„ქართულ ოცნებას“ და ზოგიერთ პოლიტიკურ ძალას ეშინია, რომ დასავლელი პატრონები ყურს აუწევენ

ნინო ბურჯანაძის განცხადებით, „ქართული ოცნება“ შეგნებულად შლის საპროცედურო კომიტეტის მოსმენებს.

„მინდა გამოვხატო ჩემი უკიდურესი აღშფოთება იმ უმსგავსობასთან დაკავშირებით, რაც მოხდა გუშინ საქართველოს პარლამენტში, საქართველოს პარლამენტის საპროცედურო კომიტეტის სხდომა „ქართულმა ოცნებამ“ და სხვა პოლიტიკურმა ძალებმა, აბსოლიტურად შეგნებულად ჩაშალეს იმ მიზეზით, რომ არ უნდათ მოგვცენ შესაძლებლობა დავიწყოთ ხელმოწერების შეგროვება საქართველოს უბლოკო სტატუსთან დაკავშირებით. ამით პარლამენტარებმა დაარღვიეს კანონი, საქართველოს პარლამენტის რეგლამენტი, რომლის მიხედვითაც დღეს საპროცედურო კომიტეტს ბოლო ვადა ჰქონდა გადაწვეტილების გამოტანისა და ამავდროულად დაარღვია სისხლის სამართლის კოდექსის 161 და 166 მუხლი, სადაც პირდაპირ წერია, რომ პოლიტიკური პარტიის საქმიანობისათვის ხელის შეშლა სისხლის სამართლის დანაშაულია. ჩვენ ხელს გვიშლიან საარჩევნო კამპანიის წარმოებაში, იმიტომ რომ კამპანიის უმნიშვნელოვანესი ნაწილი გახლავთ უბლოკო სტატუსის შესახებ ხელმოწერების შეგროვება, დიახ აუცილებელი იყო რომ ეს ინიციატივა გახმოვანებულიყო სწორედ არჩევნების წინ, რათა მოსახლეობას ზუსტად სცოდნოდა, რომელ პოლიტიკურ ძალას აძლევს ხმას და რას უნდა ელოდოს ის ჩვენგან,“ – განაცხადა ნინო ბურჯანაძემ.

მისი თქმით, სპეკულაციები იმასთან დაკავშირებით, რომ იდეა უბლოკო სტატუსთან დაკავშირებით უნდა გახმოვანებულიყო არჩევნების შემდეგ ეს არის სამარცხვინო უცოდინრობა, როგორც მინიმუმ და არის აბსოლუტური დემაგოგია.

„ჩვენ არ ვაპირებთ ამომრჩევლის მოტყუებას განსხვავებით სხვა პოლიტიკური ძალებისგან, ჩვენ ამომრჩეველს ვეუბნებით იმას, რის გაკეთებასაც ვაპირებთ და არჩევის შემთხვევაში აუცილებლად გავაკეთებთ იმას რასაც ვპირდებით“, – განაცხადა ბურჯანაძემ.

მისივე თქმით, „ქართული ოცნება“ და ცალკეული პოლიტიკური ძალები არიან აბსოლიტურ ისტერიკაში საქართველოს უბლოკო სტატუსის ინიციატივის გამო :

„მათ ძალიან ეშინიათ, რომ დასავლელი პატრონები ყურს აუწევენ იმ შემთხვევაში, თუ ეს ხელმოწერების შეგროვების პროცესი მათი მხრიდან იქნება დაშვებული. მათ ეშინიათ იმიტომ, რომ ამ ინიციატივას მხარს უჭერს ასი ათასობით ადამიანი. თუ ეს ასე არ არის ბატონებო თუ არ გეშინიათ, ჩაატარეთ ელემენტარული პროცედურული სხდომა და მოგვეცით საშუალება დავიწყოთ ხელმოწერების შეგროვება“- განაცხადა „ნინო ბურჯანაძე – დემოკრატიული მოძრაობის“ ლიდერმა.

ნინო ბურჯანაძის განცხადებით, საზოგადოებას უნდა ვკითხოთ, თუ რომელი პოზიციაა მოღალატეობრივი. მუდმივად „ნატოს“ ძახილი, რომელიც პრაქტიკულად გადაწყვეტის შემთხვევაში ქვეყნის გახლეჩვას მოიტანს, იმიტომ რომ რუსეთის ბაზებიანად ნატოში არავინ მიგვიღებს, თუ უბლოკო სტატუსის გამოცხადება და მცდელობა ქვეყნის ტერიტორიიდან რუსული ჯარების გაყვანის.

„ ჩვენი ინიციატივა არის ქვეყნის გამთლიანების ინიციატავა, ეს არის ქვეყნის ტერიტორიიდან რუსული ჯარების გაყვანის რეალური გზა. დანარჩენი საზოგადოებამ გადაწყვიტოს, ქვეყნის ღალატი ის არის, რომ შეეცადო ურთულესი ამოცანის შესრულებას და გაიყვანო რუსული სამხედრო ჯარები ქვეყნის ტერიტორიიდან, თუ ის, რომ კოლაბორაციონიზმიც, დიახ, ოკუპაციასთან შერიგებაც, როდესაც ამ ჯარების გაყვანაზე უარს ამბობ და დიახ, უარს ამბობ ინიციატივაზე რომელიც ამის შანსს იძლევა“-განაცხადა ბურჯანაძემ.

მისი განცხადებით, „ნინო ბურჯანაძე – დემოკრატიული მოძრაობა“ არ აპირებს უარი თქვას ხელმოწერების შეგროვებაზე.

„ჩვენ ვიპოვით პოლიტიკურ და სამართლებრივ გზებს და აუცილებლად დავიწყებთ ამ ხელმოწერების შეგროვებას. გარწმუნებთ, რომ ყველაფერს გავაკეთებთ იმისათვის, რომ საქართველო იყოს დაცული, მთლიანი და საქართველო არ იყოს სხვა სახელმწიფოების ურთიერთდაპირისპირების პოლიგონი. დიახ, ყველაფერს გავაკეთებთ იმისათვის რომ ჩვენი ქვეყნის ტერიტორიაზე ბუნებრივია აფხაზეთის და სამაჩობლო ჩათვლით არ იდგეს არცერთი უცხო სახემწიფოს ჯარი, ჩვენ გავამთლიანებთ ქვეყანას, ჩვენ გავაძლიერებთ ქვეყანას ეკონომიკურად. ამისათის საჭიროა მოსახლეობამ მიიღოს სწორი გადაწყვეტილება მხარი დაგვიჭიროს და შემოხაზოს ნომერი 3“,- განაცხადა ბურჯანაძემ.