ვემზადებით, რომ შევუერთდეთ ერთიან ევროგადახდის სივრცეს, SEPA -ს, ევროკავშირში გადარიცხვებისთვის აღარ იქნება საჭირო საკორესპონდენტო ბანკის ან შუამავლის გამოყენება და ეს ძალიან პოზიტიური საკითხია ჩვენი მოქალაქეებისთვის, – ამის შესახებ საქართველოს პრემიერ-მინისტრმა ირაკლი ღარიბაშვილმა მთავრობის სხდომაზე განაცხადა. პრემიერ-მინისტრის თქმით, აღნიშნული ორგანიზაციის წევრი ევროკავშირის 27 წევრი ქვეყანა, ასევე დიდი ბრიტანეთი, შვეიცარია, ნორვეგია, ისლანდია და ლიხტენშტაინი არიან. ირაკლი ღარიბაშვილმა აღნიშნა, რომ ამ მიმართულებით ყველა სამთავრობო უწყება მუშაობს, მთავრობის სხდომის შემდეგ კი პარლამენტს სამი კანონპროექტი გადაეგზავნება დასამტკიცებლად.
„კიდევ ერთი პოზიტიური ინფორმაცია მინდა ვუთხრა ჩვენს მოქალაქეებს, რომელიც ევროკავშირთან ინტეგრაციას უკავშირდება. გეტყვით, რომ ვემზადებით შევუერთდეთ ერთიან ევრო გადახდის სივრცეს, ასეთი სახელწოდებისაა ეს ორგანიზაცია, SEPA – Single Euro Payment Area. ეს არის ევროკავშირის და ევროზონის ქვეყნებში საგადასახადო მომსახურების და პროვაიდერების ჰარმონიზების ჩარჩო, რომლის წევრიც არის ევროკავშირის 27 წევრი ქვეყანა, ასევე დიდი ბრიტანეთი, შვეიცარია, ნორვეგია, ისლანდია და ლიხტენშტაინი. ამ მიზნით ჩვენ აქტიურად ვმუშაობთ, ეროვნული ბანკი ჩართულია, ეკონომიკის სამინისტრო, სხვადასხვა სამთავრობო უწყებები და საქართველოს პარლამენტმა, რომელსაც გადაეგზავნება დღევანდელ მთავრობის სხდომაზე წარმოდგენილი სამი კანონპროექტი, უნდა დაამტკიცოს და შესაბამისი ცვლილებები უნდა ასახოს კანონმდებლობაში, რაც ასევე ძალიან პოზიტიური იქნება ჩვენი მოქალაქეებისთვის. ამის თაობაზე დეტალურ ინფორმაციას ბატონი ლევან დავითაშვილი მოგახსენებთ მთავრობის სხდომის შემდეგ. ზოგადად, მე ვიტყოდი, რომ ევროკავშირში გადარიცხვებისთვის აღარ იქნება საჭირო საკორესპონდენტო ბანკის ან შუამავლის გამოყენება და ეს ძალიან პოზიტიური საკითხია ჩვენი მოქალაქეებისთვის”, – განაცხადა ირაკლი ღარიბაშვილმა.
0