მცხეთა-მთიანეთის სახელმწიფო რწმუნებულმა შალვა კერესელიძემ, შიდა ქართლის სახელმწიფო რწმუნებულმა გიორგი ხოჯევანიშვილმა და სამცხე-ჯავახეთის სახელმწიფო რწმუნებულმა ბესიკ ამირანაშვილმა, სამოქმედო ტერიტორიებზე ტურიზმის კიდევ უფრო განვითარების ხელშესაწყობად ურთიერთთანამშრომლობის მემორანდუმს მოაწერეს ხელი. მხარეები ერთობლივად დაგეგმავენ და განახორციელებენ ღონისძიებებს, რომლებიც მცხეთა-მთიანეთში, შიდა ქართლში და სამცხე-ჯავახეთში ტურიზმის პოპულარიზაციას, ტურისტული ინფრასტრუქტურის გაუმჯობესებას და ჩამოსული დამთვალიერებლების რაოდენობის ზრდას ხელს შეუწყობს, უზრუნველყოფენ ტურისტების ინფორმირებას რეგიონების ღირსშესანიშნავი ისტორიულ-კულტურული ობიექტების შესახებ, მოაწყობენ ერთობლივ ტურებს და ექსკურსიებს, ერთად იმსჯელებენ ტურიზმის სფეროში არსებული ინოვაციების რეგიონში დანერგვის გზებზე. მემორანდუმის ფარგლებში ასევე გათვალისწინებულია რეგიონებში შემავალი მუნიციპალიტეტებისა და ტურიზმის სფეროში მოქმედი კომპანიების თანამშრომლობის ხელშეწყობა.
„მცხეთა-მთიანეთი, მდიდარი ისტორიული მემკვიდრეობიდან და ხელსაყრელი გეოგრაფიული მდებარეობიდან გამომდინარე, ტურისტულად ერთ-ერთ ყველაზე მიმზიდველ და საინტერესო რეგიონს წარმოადგენს. აქტიურად ვმუშაობთ, რათა არსებული პოტენციალი უფრო ეფექტიანად გამოვიყენოთ და რეგიონში ტურისტული ნაკადის ზრდას ხელი შევუწყოთ. შიდა ქართლისა და სამცხე-ჯავახეთის მხარეებთან დაწყებული ურთიერთთანამშრომლობა ამ მიმართულებით წინგადადგმული ნაბიჯი იქნება“ – აღნიშნა მცხეთა-მთიანეთის სახელმწიფო რწმუნებულმა შალვა კერესელიძემ.
0