დაბა კაზრეთში ინტელექტ-ჩემპიონატის „ეტალონის“ მუნიციპალური ტური გაიმართა. 2019 – 2020 სასწავლო წლის „ბოლნისის ეტალონი მოსწავლე“ გახდა ბოლნისის N1 საჯარო სკოლის მე-9 სკოლის მოსწავლე ნიკოლოზ პაპუნაშვილი, რომელმაც კონკურსში 80 ქულა დააგროვა. ინტელექტ-ჩემპიონატს ბოლნისის მუნიციპალიტეტის მერი დავით შერაზადიშვილი ქვემო ქართლში სახელმწიფო რწმუნებულის აპარატის ადგილობრივი თვითმმართველობის ორგანოებთან ურთიერთობის სამსახურის უფროს ლევან ჟვანიასთან ერთად დაესწრო. ნიკოლოზ პაპუნაშვილი ბოლნისის სახელით უკვე ფინალურ ტურში მიიღებს მონაწილეობას. მე-9 კლასის მოსწავლეს ბოლნისის მუნიციპალიტეტის მერიისგან ერთი წლის მანძილზე ყოველთვიური სტიპენდია 100 ლარის ოდენობით დაენიშნება.
„ვულოცავ გამარჯვებულს, ამ მნიშვნელოვან და საამაყო წარმატებას. კონკურსის მონაწილეებს კი კარგი თამაშისთვის მინდა დიდი მადლობა გადაგიხადოთ. ბოლნისის მუნიციპალიტეტისთვის განათლების სფერო განსაკუთრებით პრიორიტეტულია, ამიტომ ეტალონის ბოლნისში ჩატარებას ყოველთვის დიდი სიხარულით ველით. ბოლნისის მერია ეტალონის გამარჯვებულს ყოველთვიურად ასლარიან სტიპენდიას უნიშნავს, რათა ახალგაზრდებში ახალი ცოდნის მიღების სურვილი გავზარდოთ. ჩვენ ვთვლით, რომ სტიპენდიების გარდა, მნიშვნელოვანია მოსწავლეებს სკოლებში მოწესრიგებული ინფრასტრუქტურაც შევუქმნათ, რათა მათ კომფორტულად შეძლონ განათლების მიღება, ამიტომ ჩვენ წელს აქტიურად ვაგრძელებთ ბოლნისის მუნიციპალიტეტში არსებული სკოლების რეაბილიტაციას. ბოლნისელ ახალგაზრდებს ასევე საშუალება აქვთ, სხვადასხვა შემეცნებით, კულტურულ და აკადემიურ რეგიონულ და საერთაშორისო პოექტებში მონაწილეობა მიიღონ. მიგვაჩნია, რომ ქვეყნის სწორი განვითარება სწორედ განათლებულ ახალ თაობაზე გადის, რომლებიც თავიანთი ინდივიდუალიზმითა და ნოვატორული იდეებით გამოირჩევიან“, – განაცხადა ბოლნისის მუნიციპალიტეტის მერმა დავით შერაზადიშვილმა.
0