საქართველოს პრეზიდენტი მოუწოდებს მმართველ გუნდს, გაითვალისწინოს ვენეციის კომისიის რეკომენდაციები და ამ რეკომენდაციებზე დაფუძნებით მოხდეს უკვე საკონსტიტუციო ცვლილებების განხილვა პარლამენტში – განაცხადა პრეზიდენტის პრესსპიკერმა ეკა მიშველაძემ დღეს გამართულ პრესკონფერენციაზე, შემდეგ კი ჟურნალისტების კითხვებს უპასუხა.
“პრეზიდენტი დათანხმდა პარლამენტის თამჯდომარის მიერ შემოთავაზებულ წინადადებას, რომ საზოგადოების წინაშე, მათ შორის, პოლიტიკური პარტიების, სამოქალაქო საზოგადოების, არასამთავრობო სექტორის წინაშე მომხდარიყო საკონსტიტუციო თემების განხილვა. პრეზიდენტი დათანხმდა ამ წინადადებას, რაც გაშუქდებოდა ყველა ტელევიზიის მიერ. გაუგებარი მიზეზით მათსავე შემოთავაზებაზე მივიღეთ უარი”, – განაცხადა ეკა მიშველაძემ.
შეგახსენებთ, რომ რამდენიმე დღის წინ, პარლამენტის თავმჯდომარე ირაკლი კობახიძემ პრეზიდენტ გიორგი მარგველაშვილს კონსტიტუციის პროექტის პირდაპირ ეთერში განხილვა შესთავაზა. საპასუხოდ, პრეზიდენტის ადმინისტრაციაში ითქვა, რომ მზად იყვნენ, ამ თემაზე დისკუსია პრეზიდენტის ადმინისტრაციაში გამართულიყო, შეხვედრა კი მედიით გაშუქდებოდა.
0