სერგო რატიანი ვარაუდობს, რომ თამარ სანიკიძის განათლების მინისტრის პოსტიდან გათავისუფლება ყოფილი პრემიერ-მინისტრის, ბიძინა ივანიშვილის მიერ ჟურნალისტ სალომე ასათიანისთვის მიცემულ გუშინდელ ინტერვიუს უკავშირდება.
როგორც რატიანმა განაცხადა, იმ ფონზე, როდესაც ქვეყენაში ეკონომიკური პრობლემებია წინა პლანზე წამოწეული, განათლების მინისტრის პოსტიდან დათხოვნა ”ცოტა უცნაურია”.
”იმ ფონზე, როდესაც ქვეყანაში არის მწვავე ეკონომიკური კრიზისი, არის უმუშევრობა, სიღატაკე, ინფლაცია, როდესაც ეკონომიკური პრობლემები არის პრიორიტეტული და ხალხი ძალიან მძიმე მდგომარეობაშია, ამ სიტუაციაში შეცვალო განათლების მინისტრი, როდესაც არ ცვლი განათლების პოლიტიკას, არის ცოტა უცნაური. ერთადერთი, შესაძლოა მართლა ბიძინა ივანიშვილის გუშინდელი ინტერვიუ გამხდარიყო მიზეზი. სამწუხაროა, რომ ბიძინა ივანიშვილის რაღაც ხუშტური იყოს, მაგრამ ერთი რამე ცხადია – სალომე ასათიანის და მუშაობდა განათლების სამინისტროში და საკმაოდ დაახლოებული პირი იყო განათლების მინისტრთან”, -განაცხადა რატიანმა.
მისივე თქმით, ის წლების განმავლობაში აკრიტიკებდა განათლების მინისტრს იმიტომ, რომ იყო სტაგნაცია, მაგრამ იმ ფონზე, როდესაც ”ხელისუფლებას და ქვეყანას სხვა, უფრო პრიორიტეტული პრობლემები აქვს, სრულიად უცნაურად გამოიყურება ეს გადაყენება”.
რაც შეეხება განათლებისა და მეცნიერების ახალ მინისტრს, სერგო რატიანის თქმით, ალექსანდრე ჯეჯელავას საერთოდ არ იცნობს და შესაბამისად ვერაფერს იტყვის.
0