საქართველოს პარლამენტის თავმჯდომარე, კახა კუჭავა ლიეტუვის რესპუბლიკის პრეზიდენტს, გიტანას ნაუსედას შეხვდა. შეხვედრაზე ორ ქვეყანას შორის არსებულ მეგობრულ და პარტნიორულ ურთიერთობებზე ისაუბრეს. აღინიშნა, რომ ორმხრივი კავშირების კიდევ უფრო გაღრმავებაში, განსაკუთრებული მნიშვნელობა ენიჭება მჭიდრო საპარლამენტთაშორისო თანამშრომლობას. საუბრის ერთ-ერთი მთავარი თემა საქართველოს ევროატლანტიკური ინტეგრაციის პროცესი, ამ გზაზე მიღწეული პროგრესი და გამოწვევები იყო. ყურადღება გამახვილდა ჩვენს ქვეყანასა და ჩრდილოატლანტიკურ ალიანსს შორის არსებულ თანამშრომლობაზე. მხარეებმა იმედი გამოთქვეს, რომ მომავალ ნატოს სამიტის დეკლარაციაში აისახება პროგრესი, რომელსაც საქართველომ ინტეგრაციის მიმართულებით მიაღწია. პარლამენტის თავმჯდომარემ პრეზიდენტს მადლობა გადაუხადა საქართველოს ევროპულ და ევროატლანტიკური მისწრაფებების მუდმივი მხარდაჭერისთვის. შეხვედრაზე საქართველოს ოკუპირებულ ტერიტორიებზე არსებული ვითარება, ასევე, საოკუპაციო ხაზთან მცხოვრები მოსახლეობის მძიმე პრობლემები განიხილეს. გიტანას ნაუსედამ ლიეტუვის მხრიდან ჩვენი ქვეყნის სუვერენიტეტისა და ტერიტორიული მთლიანობისადმი ურყევი მხარდაჭერა დაადასტურა. შეხვედრას საქართველოს პარლამენტის თავმჯდომარის მოადგილე, ავთანდილ ენუქიძე, ევროპასთან ინტეგრაციის კომიტეტის თავმჯდომარე, მაკა ბოჭორიშვილი, საგარეო ურთიერთობათა კომიტეტის თავმჯდომარე, ნიკოლოზ სამხარაძე, ფრაქციის „ერთიანი ნაციონალური მოძრაობა – გაერთიანებული ოპოზიცია „ძალა ერთობაშია“ თავმჯდომარე, ხატია დეკანოიძე, ფრაქციის „ლელო-პარტნიორობა საქართველოსთვის“ თავმჯდომარე, ბადრი ჯაფარიძე და ფრაქციის „შარლ მიშელის რეფორმების ჯგუფის“ წევრი, გიორგი ვაშაძე ესწრებოდნენ.
0