მანანა კობახიძის აზრით, პრეზიდენტისა და საკონსტიტუციო სასამართლოს თავმჯდომარის მხრიდან “ორ ხმაში, პოლიტიკურ თამაშს აქვს ადგილი“. როგორც კობახიძე აცხადებს, მისთვის გაუგებარია, თუკი სამართალდამცავთა მხრიდან პრეზიდენტის ოჯახის წევრზე რაიმე ტიპის ზეწოლა განხორციელდა, რატომ არ მოახდინა პრეზიდენტმა შესაბამისი რეაგირება თავის დროზე და “რატომ გახდა მისი მოტივატორი გიორგი პაპუაშვილი“. კობახიძის თქმით, “იმ დანაშაულთან დაკავშირებით, რაზეც დღეს გიორგი მარგველაშვილმა ისაუბრა, ყველამ უნდა მისცეს ჩვენება, ვინც არ უნდა იყოს, ხოლო თუკი მომხდარი არ დადასტურდება, ეს იქნება ცრუ დასმენა, ცრუ ჩვენება და საგამოძიებო ორგანოების მოცდენა“.
“თუკი ის, რაზეც პრეზიდენტი საუბრობს, ერთი თვის წინ მოხდა, პრეზიდენტი ამდენი ხნის განმავლობაში ხელს აფარებდა, ხმას არ იღებდა და გიორგი პაპუაშვილს რომ არ ეთქვა ის, რაც თქვა, ხმას არ ამოიღებდა?! გაჩუმდებოდა და შეეგუებოდა სამართალდამცავთა უკანონო ქმედებებს?! რა იყო მისგან რეაგირება – პაპუაშვილის განცხადება გახდა მოტივატორი, რომ ამაზე ხმამაღლა ესაუბრა?! ჩემთვის გაუგებარია, ვერ გეტყვით პრეზიდენტი რას ამბობს! მე ვერ გავიგე, რა გზავნილი გააკეთა მან საზოგადოების მიმართ. ახლა მე რომ ვთქვა, ოდესაში ტერაქტი იგეგმება და ჩემი ლიკვიდაცია უნდათ, დამიჯერებთ?! პრეზიდენტმა დღეს აბსოლუტურად ზოგადად ისაუბრა, მისგან ვერაფერი ვერ გავიგე, გარდა ზოგადი ფრაზებისა. მე ვერ გავიგე, ვინ ახორციელებს ზეწოლას და ვის მიმართ, როდის და რაში გამოიხატა ეს?! ეს არის არასერიოზული. ასეთი რამ პრეზიდენტს ახასიათებს. იგივე შემიძლია ვთქვა ალეკო ელისაშვილთან დაკავშირებით – თუკი თავის დროზე რაიმე დანაშაულის შესახებ იცოდა და ინფორმაცია ჰქონდა, რატომ არ მოხდინა რეაგირება და რატომ არ მიმართა პროკურატურას?! ეს უკვე მეორე ფაქტია, როცა თურმე რაღაც იცის პრეზიდენტმა, თურმე ქვეყანა ინგრევა, თურმე დანაშაულს სჩადიან და ის არ ახდენს რეაგირებას და სამართალდამცავ ორგანოებს კამერებით ესაუბრება. სად არიან ის ადამიანები ვისზეც ზეწოლა ხორციელდება?! სად არიან ის ადამიანები, ვისაც პროკურატურა უფლებას ურღვევს?! ვისაც პოლიცია უკანონთ ჩხრეკს?! რატომ ხმას არ იღებენ ისინი?! პრეზიდენტი და საკონსტიტუციო სასამართლოს თავმჯდომარე ასე არ უნდა იქცეოდნენ!“, – განაცხადა კობახიძემ.
პრეზიდენტი გიორგი მარგველაშვილი სამართლადამცავთა მხრიდან მისი ოჯახის წევრზე ზეწოლის მცდელობაზე საუბრობს. როგორც პრეზიდენტმა დღეს გამართულ ბრიფინგზე განაცხადა, მისი ოჯახის წევრი ქუჩაში გააჩერეს, შემდეგ კი მის სახლში ჩაატარეს ჩხრეკა სასამართლო დადგენილების გარეშე, “რაღაცის იმედით“.
პრეზიდენტის თქმით, სწორედ ამიტომ არ გაკვირვებია საკონსტიტუციო სასამართლოს თავმჯდომარის განცხადება, მოსამართლეებზე ზეწოლის მცდელობასთან დაკავშირებით.
”ეს ტენდენცია ახალი არ არის. ერთი თვის წინ ჩემი ოჯახის წევრზეც იყო მცდელობა სამართალდამცველების ჩართვით ზეწოლის განხორციელებისა. ეს იყო იმიტაცია რეალურად და გამომდინარე იქიდან, რაც პაპუაშვილმა მითხრა, ეს ჩემთვის გასაოცარი არ არის”, – განაცხადა მარგველაშვილმა.
0