თუკი რუსეთი ე.წ. სამხრეთ ოსეთში დაგეგმილ რეფერენდუმს დადებითად შეხედავს, ამას მისთვის პოლიტიკური შედეგები ექნება, – ამის შესახებ prof-news-ს უმრავლესობის წევრმა გია ვოლსკიმ განუცხადა, რომელიც იმედს გამოთქვამს, რომ მოსკოვში “გონიერებას გამოიჩენენ“.
“ყველაზე ადვილი გზაა იმის თქმა, რომ რასაც ლეონიდ თიბილოვი ამბობს, საერთაშორისო ნორმებს არღვევს. საერთაშორისო ნორმებს არღვევს ყველაფერი, რასაც რუსეთის ფედერაცია ჩვენს ტერიტორიაზე სჩადის – უპირველეს ყოვლისა, ოკუპაციის თვალსაზრისით. არ მინდა მეორე პლანზე გადავწიო ის, რისი მომსწრეც გავხდით – მემკვიდრეობად საშინელი მდგომარეობა მივიღეთ, როდესაც ტერიტორიები ოკუპირებულია და შიგნით მიდის პროცესები, რომელიც არად აგდებს არც ადამიანის უფლებებს და არც საერთაშორისო ნორმებს. თიბილოვი აკეთებს რაღაც განცხადებას, რომელსაც ფაქტობრივად, არავითარი პატრონი არ ჰყავს. ერთადერთი, რაც ჩვენ გვაქვს და ვფიქრობ, რომ ეს არ არის ცოტა, არის ის, რომ ამ ყველაფერს საერთაშორისო შეფასება მიეცეს. რაც შეეხება რუსეთის პოზიციას, რუსეთს საერთაშორისო ნორმების და ეკონომიკური ურთიერთობების თვალსაზრისით ისედაც უმძიმესი ვათარება აქვს. ძალიან ბევრი მიმართულებით ახასიათებს სერიოზული პრობლემები და წესით და რიგით, არ უნდა დაიმატოს პრობლემა, თუკი ცხინვალის საზოგადოება, რომელიც დაახლოებით 15 ათასია, ასეთ რამეს გადაწყვეტს. ჩვენს სამეგობროში, სანათესაოში, საქართველოს არაოკუპირებულ ტერიტორიებზე გაცილებით მეტი ოსი ცხოვრობს, ვიდრე ცხინვალის რეგიონში. ვლადიკავკაზშიც იმ ოსების განწყობები, რომლებიც ცხინვალის რეგიონიდან არიან გადასულები, აბსოლუტურად განსხვავებულია. ასე რომ, რეფერენდუმს არც ერთი თვალსაზრისით ლეგიტიმაცია არ ექნება, ხოლო პოლიტიკური შედეგები იქნება რუსეთისთვის, თუკი დადებითად შეხედავს პასუხს“, – განუცხადა prof-news-ს გია ვოლსკიმ
ე.წ სამხრეთ ოსეთი რუსეთთან შეერთების საკითხთან დაკავშირებით აგვისტომდე რეფერენდუმის ჩატარებას გეგმავს, – ამის შესახებ ე.წ პრეზიდენტმა ლეონიდ თიბილოვმა რუსულ მედიასთან ინტერვიუში განაცხადა.
“ჩვენ უკვე ვმსჯელობთ ჩატარების თარიღებზე. კონკრეტული თარიღის დასახელება ახლა ჯერ ვერ ხერხდება, მაგრამ იგი უახლოეს მომავალში, აგვისტომდე ჩატარდება“, – განაცხადა თიბილოვმა.
მისივე განაცხადებით, რეფერენდუმის საკითხი დე ფაქტო სამხრეთ ოსეთის ე.წ კონსტიტუციაში იმ მუხლის შესწორებას მიეძღვნება, რომელიც მომავალში ოკუპირებულ რეგიონს მისცემს შესაძლებლობას რუსეთს მათ შემადგენლობაში შესვლის თხოვნით მიმართონ.
“ამ ეტაპზე მსოფლიოში შექნილი ვითარებიდან გამომდინარე, არ გვინდა ჩვენი სტრატეგიული პარტნიორი რუსეთი სერიოზული პოლიტიკური რისკების წინაშე დავაყენოთ. ამიტომაც მივედით დასკვნამდე, რომ საჭიროა კონსტიტუციაში ცვლილების შეტანა, კერძოდ, მე-10 მუხლში, რომელიც პრეზიდენტს მისცემს უფლებას პარლამენტის თანხმობით რუსეთს მიმართოს თხოვნით განიხილოს მათ შემადგენლობაში შესვლა“, – აღნიშნა თიბილოვმა.
0