თურქეთში დაკავებული პირები, რომლებიც ცნობილი ჰოლანდიელი მხატვრის ვან დეიკის ტილოს არალეგალურად გაყიდვას ცდილობდნენ, ქართველები არ არიან.
ინფორმაციას ამის შესახებ შინაგან საქმეთა სამინისტროში ადასტურებენ.
უწყების განმარტებით, თურქეთის რესპუბლიკის ტერიტორიაზე ეთნიკურად თურქი, თურქეთის ორი მოქალაქეა დაკავებულია. გამოძიების ამ ეტაპზე, როგორც დაკავებული პირების, ისე ნივთმტკიცებების საქართველოსთან კავშირი არ ვლინდება.
დღეს თურქული მედიით გავრცელდა ინფორმაცია ორი ბიზნესმენის დაკავების შესახებ, რომლებიც 14-მილიონ აშშ დოლარად შეფასებულ ვან დეიკის ტილოს უკანონოდ გაყიდვას ცდილობდნენ.
ინფორმაციაში აღნიშნული იყო, რომ ტილო ევროპიდან საქართველოში მოხვდა, საიდანაც ხელოვნების ნიმუში თურქეთში კონტრაბანდულად გადაიტანეს.
თურქული მედიის ინფორმაციით, დაკავებული პირები ცდილობდნენ, ცნობილი ჰოლანდიელი მხატვრის ანტონ ვან დეიკის ტილო სტამბოლში გაესაღებინათ.
0