ბოლნისქალაქობაზე საპატიო მოქალაქეებს წელსაც აირჩევენ

28 სექტემბერს ჩვენი ქალაქი ბოლნისქალაქობას იზეიმებს. სახალხო დღესასწაულზე ტრადიციულად ბოლნისის საპატიო მოქალაქეებს გამოავლენენ. ამ საკითხთან დაკავშირებით, მერიის საკონფერენციო დარბაზში, ბოლნისის მუნიციპალიტეტის მერთან არსებული, ბოლნისის მუნიციპალიტეტის საპატიო მოქალაქის წოდების მინიჭების საკითხის განმხილვევი სათათბირო საბჭო შეიკრიბა.

საბჭოს წევრებმა შეხვედრაზე საპატიო მოქალაქეობის კანდიდატების შესახებ განცხადების რეგისტრაციის ვადები განიხილეს. ბოლნისის მუნიციპალიტეტის საკრებულოს 2016 წლის 18 ივლისის N35 დადგენილების მიხედვით, განცხადების მიღება შესაძლებელი იქნება 2019 წლის 20 სექტემბრის ჩათვლით.
საპატიო მოქალაქის წარდგენა შეუძლია:
ბოლნისის მუნიციპალიტეტის მერს;
ბოლნისის მუნიციპალიტეტის საკრებულოს თავმჯდომარეს;
ბოლნისის მუნიციპალიტეტის საკრებულოს სიითი შემადგენლობის არანაკლებ 1/3-ს;
საზოგადოებრივ, პროფესიულ, შემოქმედებით კავშირებსა და ორგანიზაციებს;
არანაკლებ 7-კაციან საინიციატივო ჯგუფს. (ამ შემთხვევაში ინიციატივას თან უნდა ერთვოდეს
ბოლნისის მუნიციპალიტეტის ამომრჩეველთა არანაკლებ 1%-ის ხელმოწერა);
საპატიო წოდების მქონე მოქალაქეთა ჯგუფს.
საპატიო მოქალაქის წოდების მისანიჭებლად უფლებამოსილი პირები კანდიდატურას წარუდგენენ მერს, რომელსაც წერილობითი სახით თან უნდა ერთვოდეს:
ა) საპატიო მოქალაქის წოდების მისანიჭებლად კანდიდატურის წამოყენების უფლებამოსილი
ორგანიზაციის ან პირების რეკომენდაცია, სადაც უნდა წარმოჩინდეს საპატიო მოქალაქის წოდებაზე წარდგენილი კანდიდატურის ღვაწლი და დამსახურება;
გ) ბიოგრაფიული ცნობები;
დ) კანდიდატურის ღირსების, ღვაწლისა და დამსახურების ამსახველი მასალები, საზოგადოებისათვის უკვე ცნობილი ან საპატიო წოდებაზე წარდგენის დღემდე უცნობი დოკუმენტური და სხვა სახის მასალები;
ე) კანდიდატის პირადობის დამადასტურებელი დოკუმენტის ქსეროასლი და ორი ფერადი
ფოტოსურათი ზომით-3X4;
ვ) პირის წერილობითი თანხმობა მისთვის საპატიო წოდების მინიჭებაზე;

მერი შემოსულ დოკუმენტაციას შესასწავლად და დასკვნის მოსამზადებლად გადასცემს სათათბირო საბჭოს.
საპატიო მოქალაქის წოდება შეიძლება მიენიჭოს, როგორც საქართველოს, ისე უცხო ქვეყნის მოქალაქეს. მოქალაქეობის არმქონე სრულწლოვან ფიზიკურ პირს, განურჩევლად ეროვნებისა, სოციალური მდგომარეობისა, საზოგადოებრივ -პოლიტიკური შეხედულებებისა და რელიგიური აღმსარებლობისა, რომელსაც თავისი საზოგადოებრივი, პროფესიონალური, სამეცნიერო ან სხვა მოღვაწეობა აქვს. საპატიო მოქალაქის წოდება ენიჭება პირს სიცოცხლეში ერთხელ და შესაძლოა გარდაცვალების შემდეგაც.

გთხოვთ, კანდიდატურებთან დაკავშირებული სრული დოკუმენტაცია 20 სექტემბრის ჩათვლით წარადგინოთ ბოლნისის მუნიციპალიტეტის მერიის მოქალაქეთა მომსახურების განყოფილებაში ან ელექტრონულ ფოსტაზე: bolnisimunicipality@bolnisi.gov.ge