იუსტიციის სახლში ხაშურელებს მიეწოდებათ 500-მდე საზოგადოებრივი მომსახურება, – ამის შესახებ საქართველოს პრემიერ-მინისტრმა ირაკლი კობახიძემ ხაშურის იუსტიციის სახლის გახსნის ღონისძიებაზე სიტყვით გამოსვლისას განაცხადა.
როგორც პრემიერმა აღნიშნა, ეს არის 121-ე იუსტიციის სახლი ქვეყნის მასშტაბით, კონკრეტულად რეგიონში – მე-9 ფილიალი.
„ტრადიციულად, იუსტიციის სახლი ხაშურშიც გამოირჩევა არაჩვეულებრივი არქიტექტურით, დიზაინით. ეს შენობა მომსახურების მიწოდების დროს შესთავაზებს სასიამოვნო გარემოს ხაშურელებს და, რაც მთავარია, იუსტიციის სახლში მათ მიეწოდებათ 500-მდე საზოგადოებრივი მომსახურება უმაღლეს დონეზე, რითაც გამოირჩევა, ზოგადად, იუსტიციის სახლები. ეს არის 121-ე იუსტიციის სახლი ქვეყნის მასშტაბით, კონკრეტულად რეგიონში – მე-9 ფილიალი. იგეგმება ასევე დამატებით 10 იუსტიციის სახლის გახსნა თერჯოლაში, ახმეტაში, საგარეჯოში, ხელვაჩაურში, ასევე თბილისში, გლდანში არის დაგეგმილი იუსტიციის სახლის გახსნა და სოფლებში – ჭალა, ზოტი, ტოლები, შროშა და ცაისი. გრძელდება ეს სამუშაოები იმისთვის, რომ მთელი ქვეყანა იყოს დაფარული შესაბამისი საზოგადოებრივი მომსახურებით. 500-მდე საზოგადოებრივი მომსახურება მიეწოდებათ მოქალაქეებს იუსტიციის სახლებში, აქედან არის 30-ზე მეტი კერძო მომსახურება. იუსტიციის სახლი არის ერთადერთი სივრცე, სადაც ერთმანეთთან შერწყმულია საჯარო და კერძო სერვისები”, – განაცხადა პრემიერმა.
მთავრობის მეთაურმა საქართველოს იუსტიციის მინისტრს, სამინისტროს თანამშრომლებს, ხაშურის იუსტიციის სახლის მშენებლობასა და იუსტიციის სახლების პროექტების განხორციელებაში ჩართულ ყველა პირს მადლობა გადაუხადა. ხაშურის იუსტიციის სახლის გახსნაზე მოწვეულ სტუმრებს სიტყვით მიმართა იუსტიციის მინისტრმა რატი ბრეგაძემ. ღონისძიებას პარლამენტისა და ადგილობრივი ხელისუფლების წარმომადგენლები დაესწრნენ.
0