რაც შეეხება სანქციების თემას, კიდევ ერთხელ ვიტყვი, რომ ეს არის აბსოლუტურად არასერიოზული

პრემიერ-მინისტრმა ირაკლი კობახიძენ პრესკონფერენცია გამართა:
“მოგესალმებით, პირველ რიგში, მინდა კმაყოფილება გამოვხატო იმ ფაქტით, რომ გუშინ და დღეს მომიტინგეების მხრიდან ძალადობის ხარისხი იყო მნიშვნელოვნად შემცირებული იმ ძალადობასთან შედარებით, რომელიც მათი მხრიდან ორი და ოთხი კვირის წინ ვიხილეთ. ვფიქრობ, ამაში თავისი როლი ჩვენმა გუშინდელმა ბრიფინგებმა, გაფრთხილებებმა და მოწოდებებმა შეასრულა. შესაბამისად, მინდა კიდევ ერთხელ მოვუწოდო ყველას, ძალადობისგან და სხვა კანონსაწინააღმდეგო ქმედებებისგან თავი შეიკავონ. მადლობა მინდა გადავუხადო სამართალდამცველებს მომიტინგეების ძალადობისა და კანონსაწინააღმდეგო ქმედებების მიმართ, არსებითად, ამერიკულზე და ევროპულზე მაღალი სტანდარტით რეაგირებისათვის. დღესაც დაფიქსირდა რამდენიმე ინციდენტი, რომელიც, მართალია, სრულ შესატყვისობაში იყო ძალადობაზე რეაგირების ამერიკულ და ევროპულ სტანდარტებთან, თუმცა, არ შეესატყვისებოდა იმ სტანდარტებს, რომლებიც საქართველოში 2012 წლის შემდეგ „ქართულმა ოცნებამ” დაამკვიდრა. იმედი მაქვს, რომ მომავალში ამგვარი ცალკეული ინციდენტებიც იქნება თავიდან აცილებული. ქართული საზოგადოების იმ ნაწილს, რომელიც პოლიტიკური უმცირესობის დღის წესრიგს მიჰყვება, მინდა შევახსენო, რომ წაუკითხავი კანონის გაპროტესტება არის უდიდესი უპასუხისმგებლობა საკუთარი ქვეყნისა და საზოგადოების წინაშე. ამასთან, არანაკლებ დიდი უპასუხისმგებლობაა იმის თქმა, რომ ქართველი ხალხის მიერ არჩეულმა საქართველოს პარლამენტმა სახელმწიფო ინტერესებისთვის მნიშვნელოვანი კანონიც კი არ უნდა მიიღოს, თუ ამას გარედან აგვიკრძალავენ. იმ შემთხვევაში, თუ ჩვენ თავს დავუხრით უარგუმენტო და სიცრუეზე დაფუძნებულ, საბჭოური ტიპის გარე დირექტივებს, მომავალში ასეთივე წარმატებით მოგვთხოვენ, მაგალითად, ოჯახური ღირებულებებისა და არასრულწლოვანთა დაცვის შესახებ კანონის არმიღებას, ერთნაირ სქესიანთა ქორწინების დაკანონებას, ნარკოტიკების ლეგალიზაციას, ქვეყანაში უკონტროლო იმიგრაციის დაშვებას და მრავალ სხვა მანკიერებას, რომელიც დღეს სხვადასხვა ქვეყანაში ძალიან სწრაფი ტემპით იკიდებს ფეხს. გარდა ამისა, არ შეიძლება ქვეყანა მუდმივად ცხოვრობდეს გარედან თავსმოხვეული და უცხოური წყაროებიდან დაფინანსებული ე.წ. პოლარიზაციისა და რადიკალიზმის რეჟიმში. საქართველოს დამშვიდება და საქართველოში გრძელვადიანი მშვიდობისა და სიმშვიდის უზრუნველყოფა არის ჩვენი პასუხისმგებლობა სახელმწიფოს და საზოგადოების წინაშე. გაუმართლებელი კომპრომისების და ამ კომპრომისების შედეგად სუვერენიტეტის დაკარგვის პირობებში, საქართველო ძალიან მარტივად გაიზიარებს უკრაინის ბედს, რითაც ზოგიერთი უცხოელი პოლიტიკოსი გასულ დღეებში პირდაპირი ფორმითაც კი დაგვემუქრა. საქართველოს გარედან ვერავინ აუკრძალავს საკუთარი ეროვნული ინტერესების დაცვას. კიდევ ერთხელ გავიმეორებ, რომ აპრილში ჩატარებული სოციოლოგიური კვლევის თანახმად, ჩვენი მოსახლეობის 80%-ზე მეტი მხარს უჭერს არასამთავრობო ორგანიზაციების გამჭვირვალობას, ხოლო 60%-ზე მეტი მხარს უჭერს უშუალოდ კანონს უცხოური გავლენის გამჭვირვალობის შესახებ. შესაბამისად, ხვალ საქართველოს პარლამენტი იმოქმედებს საქართველოს მოსახლეობის უმრავლესობის რაციონალური ნების შესაბამისად და მესამე მოსმენით მიიღებს კანონს, რომელიც გარედან თავსმოხვეული ე.წ. პოლარიზაციის დასრულებაში უმნიშვნელოვანეს წვლილს შეიტანს. დასასრულს, კიდევ ერთხელ მოვუწოდებ მომიტინგეებს, თავი შეიკავონ კანონის დარღვევისგან და ძალადობისგან, აგრეთვე, კიდევ ერთხელ ვთხოვ სამართალდამცველებს, მომიტინგეების მხრიდან ძალადობის ნებისმიერ გამოვლინებას მაქსიმალური მოთმინებით უპასუხონ. დიდი მადლობა”.

იმედი, მარიამ ბუღაძე – ბატონო ირაკლი, გავრცელებული ინფორმაციით ო’ბრაიენი სანქციების პაკეტით ჩამოდის ხვალ და შეხვდება ბიძინა ივანიშვილსაც. რა შეგიძლიათ გვითხრათ ამასთან დაკავშირებით და ასევე, ხომ არ იგეგმება გარკვეული ცვლილებები ან რაიმე ცვლილება გამჭვირვალობის კანონთან დაკავშირებით.
პრემიერ-მინისტრი – ცვლილებები ჩვენი მხრიდან, ბუნებრივია, ვერ დაიგეგმება გამომდინარე იქიდან, რომ ხვალ მესამე მოსმენით მიიღება უკვე ეს კანონი და მესამე მოსმენის ფარგლებში ვერავითარი არსებითი ცვლილება ვერ იქნება შეტანილი. თუმცა, ჩვენ არაერთხელ ვთქვით, რომ მზად ვართ, ღია ვართ დისკუსიებისთვის ვეტოს ფარგლებში. მართალია, გუშინ გააკეთა არაკონსტრუქციული განცხადება სალომე ზურაბიშვილმა, თუმცა, მე მას მინდა კიდევ ერთხელ მოვუწოდო იმოქმედოს ისე, როგორც აქამდე მოქმედებდა. თქვენ ყველამ იცით, რომ სალომე ზურაბიშვილი თვითონ არასოდეს წერდა საკუთარ ვეტოს კანონპროექტებს. მას უწერდნენ ან NGO-ები, ან გარედან უწერდნენ. აქედან გამომდინარე, შესაძლებელია, რომ ეს ბერკეტი, ინსტრუმენტი გამოყენებული იყოს ახლაც, და თუ ამის შესაძლებლობას არ მისცემს არც ხელისუფლებას, არც საერთაშორისო პარტნიორებს სალომე ზურაბიშვილი, ეს იქნება, ბუნებრივია, მისი პასუხისმგებლობა. არის ორი კვირა 14 მაისიდან 28 მაისამდე, ამ ორი კვირის განმავლობაში შესაძლებელია პოზიციების შეჯერება და შემდეგ ამ პოზიციების ასახვა ვეტოს კანონპროექტში. თუმცა, არ ვიცი, თუ სალომე ზურაბიშვილს ექნება დესტრუქციული პოზიცია, რაც გუშინ უკვე დააფიქსირა, ამ შემთხვევაში გართულდება ეს პროცესი. ჩვენ კიდევ ერთხელ ვაფიქსირებთ მზაობას და ღიაობას დისკუსიისთვის. რაც შეეხება სანქციების თემას, კიდევ ერთხელ ვიტყვი, რომ ეს არის აბსოლუტურად არასერიოზული, მით უმეტეს იმის გათვალისწინებით, რომ ბიძინა ივანიშვილის მიმართ დღესაც მოქმედებს დე-ფაქტო სანქციები.

რუსთავი 2, მარიამ კოპალეიშვილი – თქვენ ხშირად საუბრობთ ხოლმე გარკვეული ჯგუფის ინტერესებზე ქვეყანაში მიმდინარე პოლიტიკური პროცესების პარალელურად და ხშირად ახსენებთ „გლობალური ომის” პარტიას. ხომ არ ფიქრობთ, რომ სწორედ მიმდინარე პროცესების პარალელურად, თქვენ უნდა უთხრათ საზოგადოებას მეტი დეტალი, ვის გულისხმობთ „გლობალური ომის” პარტიაში, როგორია მათი ინტერესები და რა არის მათი რეალური მოტივაცია.
პრემიერ-მინისტრი – რამდენიმე დღის წინ მე ვთქვი, რომ გამიჭირდება ამ სუბიექტების დაკონკრეტება. რა თქმა უნდა, დღესაც ვერ შევცვლი პოზიციას გამომდინარე იქიდან, რომ ამ სუბიექტების დაკონკრეტებამ შეიძლება უარყოფითი გავლენა იქონიოს ჩვენი ეროვნული უსაფრთხოების ინტერესებზე. მე დავაკონკრეტე ასევე, რომ აქ არ ვგულისხმობ ევროკავშირსა და აშშ-ს. პირიქით, ევროკავშირი არის სწორედ მთავარი მსხვერპლი, თუმცა, აქვე ვიტყვი იმასაც, რომ გლობალური ომის პარტიას აქვს გადამწყვეტი, ასე ვთქვათ, კრიტიკული გავლენა ოფიციალურ სტრუქტურებზე როგორც აშშ-ში, ასევე ევროკავშირში, რაც არის ძალიან სამწუხარო მოვლენა. განსაკუთრებით ადვილია ევროკავშირის ოფიციალურ სტრუქტურებზე გავლენის მოპოვება გამომდინარე იქიდან, რომ ევროკავშირში გადაწყვეტილებები არსებითად მიიღება სრული კონსენსუსით 27 ქვეყნის მიერ. შესაბამისად, იქ საკმარისია გლობალურმა ომის პარტიამ გავლენა მოახდინოს თუნდაც ერთ ქვეყანაზე და უკვე ის განაპირობებს ისეთ გადაწყვეტილებას, რომელიც შედის მის ინტერესებში. კიდევ ერთხელ გავიმეორებ, რომ დაკონკრეტება გამიჭირდება, თუმცა გავლენების მასშტაბი არის ძალიან დიდი და ვიტყვი, რომ ოფიციალურ სტრუქტურებზე აქვთ სერიოზული გავლენა როგორც ერთი, ისე მეორე მიმართულებით, ანუ საუბარია აშშ-სა და ევროკავშირზე, რაც არის ძალიან სამწუხარო მოვლენა. მე მაქვს დიდი იმედი, რომ სამომავლოდ ეს ვითარება თვისებრივად შეიცვლება და მაქსიმალურად გათავისუფლდება როგორც აშშ, ისე ევროკავშირი გლობალური ომის პარტიის გავლენებისგან.

ტვ პირველი, რუსუდან დუმბაძე – პირველ რიგში, მინდა გკითხოთ ძალადობაზე. თქვენ რამდენიმე დღის წინაც თქვით, რომ შინაგან საქმეთა სამინისტროს ექნებოდა სათანადო რეაქცია და რეაგირება ძალადობაზე და დღეს დასაწყისიდანვე ამბობთ, რომ შედარებით მშვიდობიანია ბოლო დღეებში საპროტესტო აქციები. თუმცა არ შეცვლილა მეთოდები, რომლებსაც სპეცრაზმელები იყენებენ მოქალაქეების წინააღმდეგ. რას ვხედავთ, – თქვენგან განსხვავებული აზრის მქონე ოპოზიციის წარმომადგენლებზე თუ მომიტინგეებზე მოძალადეები ამ დრომდე დასჯილები არ არიან და დღეს დილით უკვე სპეცრაზმელები მოქალაქეებს აკავებდნენ. ეს არ იყო მხოლოდ დაკავება, ერთ წრეში აქცევდნენ მოქალაქეებს, ურტყამდნენ, კადრები გავრცელდა, თქვენ, არ ვიცი, გაქვთ თუ არა ნანახი, რომ ძირს წაქცეულ ადამიანს რამდენიმე ურტყამს. რამდენად შეიძლება, რომ სათანადო და პროპორციული იყოს რეაგირება შინაგან საქმეთა სამინისტროს მხრიდან და რამდენად სანდოა თქვენი სიტყვები, რომ რეაგირება იქნება სათანადო.
პრემიერ-მინისტრი – სამწუხაროა ინციდენტები, რომლებიც ხდება, მიუხედავად იმისა, რომ ეს ინციდენტებიც კი შეესატყვისება ამერიკულ და ევროპულ სტანდარტებს. შემიძლია გაჩვენოთ ვიდეოები, რა ხდება ნიუ-იორკში, როტერდამში, ბერლინში ან პარიზში. ამერიკული სტანდარტი არის ამაზე დაბალი, ჩვენ გვინდა ამერიკულზე და ევროპულზე მაღალი სტანდარტი. მე არ მომწონს ეს სტანდარტი, რადგან „ქართულმა ოცნებამ” ქვეყანაში 2012 წლიდან დაამკვიდრა ამერიკულზე და ევროპულზე მაღალი სტანდარტი. ამიტომ, ძალიან არ მომწონს ეს ინციდენტები და კიდევ ერთხელ მოვუწოდებ ყველას, მაქსიმალური მოთმინებით შეხვდნენ ნებისმიერ პროვოკაციას. მე ეს არ მომწონს, მიუხედავად იმისა, რომ შესატყვისობაშია ამერიკულ და ევროპულ სტანდარტებთან. სადაც იქნება სამართალდარღვევა, აუცილებლად იქნება შესაბამისი რეაგირებაც.

ტვ პირველი, რუსუდან დუმბაძე – სამართალდარღვევად შეფასდება ეს კადრები, მაგალითად, როდესაც მოქალაქეს უსწორდება სპეცრაზმი?
პრემიერ-მინისტრი – ამას შესაბამისი სტრუქტურები დაადგენენ. ეს არ არის საქართველოს მთავრობის გადასაწყვეტი, რა არის სამართალდარღვევა და რა არა. სამართლებრივი სტანდარტების შესაბამისად მიიღება ყველა გადაწყვეტილება. ყველა მიმართულებით ჩვენ გვაქვს ჩვენი ოპონენტებისგან განსხვავებით ერთმაგი სტანდარტი და არა ორმაგი სტანდარტი. სადაც არის სამართალდარღვევა, ყველგან უნდა იყოს რეაგირება. ჩვენი ოპონენტებისგან განსხვავებით, რომლებიც ვერ ხედავენ ძალადობას ან იწონებენ ძალადობას ერთ მხარეს, ჩვენ არც ერთ მხარეს არ ვიწონებთ ძალადობას და ყველა მიმართულებით აუცილებელია ძალადობაზე სათანადო სამართლებრივი რეაგირება.

ტვ პირველი, რუსუდან დუმბაძე – თუმცა, რამდენიმე დღის წინ, თქვენ ასევე მედიასთან შეხვედრის დროს გითხრეს, რომ თქვენ არა ხართ მონიტორი, რომელმაც შეიძლება მოიწონოთ ან არ მოიწონოთ ძალადობა. თქვენ ან უნდა აღკვეთოთ, ან შესაბამისი რეაგირება გქონდეთ. დღეს უკვე ერთი დღეა გასული, დღეს დილით გადაღებულია ეს კადრები. დაისჯებიან თუ არა პოლიციელები, ვინც ძალადობენ. შეგიძლიათ ეს მკაფიო გზავნილი გაუგზავნოთ შსს-ს.
პრემიერ-მინისტრი – გახსოვთ, შარშან რა მასშტაბის იყო ძალადობა, რომელსაც, მათ შორის, თქვენი ტელევიზიები, თქვენი პარტიები ახალისებდნენ, და ამ უდიდესი მასშტაბის ძალადობის მიუხედავად, მხოლოდ ერთი ადამიანი იყო დაჭერილი. ჩვენ გვაქვს, მათ შორის, გამოძიების ძალიან მაღალი სტანდარტი. ამიტომ, ყველამ კეთილი უნდა ინებოს და დაიცადოს, ვიდრე სამართლებრივი პროცედურებით დადგინდება სიმართლე ყველა საქმესთან დაკავშირებით. სათანადო ვადებში გაკეთდება ყველაფერი. კიდევ ერთხელ მოგიწოდებთ, – სადაც არის ძალადობა, გქონდეთ შესაბამისი რეაქცია, ნუ იმოქმედებთ ორმაგი სტანდარტით და დაელოდეთ სამართლის აღსრულებას ყველა მიმართულებით.

ტვ პირველი, რუსუდან დუმბაძე – რამდენიმე დღეა გასული, მათ შორის, იმ მოქალაქეებზე ძალადობიდან, რომლის ფაქტებსაც ვხედავდით გვიან ღამით რამდენიმე დღის განმავლობაში და ჩვენ არ გვინახავს შსს-ს რეაგირება.
პრემიერ-მინისტრი – გამოძიება არის დაწყებული მთელ რიგ საქმეებზე. რაც შეეხება დაკავებას, დაკავებას სჭირდება თავისი საფუძვლები და, როგორც ჩანს, ამ შემთხვევაში დაკავების საფუძველი არ არსებობდა. გამოძიებას აქვს თავისი პროცედურები, ვადები და დაელოდეთ. ყველაფერი ხდება სამართლებრივი პროცედურების შესაბამისად. ერთადერთი, რასაც მოგიწოდებდით, არის ის, რომ ორივე მიმართულებით გქონდეთ თანაბარი რეაგირება ძალადობაზე. ერთი მხრივ, გმირად გყავთ გამოცხადებული ადამიანი, რომელიც ცოცხლად წვავდა პოლიციელს და, მეორე მხრივ, თმის მოქაჩვაზე გაქვთ ამხელა რეაქცია. შეიძლება, იყო უფრო მძიმე ინციდენტებიც, მაგრამ ერთ მხარეს როცა არის პოლიციელის ცოცხლად დაწვის მცდელობა, და ამას იწონებთ, და მეორე მხარეს ათჯერ მცირე ხარისხის ინციდენტებზე გაქვთ ასეთი რეაგირება, ეს ნიშნავს იმას, რომ ხართ უკიდურესად მიკერძოებული.

ტვ პირველი, რუსუდან დუმბაძე – ბოლო კითხვას დაგისვამთ ო’ბრაიენის ვიზიტთან დაკავშირებით. „იმედმა” გაავრცელა ინფორმაცია, რომ ის ჩამოდის ბიძინა ივანიშვილის სანქცირების პაკეტით, თუმცა, თქვენ ამბობთ, რომ კანონპროექტი მაინც იქნება მიღებული. ივანიშვილის დასანქცირება პოტენციურად არ არის საფუძველი თქვენთვის, რომ უკან გაიწვიოთ?
პრემიერ-მინისტრი – პირველ რიგში, თავად ბიძინა ივანიშვილს არ აინტერესებს ეს საკითხი გამომდინარე იქიდან, რომ მიიჩნევს ამ საკითხს არასერიოზულად. მე ეს შემიძლია გითხრათ. რაც შეეხება კონკრეტულად ო’ბრაიენის ვიზიტს, შემიძლია დაგიდასტუროთ, რომ იყო ბიძინა ივანიშვილის მიმართ თხოვნა შეხვედრასთან დაკავშირებით, რაზეც ბიძინა ივანიშვილმა უარით უპასუხა. ამას ჰქონდა თავისი ახსნა და განმარტება. გარდა ამისა, მინდა გითხრათ, რომ იყო გასული თვეების განმავლობაში შემთხვევები, როდესაც სხვა უცხოელ დიპლომატებსა და პოლიტიკოსებსაც უთხრა უარი ბიძინა ივანიშვილმა შეხვედრასთან დაკავშირებით. ამაზე მე მაქვს ინფორმაცია გამომდინარე იქიდან, რომ მე მიწევდა გარკვეული საკითხების შეთანხმება, მე მთხოვდნენ ხოლმე ამ საკითხების შეთანხმებას. ყველა შემთხვევაში უარის მიზეზი იყო ერთი და იგივე. ბიძინა ივანიშვილი აცხადებდა იმას, რომ ის ისედაც არის დე ფაქტო სანქციების ქვეშ, მას აქვს გაყინული 2 მილიარდი დოლარი, რომელიც მან დასავლეთს მიანდო, მაგრამ აღმოჩნდა გლობალური ომის პარტიის ხელში. ბიძინა ივანიშვილის პოზიციაა, რომ შანტაჟის ქვეშ ის ვერავითარ შეხვედრას ვერ გამართავს. ეს არის მისი ძალიან მკაფიო პოზიცია. როგორც კი დასრულდება ეს შანტაჟი და დე ფაქტო სანქციები, მაშინვე, რა თქმა უნდა, ნებისმიერი შეხვედრა შეიძლება შედგეს. მაგრამ დღეს ეს არის ბიძინა ივანიშვილის პოზიცია ამ თემასთან დაკავშირებით. აქედან გამომდინარე, ასეთი შანტაჟი, მუქარები, როგორც არ ჭრიდა ეს შანტაჟი და მუქარა 2022 წლის მარტიდან, როცა მას გაუყინეს თანხები უკრაინაში ომის დაწყების შემდეგ, ასევე ვერ გაჭრის მასზე ასეთი შანტაჟი და მუქარა ვერც ახლა, ანუ ვერავინ ვერ გადაადგმევინებს ბიძინა ივანიშვილს სახელმწიფოს საწინააღმდეგო ნაბიჯებს, ვერავითარი შანტაჟის და მუქარის პირობებში. სანქცია თავისთავად ხომ შანტაჟს ნიშნავს, თავისთავად სანქცია შეიცავს შანტაჟს და მუქარას. ამიტომ, ეს არ არის სერიოზული თემა ამ ყველა გარემოების გათვალისწინებით.

საზოგადოებრივი მაუწყებელი, სალომე ქოქიაშვილი – პირველ რიგში, მაინტერესებს კანონპროექტთან დაკავშირებით. თუკი, მაგალითად, ერთ-ერთი გზა შეიძლება იყოს იგივე პრეზიდენტის ვეტოს თანდართული მოტივირებული შენიშვნების გაზიარება, ამავე დროს ხომ არ უნდა ველოდოთ, მაგალითად, კანონპროექტში ვენეციის კომისიის რეკომენდაციების ასახვას, და მინდა გკითხოთ ქუჩაში მიმდინარე პროცესებთან დაკავშირებით. გარდა იმისა, რომ ორი კვირის განმავლობაში ჩვენ გვესმოდა, მაგალითად, ცალკეული ოპოზიციონერების მხრიდან, რომ იგრძნობოდა ერთგვარი ვარდების რევოლუციის სულისკვეთება, ხშირად იყო მინიშნებები თბილისურ მაიდანზე და ა.შ., დღეს დილით გაავრცელა შსს-მ ინფორმაცია იმის თაობაზე ასევე, რომ დაკავებულთა შორის არიან რუსეთის ერთი და აშშ-ს ორი მოქალაქე, ამავე დროს სოციალურ ქსელში ვრცელდებოდა ინფორმაცია, რომ ეს ადამიანები არიან „აკერმანის”, ასე ვთქვათ, ინსტრუქტორები. თუ შეგიძლიათ ამ თემაზე უფრო მეტი გვითხრათ და როგორ გესახებათ სიტუაციიდან გამოსავალი. ვხედავთ, რომ პროტესტი არის უწყვეტი, სტუდენტების ნაწილი უარს ამბობს აუდიტორიებში შესვლაზე. ამ სიტუაციის განმუხტვა როგორ გესახებათ.
პრემიერ-მინისტრი – დაკავებული ამერიკელების თემაზე მე შეგნებულად ავარიდებ თავს პასუხის გაცემას, ეს ერთი. რაც შეეხება კანონპროექტის განხილვას, ჩვენ გვაქვს 14 დღე, ორი კვირა. თუ ამ ორი კვირის განმავლობაში, ეს არის მკაცრად, კონსტიტუციით განსაზღვრული პროცედურა, იქნება წარმოდგენილი ვენეციის კომისიის, ოდირის, ნებისმიერი სუბიექტის მხრიდან სამართლებრივი არგუმენტები კანონპროექტთან დაკავშირებით, ჩვენ ვართ აბსოლუტურად ღია დისკუსიისთვის. მთავარია, რომ მოვისმინოთ ახლა მაინც სამართლებრივი არგუმენტები. დღემდე ვერც ერთი სამართლებრივი არგუმენტი ვერ იქნა წარმოდგენილი კანონპროექტის შესახებ. თუ ახლა მაინც მივიღებთ რაიმე სამართლებრივ არგუმენტს, ნებისმიერ ასეთ არგუმენტს გპირდებით, გამოვეკიდებით, ოღონდ რამე მოვისმინოთ, რამე სამართლებრივი არგუმენტი მოგვაწოდონ და აუცილებლად გავიზიარებთ, თუ იქნება დასაბუთებული სამართლებრივი შენიშვნა. დაველოდოთ, 14 მაისიდან 28 მაისამდე არის დრო ამისათვის. რაც შეეხება თბილისის სამოქალაქო ომს, მაიდანს და ა.შ. და ამის გახსენებას, რა თქმა უნდა, საქართველოში ეს სცენარი ვერ შედგება, ამის არავითარი რესურსი არა აქვს იმ პოლიტიკურ უმცირესობას, რომელიც არის, ყველაფერთან ერთად, აბსოლუტურად დისკრედიტირებული, ნული კოორდინაცია, სრული დისკრედიტაცია, ეს არის საერთო სურათი რადიკალურ ოპოზიციაში. ასეთ ვითარებაში, რა თქმა უნდა, ვერავითარი მაიდანი და ამ ქვეყნის უკრაინიზაცია ვერ შედგება. ეს არ არის იანუკოვიჩის უკრაინა, მინდა შეგახსენოთ, ეს არის წელში გამართული სუვერენული სახელმწიფო, რომელსაც შეუძლია რეაგირება ძალადობის ნებისმიერ მცდელობაზე. შესაბამისად, საქართველოში უკრაინული სცენარი არ შედგება. აქვე მინდა შეგახსენოთ, როცა მაიდანს გვახსენებენ, თუ რა იყო მაიდნის გაგრძელება, ეს იყო, საბოლოო ჯამში, ერთი და მეორე ომი. პირველი ომის შედეგად უკრაინამ დაკარგა თავისი ტერიტორიების 8 %, ამას მოჰყვა მეორე ომი და ზემოდან კიდევ 12 %-ის დაკარგვა. ეს არის უმძიმესი შედეგები, რაც მიიღო უკრაინამ ამ პროცესებიდან, მაიდნიდან, პირველ რიგში. ჩვენს ქვეყანაში ამას არ დავუშვებთ, მით უმეტეს მაშინ, როცა ეს ძალადობრივი პოლიტიკური გაერთიანება, პოლიტიკური უმცირესობა ცდილობს, რომ ასეთი სცენარი განახორციელოს.

საზოგადოებრივი მაუწყებელი, სალომე ქოქიაშვილი – სიტუაციის განმუხტვა როგორ გესახებათ საბოლოოდ?
პრემიერ-მინისტრი – კანონს მივიღებთ და ყველა დაინახავს, რომ სიტუაცია, რა თქმა უნდა, თავისით განიმუხტება. ეს არის მაქსიმალური მცდელობა, რაღაც ერთგვარ ვაბანკზე მიდიან პოლიტიკური უმცირესობის წარმომადგენლები, კანონი იქნება მიღებული და ამის შემდეგ უკვე ყველა გადავალთ ზაფხულის და შემდეგ საარჩევნო რეჟიმზე. მარტივად წავა ეს პროცესები. აქვე მინდა შეგახსენოთ, არჩევნები საქართველოში ტარდება ოქტომბრის ბოლოს. თუ დარწმუნებული არ არიან, რომ აგებენ ამ არჩევნებს, მაშინ რა ანერვიულებთ, მოიგონ არჩევნები, ერთ თვეში, ერთ კვირაში შეუძლიათ შეცვალონ ეს კანონი. აქედანაც ჩანს, რომ რეალურად არჩევნების არავითარი იმედი არა აქვს ამ რადიკალურ ოპოზიციას. იმ პირობებში, როდესაც ჩვენ არჩევნებს მოვიგებთ, კიდევ ერთხელ ხომ დადასტურდება ასევე ის, რაც ვთქვი, რომ ამ ქვეყანაში 60%-ზე მეტი უჭერს მხარს უშუალოდ კანონს „უცხოური გავლენის გამჭვირვალობის შესახებ”. ზოგადად, NGO-ების გამჭვირვალობას მხარს უჭერს საქართველოში 80%-ზე მეტი. ამას აჩვენებს სოციოლოგიური კვლევა. იმ პირობებშიც კი, როცა უცხოელები გვეუბნებიან, რომ არ უნდა მივიღოთ და ა.შ., მოსახლეობის 61% უჭერს მხარს კანონს „უცხოური გავლენის გამჭვირვალობის შესახებ”. ასეთ პირობებში, რა თქმა უნდა, ვერავითარი რადიკალური ოპოზიცია, პოლიტიკური უმცირესობა ვერ აიძულებს საქართველოს პარლამენტს, გადადგას ისეთი ნაბიჯი, რომელიც ეწინააღმდეგება ამ ქვეყნის ეროვნულ ინტერესებს. აქედან გამომდინარე, სცენარი არის ძალიან მარტივი. ეს ქვეყანა აუცილებლად დამშვიდდება, უფრო მეტიც, ჩვენ ყოველთვის ვახერხებდით ხოლმე პერიოდულად ამ ქვეყნის დამშვიდებას, მაგრამ ერთხელ კიდევ მინდა შეგახსენოთ, – 2016 წლიდან მოყოლებული გვქონდა ერთადერთი მშვიდი წელი, 2017 წელი. დანარჩენი, ყოველ წელს, ჩვენ გვქონდა ე.წ. პოლარიზაციის, რადიკალიზმის გაღვივების, რევოლუციის მოწყობის გამუდმებული მცდელობები. ამ კანონის მთავარი მიზანი არის ის, რომ ეს ყველაფერი ჩავაბაროთ წარსულს. პირველ რიგში, ეს კანონი ემსახურება სწორედ ევროკავშირის მიერ განსაზღვრული ნომერ პირველი დავალების შესრულებას, ესაა დეპოლარიზაცია, და გაუმჭვირვალე ფული ემსახურება სწორედ პოლარიზაციის ხელოვნურად გაღვივებას. თუ ჩვენ ნამდვილად გვინდა დეპოლარიზაცია ჩვენს ქვეყანაში, ამ შემთხვევაში აღნიშნული კანონის მიღებას ალტერნატივა არა აქვს. ერთხელ და სამუდამოდ უნდა შევქმნათ ისეთ გარემო ამ ქვეყანაში, როდესაც აღარავინ ფიქრობს ასეთი ტიპის სცენარებზე, რევოლუციებზე, მაიდანსა და ა.შ., და ამის საფუძველზე, შემდეგ, მეორე ფრონტის გამოწვევაზე. არავის მივცემთ ამის საშუალებას, საქართველო არის ღირსეული, სუვერენული, დამოუკიდებელი სახელმწიფო, რომელიც ბოლომდე დაიცავს საკუთარ ეროვნულ ინტერესებს.

ფორმულა, სოფო ვარდიაშვილი – ბატონო ირაკლი, გერმანიის პარლამენტის საგარეო ურთიერთობათა კომიტეტის თავმჯდომარის ვიზიტი იმართება საქართველოში და დღეს მან პირდაპირ თქვა, რომ კანონის მიღება შეაფერხებს მოლაპარაკებების ეტაპზე საქართველოს გადასვლას. პირდაპირ მიანიშნებენ ისინი საფრთხეებზე. შალვა პაპუაშვილმა განაცხადა, რომ არ შეხვდება, თუმცა, ბოლო წუთამდე არ იყო გამართული კომუნიკაცია, შეხვდება თუ არა ვინმე „ქართული ოცნების” წარმომადგენელი. ასევე ვნახეთ „ხალხის ძალის” განცხადება, რომ საგარეო საქმეთა მინისტრები ჩამოდიან და არ უნდა შემოვუშვათ ისინი, რადგან ქვეყნის სუვერენიტეტში ერევიან არასწორად. ის, რომ ღია ტექსტით გვეუბნებიან, რომ ამ კანონის მიღება შეაფერხებს მოლაპარაკებების ეტაპზე ქვეყნის გადასვლას. რატომ არ არის ეს განცხადებები საკმარისი? როთის დელეგაციის წევრებს გაუჩნდათ განცდა, რომ საქართველო პარტნიორებთან ამგვარი დამოკიდებულებით ერთგვარად ცვლის დასავლურ კურსს.
პრემიერ-მინისტრი – ამ დელეგაციაში წარმოდგენილია ორი დეპუტატი, რომლებთან შეხვედრაც, ზოგადად, აზრს მოკლებული მგონია მათი წარსული საქმიანობიდან გამომდინარე. ეს გამოცდილება გვაქვს ჩვენ ამ ორ ადამიანთან მიმართებით. რაც შეეხება პარტნიორებს, საქართველოში მომდევნო დღეების განმავლობაში გვექნება ვიზიტები. ხვალ მე პირადად, ისევე როგორც პარლამენტის თავმჯდომარეს, სხვა მაღალი თანამდებობის პირებს, გვაქვს შეხვედრები ბატონ ო’ ბრაიენთან, რომელიც ამ ვიზიტის ფარგლებში ამერიკის სახელმწიფოს წარმოადგენს. ასევე, ზეგ ჩვენ გვექნება შეხვედრები ოთხ საგარეო საქმეთა მინისტრთან. აქედან ჩანს ჩვენი დამოკიდებულება პარტნიორების მიმართ. ჩვენი სურვილია, გვქონდეს მუდმივი დიალოგი ჩვენს ამერიკელ და ევროპელ პარტნიორებთან. მთავარია, დავინახოთ სათანადო, სამართლიანი, ღირსეული დამოკიდებულება ჩვენი ქვეყნის მიმართ. ჩვენი დამოკიდებულება ჩვენი პარტნიორებისადმი ყოველთვის ასეთია, ყოველთვის ეფუძნება ღირსებას, სამართლიანობას, სწორ მიდგომებს. მთავარია, ასეთივე დამოკიდებულება დავინახოთ ჩვენი პარტნიორების მხრიდან. რაც შეეხება მოლაპარაკებების არგახსნით შანტაჟს, ეს არის აბსოლუტურად მიუღებელი. მინდა შეგახსენოთ, რომ, ზოგადად, ევროკავშირში ინტეგრაცია ბევრი საფეხურისგან შედგება. მაგალითად, მოლდოვასა და უკრაინასთან მიმართებით მიიღეს გადაწყვეტილება მოლაპარაკებების გახსნის თაობაზე, მაგრამ დღემდე ფაქტობრივად მოლდოვასა და უკრაინასთან მოლაპარაკებები გახსნილი არ არის. მოლაპარაკებების გახსნის დოკუმენტაცია მოლდოვასა და უკრაინას ჯერ არ გადასცემია. მხოლოდ პოლიტიკური გადაწყვეტილებაა მიღებული, მაგრამ რეალურად არ არის გახსნილი მოლაპარაკებები. არის უამრავი საფეხური, რომლისგანაც შედგება ევროინტეგრაციის პროცესი. ყოველ ჯერზე ვიღაც თუ ეცდება, თითოეული ეს საფეხური გამოიყენოს ხალხის და ხელისუფლების მიმართ შანტაჟისთვის, ეს არ არის ღირსეული საქციელი, ეს არ არის ევროპული საქციელი. ჩვენ ეს გამოვიარეთ უკვე 2022 წლის ივნისში, როდესაც ქვეყანას აბსოლუტურად დაუსაბუთებლად, ყოველგვარი ახსნა-განმარტების გარეშე უარი ეთქვა კანდიდატის სტატუსზე. ხომ არავითარი დასაბუთება არ მოგვისმენია დღემდე ამასთან დაკავშირებით. რეალურად მოხდა რა, – გლობალურმა ომის პარტიამ გავლენა იქონია მაშინ შესაბამის გადაწყვეტილებაზე და სცადეს ეს გამოეყენებინათ საქართველოში რევოლუციის მოსაწყობად. მაშინ ეს NGO-ები ავიდნენ პოლიტიკურ სცენაზე და პირდაპირ მოითხოვეს მთავრობის გადადგომა სწორედ ამ უსამართლო გადაწყვეტილების საფუძველზე. ეს გამოვლილი გვაქვს. საბოლოო ჯამში, არ მოგვენიჭა სტატუსი 2022 წელს, მაგრამ მოგვენიჭა 2023 წელს. აქ ეს შანტაჟი მოლაპარაკებების გახსნა-არგახსნით არის აბსოლუტურად უადგილო და უაღრესად არაევროპული და უღირსი საქციელი, პირდაპირ შემიძლია გითხრათ. ყოველ ჯერზე – კანდიდატის სტატუსს არ მოგცემ, შანტაჟია. რატომ ეთამაშებიან ასე ქართველ ხალხს? არასწორია. ქართველი ხალხი იმსახურებს ღირსეულ დამოკიდებულებას. როდესაც 2022 წლის ივნისში არ მოგვენიჭა სტატუსი ყოველგვარი დასაბუთების გარეშე, ეს იყო სწორედ ასეთი უღირსი თამაში. ხომ არ მოგისმენიათ არავითარი დასაბუთება, რატომ არ მოგვენიჭა კანდიდატის სტატუსი 2022 წლის ივნისში. ეს არ არის სწორი დამოკიდებულება ქართველი ხალხის მიმართ, ხალხის მიერ დემოკრატიულად არჩეული ქართული ხელისუფლების მიმართ. 2022 წლის ივნისში არავითარი რეკომენდაციების შესრულებაზე საუბარი არ ყოფილა. უბრალოდ, უხეშად გვითხრეს უარი კანდიდატის სტატუსზე ყოველგვარი დასაბუთების გარეშე, ყოველგვარი წინასწარი მოთხოვნების დაყენების გარეშე. ეს არის უხეში და უღირსი დამოკიდებულება ქართველი ხალხის მიმართ.

ტელეკომპანია „ფორმულა”, სოფო ვარდიაშვილი – თქვენ თქვით, რომ გაიმარჯვონ არჩევნებში და გააუქმონ კანონი. თუ არსებობს შემოთავაზება, რომ გადაიდოს კანონის ამოქმედება.
პრემიერ-მინისტრი – ეს ხომ აბსურდია. გაიმარჯვონ და გააუქმონ, რა განსხვავებაა. ნოემბერში უკვე შეუძლიათ ამ კანონის გაუქმება. თვითონაც იციან, რომ ხალხის მხარდაჭერა არის „ქართული ოცნების” მხარეს. ხალხის მხარდაჭერა არის, მათ შორის, ამ კანონის მხარეს. ამიტომ, არ აქვთ არავითარი იმედი, რომ შეუძლიათ ამ არჩევნებში გამარჯვება და ამიტომ ითხოვენ ამ კანონის ამოქმედების გადავადებას. სინამდვილეში, ერთადერთი ამოცანა უნდა ჰქონდეთ მათ – წარმოადგინონ სამართლებრივი არგუმენტები კანონთან დაკავშირებით, – ნული არგუმენტი. ვერც ექნებათ ვერავითარი ობიექტური არგუმენტი ამ კანონთან დაკავშირებით, მაშინ, როდესაც, ეს კანონი ითვალისწინებს ერთადერთ რამეს – წელიწადში ერთხელ NGO-მ უნდა შეიტანოს თავისი დეკლარაცია, მეტი არაფერი არ წერია. დანარჩენი არის ტექნიკური ნორმები. ექვსი გვერდია სულ, აქედან ეს არის მთავარი რეგულაცია, დანარჩენი არის ამ ყველაფრის ტექნიკური შევსება. როდესაც მეტს არაფერს ითვალისწინებს ეს კანონი, როგორ შეიძლება, გქონდეს რაიმე არგუმენტი გამჭვირვალობის წინააღმდეგ, იმის წინააღმდეგ, რომ თავისი ფული საიდან მოაქვთ და სად იხარჯება, ის დაადეკლარირონ ენჯეოებმა, ამაზე ხომ ვერ იქნება ვერცერთი სამართლებრივი არგუმენტი. ჩვენ დაველოდებით ვეტოს პროცედურას 14-დან 28 მაისის ჩათვლით, შეუძლიათ მოგვაწოდონ ნებისმიერი სამართლებრივი კომენტარი, შენიშვნა და მზად ვართ დისკუსიისთვის. დანარჩენს შევხედავთ.

ევრონიუს ჯორჯია – რამდენჯერმე ახსენეთ დღეს აპრილში ჩატარებული კვლევა. თუ შეგიძლიათ მეტი რომ გვითხრათ ამ კვლევაზე – ვინ გამოკითხა, რამდენი ადამიანი გამოიკითხა, რეგიონების მიხედვით იყო, თბილისში მხოლოდ, ცდომილება რამდენი არის ან მოგვაწოდონ ეს კვლევა მთავრობის ადმინისტრაციის თანამშრომლებმა, ან, თუ შეგიძლიათ, თქვენ რომ გვიპასუხოთ ახლა.
პრემიერ-მინისტრი – მოკლე ინფორმაცია რაც შემიძლია მოგცეთ, აპრილის ბოლოს ჩატარდა. გამოიკითხა 2 ათასი რესპონდენტი, ჩატარდა ყველა შესაბამისი მეთოდოლოგიური მოთხოვნის შესაბამისად, მაღალი კვალიფიკაციის მქონე ორგანიზაციის მიერ და ეს არის საერთო სურათი.

ევრონიუს ჯორჯია – რომელი ორგანიზაცია იყო?
პრემიერ-მინისტრი – ჩვენ არ ვაზუსტებთ ხოლმე. ეს არ არის მთავრობის დაკვეთით ჩატარებული კვლევა. ეს არის „ქართული ოცნების” დაკვეთით ჩატარებული კვლევა. თუმცა, ეს არის დამოუკიდებელი კვლევითი ორგანიზაცია, რომელმაც ეს კვლევა ჩაატარა. ეს არის მაღალი კვალიფიკაციის მქონე ორგანიზაცია, რომელიც ყოველთვის ზუსტად პროგნოზირებს ხოლმე, მაგალითად, ჩვენ საარჩევნო შედეგებს. აქედან გამომდინარე, ჩვენ არავითარი საფუძველი არა გვაქვს, რომ რაიმე ეჭვი შევიტანოთ ამ კვლევის სისწორეში. კიდევ ერთხელ გავიმეორებ, 80 პროცენტზე მეტი მხარს უჭერს ზოგადად არასამთავრობო ორგანიზაციების გამჭვირვალობას, და როცა ჩაეკითხებიან რესპონდენტს, უჭერენ თუ არა ისინი მხარს ამ კანონპროექტს იმ შემთხვევაში, მაგალითად, აშშ და ევროკავშირი ითხოვენ ამ კანონის არმიღებას, ამ შემთხვევაში, დაახლოებით 20 პროცენტით მცირდება მხარდაჭერა და ზუსტად 61 პროცენტი ფიქსირდება მხარდაჭერა.

ევრონიუს ჯორჯია – რამდენი დღის განმავლობაში მიმდინარეობდა ეს კვლევა, ვიცით?
პრემიერ-მინისტრი – დაახლოებით ორკვირიანი ველი იყო. ეს დეტალები მეორეხარისხოვანია. მე გეუბნებით, რომ ჩაატარა მაღალი კვალიფიკაციის მქონე გუნდისგან შემდგარმა ორგანიზაციამ ყველა მეთოდოლოგიური წესის დაცვით, ანუ ყველა შესაბამისი კვლევითი მეთოდის დაცვით არის ჩატარებული.

ევრონიუს ჯორჯია – შარლ მიშელმა „ევრონიუსთან” ინტერვიუში განაცხადა, რომ ის ქვეყნები, რომლებიც რეკომენდაციებს შეასრულებენ, შეძლებენ, რომ ევროკავშირში გაწევრიანდნენ 2030 წლამდე. „ქართულმა ოცნებამ” თქვა, რომ 2030 წელს იქნება საქართველო ევროკავშირის წევრი. ამ მოცემულობით, რას ვაკეთებთ 2030 წლამდე, იმ შემთხვევაში, თუ გაიმარჯვებთ საპარლამენტო არჩევნებში, რას გააკეთებს პარლამენტი, რას გააკეთებენ სამინისტროები? ასევე, 9 რეკომენდაციის შესრულებასთან დაკავშირებით რა პროცესში ვიმყოფებით?
პრემიერ-მინისტრი – 9 რეკომენდაციას რაც შეეხება, იქ არსებითი არის ორი საკანონმდებლო პაკეტის მიღება და ამ კვირაშივე შედგება მეორე მოსმენა, აქედან ორ კვირაში მესამე მოსმენა. შესაბამისად, ეს პაკეტი იქნება მიღებული. დანარჩენ საკითხებზეც გრძელდება მუშაობა. რეალურად, ვიქნებით ბოლომდე პირნათელი ევროკავშირის წინაშე. ეს არის თავისი მოცულობით ბევრად უფრო მცირე მნიშვნელობის საკითხები, ვიდრე იყო 12 პუნქტი. მოცულობა რომ შევადაროთ, არის ათჯერ ნაკლები იმ 12 პუნქტზე, რომელიც მანამდე იყო წარმოდგენილი, რაც ნიშნავს იმას, რომ ის 12 პუნქტი პირნათლად შესრულდა. ახლა ასევე პირნათლად შესრულდება 9 პუნქტიც. დანარჩენი, ეს არის ასოცირების დღის წესრიგით გათვალისწინებული ვალდებულებების შესრულება. აქაც აბსოლუტურად თანამიმდევრულად მივყვებით ამ პროცესს. შესაბამისად, 2030 წლისთვის ჩვენ ბოლომდე გვექნება შესრულებული ასოცირების დღის წესრიგით გათვალისწინებული ყველა პუნქტი და ყველა მიმართულებით გვექნება სანიმუშო პროგრესი. დღესაც, საქართველო არის აბსოლუტური ლიდერი კანდიდატ ქვეყნებს შორის ყველა მიმართულებით, იქნება ეს დემოკრატია, სამართლის უზენაესობა, ადამიანის უფლებები თუ ეკონომიკური განვითარების ტემპი. ლიდერი ვართ აბსოლუტურად ყველა მიმართულებით, თითოეული პარამეტრის მიხედვით. დღეს კანდიდატი ქვეყანაა მაგალითად მოლდოვა და ყველამ ვიცით, რა ვითარებაა მოლდოვაში, – დამოუკიდებელი მედია აღარ დარჩა, პარლამენტში პრაქტიკულად ოპოზიცია აღარ დარჩა, პარტიები არის აკრძალული, ადამიანის უფლებების კუთხით არის მძიმე ვითარება, კორუფციის კუთხით არის უმძიმესი ვითარება მოლდოვაში. ეს არის მოლდოვის მდგომარეობა, რომელიც ფორმალურად, წარმოიდგინეთ, წინ გვისწრებს ევროპის გზაზე, ამხელა პრობლემების მქონე ქვეყანა. მოლდოვას კონკრეტული მიზეზების გამო უფრო მეტად თანაუგრძნობს გლობალური ომის პარტია. სხვა ახსნა არა აქვს, როგორ შეიძლება დსთ-ს წევრი მოლდოვა იყოს საქართველოზე წინ.

მთავარი არხი, ნატაშკა ჯახუტაშვილი – 12 ქვეყნის საგარეო საქმეთა მინისტრი, გაეცნობოდით ამ წერილს, მიმართავს ჯოზეფ ბორელს. ისინი წუხან თბილისში მიმდინარე პროცესების გამო და აცხადებენ, რომ საფრთხეშია დღეს ჩვენი ქვეყნის ევროინტეგრაციის პროცესი, სხვა ჩვენს დასავლელ პარტნიორებსაც იდენტური გზავნილები აქვთ. როგორ შეაფასებდით ამ წერილს და სანქციებს რომ დავუბრუნდეთ, თქვენ პირადად ელოდებით თუ არა, რომ დასავლეთი კონკრეტულად თქვენ დაგასანქცირებთ ან სანქციებს დაუწესებენ იმ დეპუტატებს, რომლებიც საკანონმდებლო ორგანოში მხარს უჭერენ ამ კანონს და ასევე მაინტერესებს, ჯიმ ო’ბრაიენის ვიზიტთან დაკავშირებით, ვრცელდება ინფორმაცია, სამთავრობო არხები ავრცელებენ, რომ მას ჩამოაქვს საქართველოში ბიძინა ივანიშვილის სანქციების პაკეტი და სწორედ ამ თემაზე უნდა ისაუბროს მთავრობის წარმომადგენლებთან.
პრემიერ-მინისტრი – ამ კითხვას არსებითად უკვე ვუპასუხე, სანქციები არის აბსოლუტურად არასერიოზული, მით უმეტეს, სანქციები ბიძინა ივანიშვილის მიმართ, რომელსაც ისედაც აქვს დე ფაქტო სანქციები დაწესებული. კიდევ ერთხელ გავიმეორებ, მან 2 მილიარდი დოლარი მიანდო დასავლეთს, თუმცა, ეს თანხა აღმოჩნდა გლობალური ომის პარტიის ხელში. ანუ, მასზე დე ფაქტო ისედაც მოქმედებს ეს სანქციები. ასეთ ვითარებაში აბსოლუტურად არასერიოზულია საუბარი ბიძინა ივანიშვილის სანქცირებაზე. რაც შეეხება დანარჩენ პოლიტიკოსებს, პირადად მე, დეპუტატებს და ა.შ. ხშირად გვესმის ასეთი განცხადებები. ჩვენთვისაც ზუსტად ისეთივე არასერიოზულია, უფრო არასერიოზულია კიდევ, ვიდრე ბიძინა ივანიშვილისთვის. წარმოიდგინეთ, რომ ბიძინა ივანიშვილს ჰქონდა დასაკარგი 2 მლრდ დოლარი, სასწორზე დადო მან 2 მლრდ დოლარი, ჩვენ არაფერი გვაქვს დასაკარგი ამის მსგავსი. აქედან გამომდინარე, თუ ბიძინა ივანიშვილი გვაძლევს ასეთ მაგალითს, თუ მისთვის არის არასერიოზული საუბარი დე ფაქტო თუ ფორმალურ სანქციებზე, თქვენ წარმოიდგინეთ, მით უმეტეს ჩვენთვის როგორი არასერიოზულია ამაზე საუბარი. ჩვენ ვიბრძვით ჩვენი ქვეყნის დამოუკიდებლობისთვის და სუვერენიტეტისთვის, გრძელვადიანი მშვიდობის, გრძელვადიანი სიმშვიდის უზრუნველყოფისთვის, იმისათვის, რომ ქვეყანას უკრაინის სცენარი ავარიდოთ თავიდან. ამ ქვეყანაში ადამიანები 3 000 წელია თავს წირავენ ქვეყნის დამოუკიდებლობისთვის და ქვეყნის ინტერესებისთვის. ასეთ პირობებში ვიღაცამ ვიზებით დაგაშანტაჟოს ან რაღაცის გაყინვით დაგაშანტაჟოს, ისინი უბრალოდ არ იცნობენ ქართველი კაცის ბუნებას. ვისაც აზრად მოსდის სანქციებით შანტაჟი, ასეთი ადამიანი უბრალოდ არ იცნობს ქართველი კაცის ბუნებას.

პოსტვ, ნუციკო კოროშინაძე – ოპოზიციის მხრიდან უკვე გაისმა მოწოდებები, რომ აქციაზე მთავარი მოთხოვნა არა კანონის უკან გაწვევა, არამედ ხელისუფლების ცვლილება უნდა იყოს და პარალელურად მიხეილ სააკაშვილმა გაავრცელა პოსტი, სადაც ის თანამდებობის გადანაწილებაზე საუბრობს და ასევე ერთიან გეგმაზე. როგორია თქვენი შეფასება ოპოზიციის ამ განცხადებებზე?
პრემიერ-მინისტრი – მე მგონია, რომ ეს არის ერთგვარი ისტერიული განცხადებები, მით უმეტეს იმის გათვალისწინებით, რომ ოქტომბერში, რამდენიმე თვეში ტარდება საპარლამენტო არჩევნები. თუ ხელისუფლების შეცვლა გინდა, კეთილი ინებე და მიიღე ამომრჩევლის მხარდაჭერა. მაგრამ იმ პირობებში, როდესაც არავითარი იმედი არა აქვთ, რა თქმა უნდა, ასეთ ისტერიულ განცხადებებს აკეთებენ. ყველა დაინახავს, რომ შემდეგ არჩევნებში „ქართულ ოცნებას” ექნება უპრეცედენტო მხარდაჭერა. ჩვენ ხომ წინა არჩევნები ძალიან სტაბილურად და მყარად მოვიგეთ, ამაზე ბევრად მაღალ შედეგს დავდებთ ოქტომბრის არჩევნებში. ამას იხილავს ქართული საზოგადოება 26 ოქტომბრის ღამეს.

პოსტვ, ნუციკო კოროშინაძე – ლიეტუვის სეიმის წევრი ჟიგიმანტას პავილიონისი გამჭვირვალობის შესახებ კანონპროექტის საწინააღმდეგო აქციაზე მივიდა, როგორც შეაფასებთ ამ ფაქტს?
პრემიერ-მინისტრი – ეს არის, რა თქმა უნდა, იმის მაჩვენებელი, თუ როგორია ამ ადამიანების დამოკიდებულება ამ სახელმწიფოს მიმართ და მისი სუვერენიტეტის მიმართ. ამდენი ხანი ჩვენ რასაც ვამტკიცებთ, იმის დასტური წარმოადგინა ბატონმა პავილიონისმა. ჩვენ ვამტკიცებთ, რომ ვიღაცებს არ მოსწონთ, გულზე არ ეხატებათ საქართველოს სუვერენიტეტი. როდესაც ამას კადრულობს კონკრეტული ქვეყნის პარლამენტის წევრი, უცხო ქვეყნის წარმომადგენელი პოლიტიკოსი, რომ უხეშად ჩაერიოს ამ ქვეყნის შიდაპოლიტიკურ საქმეებში, ამით ის ხომ ამტკიცებს იმას, რასაც ჩვენ ვამტკიცებდით ამდენი ხნის განმავლობაში, რომ ეს არის მათი დამოკიდებულება, მაგრამ ჩვენ, რა თქმა უნდა, არ ვაპირებთ, რომ ლოიალური დამოკიდებულება გამოვავლინოთ ასეთი ინციდენტების მიმართ, რაც უკავშირდება საქართველოს სუვერენიტეტის მიმართ უხეში დამოკიდებულების გამოვლინებას.

ტვ პირველი, რუსუდან დუმბაძე – „იმედმა” გაავრცელა ინფორმაცია და ზუსტად იცით, რომ სანქციების პაკეტი მოაქვს ო’ ბრაიენს?
პრემიერ-მინისტრი – მე საერთოდ არ ვიცი, რასთან დაკავშირებით მოდის ბატონი ო’ბრაიენი, არანაირი კომუნიკაცია შეხვედრის შინაარსთან დაკავშირებით არ ყოფილა. მე მაქვს მოლოდინი, რომ ბატონი ო’ ბრაიენი ჩამოვა ძირითადად სამი თემით – ეს არის ვიზალიბერალიზაცია საქართველოს მოქალაქეებისთვის, თავისუფალი ვაჭრობის შეთანხმება და პირდაპირი ფრენები. ამის ძალიან დიდი იმედი მაქვს. დიდი მადლობა.