საქართველოს ვიცეპრემიერი, გარემოს დაცვისა და სოფლის მეურნეობის მინისტრი ლევან დავითაშვილი, შვეიცარიის კონფედერაციაში, ქალაქ ჟენევაში, გაეროს გენერალური მდივნის მოადგილეს, გაეროს ევროპის ეკონომიკური კომისიის (UNECE) აღმასრულებელ მდივანს, ოლგა ალგაეროვას შეხვდა. შეხვედრაზე, რომელიც გაერთიანებული ერების ორგანიზაციის ჟენევის ოფისში გაიმართა, საუბარი შეეხო ქვეყანაში ცირკულარული ეკონომიკის განვითარებისა და ბუნებრივი რესურსების მდგრადი გამოყენების ხელშეწყობის საკითხებს. ლევან დავითაშვილმა გაეროს ევროპის ეკონომიკური კომისიის აღმასრულებელ მდივანს ნაყოფიერი თანამშრომლობისთვის მადლობა გადაუხადა. მინისტრმა შეხვედრაზე გარემოსდაცვითი შეფასების კანონმდებლობის შემუშავებისა და გარემოსდაცვითი მმართველობის გაუმჯობესების მიმართულებებით UNECE-ის მხარდაჭერასა და სამომავლო თანამშრომლობის საკითხებზე ისაუბრა. ლევან დავითაშვილმა ყურადღება გარემოსდაცვითი გადაწყვეტილების მიღების პროცესში საზოგადოების ჩართულობის მნიშვნელობაზე და ამ მიმართულებით UNECE-თან სამომავლო თანამშრომლობაზე გაამახვილა. მინისტრმა ოლგა ალგაეროვას საქართველოში ცირკულარული ეკონომიკის განვითარების სტრატეგიის შემუშავებასა და ნარჩენების მართვის სფეროში მწარმოებლის გაფართოებული ვალდებულების სისტემის დანერგვის შესახებაც მიაწოდა ინფორმაცია და ხაზგასმით აღნიშნა, რომ საქართველო აქტიურად მუშაობს წყლის რესურსების ინტეგრირებული მართვის სისტემის დანერგვის მიმართულებით. კანონპროექტი “წყლის რესურსების მართვის შესახებ” უკვე წარედგინა საქართველოს მთავრობას და უახლოეს მომავალში დაიწყება მისი საპარლამენტო განხილვა. ოლგა ალგაეროვამ დადებითად შეაფასა ქვეყანაში გარემოსდაცვით სფეროში არსებული პროგრესი, აღნიშნა, რომ საქართველო აქტიურად მუშაობს გარემოს დაცვის სფეროში ახალი რეფორმების განხორციელების მიმართულებით და გაეროს ევროპის ეკონომიკური კომისიის მხრიდან სამომავლო მხარდაჭერაზე ისაუბრა.
შეხვედრას ესწრებოდნენ გარემოს დაცვისა და სოფლის მეურნეობის მინისტრის მოადგილე ნინო თანდილაშვილი და საქართველოს მისიის ხელმძღვანელი გაეროს ჟენევის ოფისსა და სხვა საერთაშორისო ორგანიზაციებში, ალექსანდრე მაისურაძე.
0