„სოფლად მეწარმეობის განვითარების“ პროგრამის ფარგლებში, საბაკალავრო და სამაგისტრო საფეხურის სტუდენტებისთვის კონკურსი გამოცხადდა

პარლამენტის აგრარულ საკითხთა კომიტეტმა, პარტნიორ ორგანიზაციებთან ერთად, „სოფლად მეწარმეობის განვითარების“ პროგრამის ფარგლებში, საბაკალავრო და სამაგისტრო საფეხურის სტუდენტებისთვის კონკურსი გამოაცხადა. პროგრამა პარლამენტის აგრარულ საკითხთა კომიტეტმა, ნიდერლანდების სამეფოს საელჩოსთან, არასამთავრობო ორგანიზაცია CENN-თან და ასოციაცია „ტყის პროდუქტთან“ ერთად წარადგინა. პროგრამის პარტნიორ მხარეებს შორის ურთიერთთანამშრომლობის მემორანდუმის გაფორმების ცერემონია პარლამენტში გაიმართა.

„პროგრამა, რომელსაც ჩვენი პარტნიორი ორგანიზაცია CENN-ის დახმარებით განვახორციელებთ, მიზნად ისახავს აგრარული მიმართულებით სტუდენტების ჩართულობას და გააქტიურებას. მათი მოსაზრებების მიღებას, რათა გამოვავლინოთ საუკეთესოები ტყის არამერქნული რესურსების კომერციულ დანიშნულებად გადაქცევაში. აღნიშნული პროგრამა თავისი არსით გულისხმობს ჩვენი პარტნიორი უნივერსიტეტების საბაკალავრო და სამაგისტრო საფეხურის სტუდენტების ჩართულობას, მათ მიერ ტყის არამერქნული რესურსის კომერციული გამოყენების ბიზნეს-პროექტების დამუშავებას, ტრენინგებს, წარმატებულ ბიზნესმენებთან შეხვედრებს. პროგრამის ბოლოს უკვე წარმოდგენილი ბიზნესგეგმებიდან შეირჩევა სამი საინტერესო ბიზნეს გეგმა, რომელთა დაჯილდოებაც მოხდება. მადლობა ჩვენს მეგობრებს, როგორც ნიდერლანდების საელჩოს, მის წარმომადგენლებს, ასევე, ორგანიზაცია CENN-ს“, – განაცხადა პარლამენტის აგრარულ საკითხთა კომიტეტის თავმჯდომარემ ნინო წილოსანმა და განსაკუთრებით, ნიდერლანდების სამეფოს საელჩოს როლს გაუსვა ხაზი.

ნიდერლანდების სამეფოს ელჩის მოვალეობის შემსრულებლის ლუს ლამერტსის შეფასებით, მნიშვნელოვანია აგრარულ საკითხთა კომიტეტის ინიციატივა, რომელიც დამატებით შესაძლებლობებს აძლევს ახალგაზრდებს, რომ ჩართული იყვნენ სატყეო რესურსების კომერციული გამოყენების საკითხებში.

„მე ამას აღვიქვამ როგორც მწვანე ეკონომიკის ნაწილს, როგორც კლიმატთან მეგობრული მიდგომის და ურთიერთობის ერთ-ერთ ნაწილს, ძალიან მნიშვნელოვანია, რომ ამ თვალსაზრისით გარკვეული უნარები განუვითარდეს ახალგაზრდობას. ამას სჭირდება ინოვაციური მიდგომები და ყველა დაინტერესებული მხარის მონაწილეობა, იქნება ეს სამთავრობო, არასამთავრობო თუ სხვა ორგანიზაციები. ყოველთვის ვამბობთ, რომ გარემოსთან დაკავშირებულ საკითხებს საზღვრები არა აქვს და მოხარული ვართ, რომ ნიდერლანდების სამეფოს საელჩოს შესაძლებლობა აქვს ამ საკითხზე იმუშაოს როგორც საქართველოს მთავრობასთან, ასევე, პარლამენტის კომიტეტთან“, – განაცხადა ნიდერლანდების სამეფოს ელჩის მოვალეობის შემსრულებელმა.

„მნიშვნელოვანია, რომ დღეს სოფლის მეურნეობის საქმეებში და სოფლის განვითარების საქმიანობაში ერთ-ერთი პრიორიტეტული საკითხი გახლავთ ტყე. ამას წინ უძღოდა დიდი მუშაობა და ლობირება და მადლობა აგრარულ საკითხთა კომიტეტს, რომ ტყის წარმოება და ტყის მართვა ხდება სოფლად განვითარების ერთ-ერთი მნიშვნელოვანი პრიორიტეტი. ზოგადად, ახალგაზრდებს ძალიან ინოვაციური იდეები აქვთ, ტყის არამერქნული წარმოება კი საქართველოსთვის ძალიან ინოვაციურია და იმედი გვაქვს სტუდენტებისგან ძალიან საინტერესო პროექტებს მივიღებთ“, – განაცხადა პროგრამის ერთ-ერთი პარტნიორი მხარის – CENN-ის აღმასრულებელმა დირექტორმა ნანა ჯანაშიამ.

ურთიერთთანამშრომლობის მემორანდუმს ხელი მოაწერეს: პარლამენტის აგრარულ საკითხთა კომიტეტის თავმჯდომარემ, ნინო წილოსანმა, CENN-ის აღმასრულებელმა დირექტორმა ნანა ჯანაშიამ და ასოციაცია „ტყის პროდუქტის“ დირექტორმა გიორგი გუჯარაიძემ. აღნიშნული პროექტის ფარგლებში სტუდენტებს შესაძლებლობა ექნებათ, მათ შორის, გაეცნონ ტყის არამერქნული რესურსების გამოყენების საოჯახო, კერძო, სათემო, მუნიციპალური, რეგიონული ან ეროვნული მოდელების შექმნასა და პილოტირებას, მდგრადი განვითარების მიზნებსა და სოფლის განვითარების სტრატეგიულ ამოცანებს; დაესწრონ ტრენინგს სოფლად მეწარმეობის განვითარების შესახებ; მოიძიონ ბენეფიციარები და მათთან ერთად შეიმუშაონ ბიზნეს გეგმის კონცეფციები მათთვის ყველაზე საინტერესო იდეებისათვის, რომელიც მორგებული იქნება მიმდინარე სტარტაპ პროგრამებსა და გრანტებზე; ითანამშრომლონ სახელმწიფო და საერთაშორისო განვითარების პროგრამების განმახორციელებელი ორგანიზაციების წარმომადგენლებთან და სხვა. აპლიკაციის წარდგენის ვადა 2021 წლის 1 ოქტომბრამდე არის განსაზღვრული. საუკეთესო 10 აპლიკაციის ავტორი მონაწილეობას მიიღებს ტრენინგებისა და ვორკშოპების ციკლში, შეიმუშავებენ და 2021 წლის 1 დეკემბრამდე საკონკურსოდ წარადგენენ ტყის არამერქნული პროდუქტებით კომერციული სარგებლობის კონცეფციებს ბიზნეს-გეგმებისთვის.
საბოლოოდ 3 საუკეთესო კონცეფციის ავტორი „სოფლად მეწარმეობის განვითარების“ პროგრამის პრემიებით და პრიზებით დაჯილდოვდება.