურდება ის, რომ მალევე შეკრებამ მიიღო კანონსაწინააღმდეგო ხასიათი, ამის შემდეგ უკვე ძალადობრივი ხასიათი, შესაბამისად, არსებობდა შეკრების დაშლის ლეგიტიმური საფუძველი. გარკვეული გადაცდომების, ინციდენტების მიღმა, მთლიანობაში ევროპული სტანდარტებით ჩატარდა ოპერაცია, რისთვისაც მადლობა გადავუხადე შინაგან საქმეთა სამინისტროს და პოლიციას. რაც შეეხება ძალადობას, მე თქვენგან არ მახსოვს, მაგალითად, ელისაშვილის „ვაჟკაცობის” დაგმობა, არ მახსოვს თქვენს კოლეგებზე ძალადობის დაგმობა. თქვენ არ დაგიგმიათ ელისაშვილის, მომიტინგეების ძალადობა, არ დაგიგმიათ თქვენს კოლეგებზე ძალადობა, ეს არის „ნაცმოძრაობის” სახე”.

ტელეკომპანია „მთავარი”, ნატაშკა ჯახუტაშვილი: “უკანონო ბრძანებების გამცემი ვინ იყო? პასუხისმგებლობას არ იღებთ გუშინ განვითარებულ მოვლენებზე, როგორც პრემიერ-მინისტრი”?

ირაკლი კობახიძე: “მთავარი უკანონო ბრძანებების გამცემი გუშინ იყო კეზერაშვილი და დიმა ჩიქოვანი, რომელიც აფინანსებს ამ ძალადობრივ ახალგაზრდულ დაჯგუფებებს. პასუხისმგებლობას ვიღებ იმაზე, რომ გუშინ შეკრების დაშლის ოპერაცია მთლიანობაში ჩატარდა ევროპული სტანდარტებით. რაც შეეხება კონკრეტულ გადაცდომებს და ინციდენტებს, ეს არის ცალკეული შესწავლის საკითხი, მაგრამ პასუხისმგებლობას ვიღებ იმაზე, რომ სწორედ ევროპული სტანდარტებით ჩატარდა მთლიანობაში, ინციდენტების მიღმა, ეს კონკრეტული ოპერაცია. რაც შეეხება მომიტინგეების ძალადობას, ამაზე მოსთხოვეთ პასუხისმგებლობა კოლექტიური „ნაცმოძრაობის” ლიდერებს, რასაც თქვენ არ აკეთებთ, იმიტომ რომ თქვენ ხართ არაკრიტიკული ტელევიზია”.

„პალიტრანიუსი”, მარიამ ჩიქოვანი: „ქართული ოცნების” პოზიცია ცნობილია და თქვენც დააფიქსირეთ, რომ კანონპროექტს უკან არ გაიწვევთ, მაგრამ ქვეყანაში პოლიტიკური ტურბულენტობის ფონზე ხომ არ ფიქრობთ და ხომ არ არის შანსი, რომ გაჩნდეს ამ კანონპროექტის კომპრომისული ვარიანტი და ხომ არ ფიქრობთ, რომ ამ კანონპროექტს უფრო მეტ ლეგიტიმაციას შესძენს, მაგალითად, კენჭი უყაროს მომავალი მოწვევის პარლამენტმა და ამ შემთხვევაში 2024 წლის საპარლამენტო არჩევნები იქნებოდა ერთგვარი პლებისციტი და მეორე კითხვაც – ამ კანონის მიღების შემთხვევაში ხომ არ ელით დასავლეთისგან სანქციებს, რომ ისინი დაასანქცირებენ „ქართული ოცნების” ლიდერებს”?

ირაკლი კობახიძე: “ადრეც იყო შანტაჟის ენით საუბარი რევოლუციის მცდელობებთან ერთად. 2020 წელს გვესაუბრებოდნენ შანტაჟის ენით, 2021-ში, 2022-ში, 2023-ში და შანტაჟის ენა არ ჭრის არც ქართველი ხალხის და არც ამ ხელისუფლების მიმართ, იმიტომ, რომ დღეს ქვეყანას ჰყავს დამოუკიდებელი, სუვერენული ხელისუფლება და ეს ხალხიც არის გამოცდილი და აქვს თავისი ღირსება. ამიტომ, ჩვენთან შანტაჟის ენით საუბარი არ ჭრის. რაც შეეხება კანონის ამოქმედებას, კანონის მიღებას სჭირდება დრო. აქედან კიდევ ორი კვირა, შემდეგ ოთხი კვირა, შემდეგ ხელის მოწერას სჭირდება კიდევ ერთი კვირა. ამის შემდეგ კიდევ სამი თვე სჭირდება, ვიდრე მოვა დეკლარაციის შევსების ვადა. თუ არ ვცდები, ეს ყველაფერი გადადის სექტემბრის ბოლომდე. არსებითად, დრო არსებობს. თუ ზუსტად არ იციან ჩვენმა რადიკალმა ოპონენტებმა, რომ გარანტირებულად აგებენ არჩევნებს, მაშინ რა აწუხებთ, მოვიდნენ ხელისუფლებაში და ნოემბერში შეცვალონ კანონი. ზუსტად იციან, რომ არჩევნების მოგების შანსი არ აქვთ. ხომ გასაგები და ცხადია ეს ყველაფერი? თვითონ ხომ იციან თავიანთი რეიტინგი. ჩვენ რომ დაგვიფიქსირდა 61,5% მარტის შუა რიცხვებში, ხომ იცით, რა გამოდის მათი რეიტინგი? მთელი კოლექტიური რადიკალური ოპოზიციის რეიტინგი გამოდის დაახლოებით 25%. ამ ვითარებაში არავითარი იმედი არ აქვთ, რომ არჩევნებს მოიგებენ. რაც შეეხება ტურბულენტობას, რა თქმა უნდა, პოლიტიკური უმცირესობა ვერავითარ არსებით ტურბულენტობას ვერ გამოიწვევს. აქედან გამომდინარე, ყველას მოვუწოდებ, შეინარჩუნონ სიმშვიდე, შეეგუონ არჩევნებში დამარცხებას და მათ მეგობარი NGO-ების გამჭვირვალობას, რაც არის ევროპული სტანდარტი და ევროპული ღირებულება”.

„ინტერპრესნიუსი”, ლიკა რუაძე – ბატონო ირაკლი, ხშირად ისმის ხოლმე საზოგადოებაში არსებული და პოლიტიკური პოლარიზების ფონზე, რომ არსებობს სამოქალაქო დაპირისპირების საფრთხე. თქვენ, როგორც პრემიერ-მინისტრი, როგორ აფასებთ ამ რისკებს და რას აკეთებს სახელმწიფო იმისთვის, რომ ქვეყანა არ მივიდეს ამ მოცემულობამდე?

ირაკლი კობახიძე: “ამ ყველაფერს ცდილობს კოლექტიური „ნაცმოძრაობა”, რადიკალური ოპოზიცია უკვე ამდენი წელია. ყოველ წელს ცდილობენ სამოქალაქო დაპირისპირებას და ეს სცენარი გამზადებული ჰქონდათ მათ არჩევნების შემდგომი პერიოდისთვის. მათ უწევთ, დღეს ეს ძალადობრივი რესურსი გაანიავონ, რაც, რა თქმა უნდა, მოაკლებს მათ მუხტს არჩევნების შემდგომი პერიოდისთვის. უბრალოდ ნიავდება ის ძალადობრივი რესურსი. თან ხდება ლუსტრაცია და იშიფრება ის დაახლოებით 15 ახალგაზრდული ძალადობრივი ორგანიზაცია, რომლებიც პირდაპირ დატრენინგებულია ძალადობისთვის და, შესაბამისად, იშიფრება მათი ძალადობრივი მეთოდები. აქედან გამომდინარე, ძალიან კარგი პროცესები წარიმართება მთლიანობაში. საზოგადოება დაინახავს ყველაფერს, საზოგადოება ხედავს ყველაფერს. მთლიანობაში მოხდება მათი ძალადობრივი რესურსის განიავება წინასწარ. ეს არის ძალიან მნიშვნელოვანი, ჩვენთვის – ეროვნული ამოცანა”.

„ინტერპრესნიუსი”, ლიკა რუაძე: “ელოდებით თუ არა დასავლეთისგან სანქციებს”?

ირაკლი კობახიძე: “კითხვა დაისვა ამასთან დაკავშირებით უკვე და კიდევ ერთხელ გავიმეორებ. ჩემთვის აბსოლუტურად გაუგებარია, იგივე შანტაჟი ჩვენ გვახსოვს 2021-2022-2023 წლებიდან. ხომ ვერავინ დააშანტაჟეს ამით? აქედან გამომდინარე, ვერც ახლა ექნება შანტაჟს ვერავითარი ფასი. ვერ გაჭრის ეს ვერც ქართულ საზოგადოებაზე და ვერც ხელისუფლებაზე”.