იურიდიულ საკითხთა კომიტეტმა „ნარკოტიკული საშუალებების, ფსიქოტროპული ნივთიერებების, პრეკურსორებისა და ნარკოლოგიური დახმარების შესახებ“ კანონში შესატანი ცვლილება პირველი მოსმენით განიხილა. პროექტით, კანონის №1 დანართით გათვალისწინებულ ბრუნვისათვის მკაცრად შეზღუდული ნარკოტიკული საშუალებების ნუსხას (I სია) და ასევე, №2 დანართით (უკანონო მფლობელობიდან ან ბრუნვიდან ამოღებული ნარკოტიკული საშუალებებისა და ფსიქოტროპული ნივთიერებების მცირე, დიდი და განსაკუთრებით დიდი ოდენობების ნუსხა) გათვალისწინებულ ნარკოტიკულ საშუალებების ნუსხას ემატება 8 ახალი ნივთიერება: 3-მეთოქსიფენციკლიდინი, დიკლაზეპამი, დიფენიდინი, იზოტონიტაზენი, კლონაზოლამი, კუმილ-პეგაკლონი, მდმბ-4ენ-პინაკა და ფლუბრომაზოლამი.
„არც ერთი ეს ნივთიერება არ გამოიყენება სამედიცინო მიზნებისთვის. მათი გამოიყენება ხდება მხოლოდ სასწავლო-სამეცნიერო მიზნებისთვის. ამდენად, ამ ეტაპზე ამ ნივთიერებების მცირე, საშუალო და მაღალი დოზის ოდენობის დადგენა შეუძლებელია. აქედან გამომდინარე, ნებისმიერ ოდენობით მათი უკანონო ბრუნვა გამოიწვევეს კანონის შესაბამისი მუხლებით გათვალისწინებულ სისხლის სამართლებრივ პასუხისმგებლობას“, – განაცხადა კანონპროექტის წარდგენისას საქართველოს ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის მინისტრის პირველმა მოადგილე თამარ გაბუნიამ.
მისი თქმით, კანონში ცვლილების შეტანით მოხდება საერთაშორისო ხელშეკრულებით გათვალისწინებული მოთხოვნების საქართველოს კანონმდებლობაში ასახვა.
0