საბურთალოს რაიონში, დიდი დიღმის დასახლებაში გამწვანების აქცია გაიმართა. საგაზაფხულო რგვების ფარგლებში, ახალი, მშენებარე ავტობაზის მიმდებარე ტერიტორიაზე 2 000 ძირი ალვის ხე დაირგო. ხე-მცენარეების სიმაღლე, რომლითაც ქარსაცავი ზოლი მოეწყო, 2 მეტრია. ხეები დედაქალაქის მერიას სოფლის მეურნეობის სამინისტროს სამეცნიერო-კვლევითი ცენტრ „ჯიღაურას“ სადემონსტრაციო ბაზიდან გადაეცა. გამწვანების ღონისძიებაში მონაწილეობა თბილისის მერმა დავით ნარმანია სოფლის სამეცნიერო-კვლევითი ცენტრის დირექტორ ლევან უჯმაჯურიძესთან, მერიის ეკოლოგიისა და გამწვანების საქალაქო სამსახურისა და თბილისის სატრანსპორტო კომპანიის წარმომადგენლებთან ერთად მიიღო. დავით ნარმანიას თქმით, აღნიშნულ ტერიტორიაზე ქარსაცავი ზოლის მოწყობა ძალიან მნიშვნელოვანია, როგორც ავტო ბაზის თანამშრომლებისათვის, ისე ადგილობრივი მოსახლეობისათვის. საგაზაფხულო რგვების მაისის შუა რიცხვებამდე გაგრძელდება. ხეები თბილისის ცენტრალურ უბნებსა და ქალაქის შემოგარენში დაირგვება. გამწვანების სამუშაოები წინასწარ შერჩეულ ტერიტორიებზე, სპეციალისტების რეკომენდაციებით შემუშავებული გეგმის მიხედვით ტარდება.
0