„საპარლამენტო მუშაობა მიდის და სამწუხაროდ, ოპოზიციის ნაწილი ბოიკოტს უცხადებს ამ საპარლამენტო სამუშაოს“, – ამის შესახებ საქართველოს პარლამენტის თავმჯდომარემ ბიუროს სხდომაზე განაცხადა. შალვა პაპუაშვილი ოპოზიციის წარმომადგენელთა განცხადებებს გამოეხმაურა. მისი თქმით, საპარლამენტო მუშაობა მიმდინარეობს და სამწუხაროდ, ოპოზიციის ნაწილი, საქმიანობაში ჩართვას ბოიკოტს უცხადებს.
„მნიშვნელოვანია, ჩვენმა საზოგადოებამ, შეცდომაში რომ არ იყოს შეყვანილი, იცოდეს, რომ საპარლამენტო საქმიანობა მიმდინარეობს. ინფორმაციისთვის გეტყვით, რომ საგაზაფხულო სესიის დასრულების შემდეგ 7 კომიტეტის სხდომა ჩატარდა, აქამდე უკვე ჩატარდა 5 სამუშაო ჯგუფის შეხვედრა 12 პუნქტის გარშემო, კომიტეტის სხდომებიც ამას ეძღვნებოდა. დღეს, მაგალითად, თავდაცვის კომიტეტს აქვს ჩანიშნული სხდომა, სადაც განიხილება ორგანიზებულ დანაშაულთან დაკავშირებული საკითხი, რომელიც 12 პუნქტის ერთ-ერთი ნაწილია, ხვალ იურიდიულ კომიტეტს ექნება დეოლიგარქიზაციასთან დაკავშირებით სამუშაო ჯგუფის შეხვედრა. საპარლამენტო საქმიანობა მიმდინარეობს. ჩვენ ვხედავთ, რომ ამ საპარლამენტო მუშაობაში ოპოზიციის ნაწილი ჩართულია, ხოლო ოპოზიციის ნაწილი უარს აცხადებს საპარლამენტო მუშაობაში ჩართვაზე და ამ რიგგარეშე სესიის მოწვევით ხდება ისე წარმოჩენა, თითქოს ამ ნაწილს ოპოზიციისა, რომელიც იწვევს სესიას, სურს მუშაობა და სხვას არ სურს მუშაობა, არადა, საქმე, რეალობაში, არის პირიქით. პირიქით იმიტომ, რომ საპარლამენტო მუშაობა მიდის და სამწუხაროდ, ოპოზიციის ნაწილი ბოიკოტს უცხადებს ამ საპარლამენტო სამუშაოს“, – განაცხადა პარლამენტის თავმჯდომარემ.
ბიუროს სხდომაზე შალვა პაპუაშვილმა საქართველოს პრეზიდენტის მიმართ ოპოზიციის წარმომადგენელთა მიმართვის და მიმართვაში შემოთავაზებული რიგგარეშე სესიის დღის წესრიგის შესახებაც ისაუბრა.
„როგორ წარმოგიდგენიათ ინკლუზიურობა, როდესაც, ერთი მხრივ, მზა კანონპროექტების მიღებას გვთავაზობთ, მათ შორის, რომლებიც ეწინააღმდეგება 12 პუნქტს, რომელიც ეწინააღმდეგება საქართველოს კონსტიტუციას, ნაცვლად იმისა, რომ იყოთ მონაწილენი იმ ინკლუზიური პროცესისა, რომელიც პარლამენტმა დაიწყო უკვე და მიმდინარეობს, როგორც კომიტეტების მუშაობის ფორმატში, ისე სამუშაო ჯგუფებში“, – ასე გამოეხმაურა საქართველოს პარლამენტის თავმჯდომარე ოპოზიციის წარმომადგენელთა განცხადებებს.
„რაც შეეხება საკონსტიტუციო ცვლილებებს, ეს საერთოდ არ შედის 12 პუნქტის საკითხებში, ანუ, საერთოდ არ ეხება ევროკავშირის კანდიდატობის სტატუსი საკითხს. მეორე საკითხი, რომელიც შეეხება საერთო სასამართლოებს, ეწინააღმდეგება 12 პუნქტს, ვინაიდან, ის გულისხმობს, მაგალითად, იუსტიციის საბჭოს წევრების არჩევის გადავადებას, არადა, პირიქით, 12-პუნქტიან რეკომენდაციებში ევროკომისია გვთხოვს, რომ ავირჩიოთ არა მოსამართლე წევრები. ანუ, ეწინააღმდეგება იმ 12 პუნქტს. მესამე საკითხი საერთო სასამართლოების – ეწინააღმდეგება საქართველოს კონსტიტუციას, ვინაიდან ითვალისწინებს უვადოდ დანიშნული მოსამართლეების გათავისუფლების მექანიზმის შემოღებას, რაც ეწინააღმდეგება კონსტიტუციას და მეოთხე საკითხი, რომელიც შეეხება ანტიკორუფციულ საკითხებს. ეს პაკეტია დიდი, ეს იმდენად მოცულობითი საკითხია, მათ შორის, ჯერ კომიტეტშიც კი არ არის განხილული და ამაზე, კიდევ ერთხელ, ეს არის, მართალია, საკითხი 12 პუნქტის ნაწილისა, მაგრამ სწორედ ეს არის საკითხი, სადაც საჭიროა თანამშრომლობა და საერთო ჯამში, ეს ყველაფერი ეწინააღმდეგება მთავარ რამეს ამ 12 რეკომენდაციისა, რომ პროცესი იყოს ინკლუზიური და მიმართული თანხმობაზე. როგორ წარმოგიდგენიათ, ინკლუზიურობა, როდესაც, ერთის მხრივ, მზა კანონპროექტების მიღებას გვთავაზობთ, მათ შორის, რომლებიც ეწინააღმდეგება 12 პუნქტს, რომელიც ეწინააღმდეგება საქართველოს კონსტიტუციას, ნაცვლად იმისა, რომ იყოთ მონაწილენი იმ ინკლუზიური პროცესისა, რომელიც პარლამენტმა დაიწყო უკვე და მიმდინარეობს, როგორც კომიტეტების მუშაობის ფორმატში, ისე სამუშაო ჯგუფებში. შეგახსენებთ, ყველაფერი ეს არის საპარლამენტო საქმიანობა და საპარლამენტო მუშაობა. ამიტომ, ისეთი სურათის წარმოჩენა, თითქოს პარლამენტი არ მუშაობს და ახლა უნდა დაიწყოს მუშაობა, რბილად რომ ვთქვათ, ჩვენი საზოგადოების შეცდომაში შეყვანაა“,- განაცხადა პარლამენტის თავმჯდომარემ.
შალვა პაპუაშვილმა ოპოზიციონერ კოლეგებს საპარლამენტო საქმიანობაში ჩართვისკენ კიდევ ერთხელ მოუწოდა.
„თუ არის სურვილი, რომ ვიყოთ მონაწილე საქართველოს ევროპული მომავლისა, ეს სურვილი გამოიხატება საპარლამენტო სამუშაოში და გთხოვთ, რომ ამ საპარლამენტო საქმიანობაში მიიღოთ მონაწილეობა“,- განაცხადა პარლამენტის თავმჯდომარემ.
0