საგადასახადო შეღავათები საშემოსავლო, მოგების და ქონების გადასახადზე სოფლის მეურნეობაში დასაქმებული ფიზიკური პირებისათვის და სასოფლო-სამეურნეო კოოპერატივებისთვის 3 წლის ვადით, 2026 წლის 1 იანვრამდე გაგრძელდება.
საქართველოს მთავრობის მიერ საკანონმდებლო ინიციატივის წესით წარმოდგენილი კანონპროექტი „საქართველოს საგადასახადო კოდექსში ცვლილების შეტანის შესახებ“, თანმდევ პაკეტთან ერთად, საფინანსო-საბიუჯეტო კომიტეტმა დაჩქარებული წესით, მეორე მოსმენით განიხილა. ფინანსთა მინისტრის მოადგილე მამუკა ბარათაშვილმა კანონპროექტის წარდგენისას განმარტა, რომ 2026 წლის 1 იანვრამდე ასევე გაგრძელდება ფიზიკური პირის, არარეზიდენტების გათავისუფლება საშემოსავლო და მოგების გადასახადისგან სასესხო ფასიანი ქაღალდიდან პროცენტის სახით მიღებულ შემოსავალზე და თამბაქოს ნედლეულის იმპორტის გადასახადზე; იმავე ვადით გადაიწევს ბაზრობაზე არასტაციონარული სავაჭრო ადგილის გამოყენებით ვაჭრობის განმახორციელებელი ფიზიკური პირებისათვის საკონტროლო-სალარო აპარატის გამოყენების ვალდებულება და სხვა საგადასახადო შეღავათები. შესაბამისი ცვლილებები შედის „საქართველოს საბაჟო კოდექსში“ და „საქართველოს საგადასახადო კოდექსში ცვლილების შეტანის შესახებ“ კანონში. კომიტეტმა წარმოდგენილ საკანონმდებლო პაკეტს მხარი დაუჭირა.
0