მახსოვს, როდესაც ერდოღანთან მქონდა შეხვედრა, პირველი ეს მთხოვა, იქნებ კაზინოები დახუროო, – ამის შესახებ ბიძინა ივანიშვილმა იმერეთში, რეგიონულ მედიასთან შეხვედრისას, აზარტულ თამაშებთან დაკავშირებით დასმულ კითხვაზე საპასუხოდ განაცხადა. ივანიშვილი ეთანხმება იმას, რომ აზარტულ თამაშებზე არასრულწლოვნებისთვის მკაცრი შეზღუდვები უნდა დაწესდეს.
”მართალი, რომ გითხრათ, მე სიამოვნებით ავკრძალავდი, მაგრამ ესეც ეკონომიკაა და მკვეთრი დამოკიდებულება ამაზე თურმე არ შეიძლება. განსაკუთარებით, აჭარაში, ბათუმში, ამას სერიოზული პოზიცია უჭირავს, როგორც ბიზნესს და ქვეყნის განვითარებაში ამასაც თავისი ადგილი აქვს. სასტიკად უნდა გამკაცრდეს იქ არასრულწლოვნების მისვლა. არ დაგიმალავთ, მე ისიც კი მქონდა იდეად და გუშინაც ვსაუბრობდი ამ თემაზე, რომ იქნებ ის მოვახერხოთ, რომ ადგილობრივები არ შევუშვათ ამ კაზინოებში. ალბათ, ეს კანონმდებლობასთან შეუთავსებლობაში მოვა”, – განაცხადა ივანიშვილმა.
მისივე თქმით, ბევრი ტურისტი ჩამოდის და კაზინოების არსებობა ტურსტების დინებასაც უწყობს ხელს.
”ეს ფაქტია და ამას ვერ უარვყოფთ. აქვს თავისი წვლილი და როლი კაზინოებს. თუ რამეს კანონმდებლობაში მოვიფიქრებთ და მაქსიმალურად გავამკაცრებთ. უამრავი ოჯახი გაუბედურდა. მეც ვიცი ეს რა არის. მე მახსოვს, როდესაც ერდოღანთან მქონდა შეხვედრა, პირველი ეს მთხოვა, იქნებ კაზინოები დახუროო. იქედანაც ჩამოსულებიც ძალიან ბევრი უბედურდება ამ კაზინოებში. მაგრამ რა ვქნათ, ბიზნესის სახეა ეს. ხალხს ეს უყვარს და მოსწონს. ტურიზმს ხელს უწყობს, შესაბამისად, კანონმდებლობას უნდა მივხედოთ. კატეგორიული კანონები უნდა შემოვიღოთ არასრულწლოვნებზე, უნდა დაუხურო და გააკოტრო პირდაპირ, ვინც არასრულწლოვანს შეუშვებს, დაარღვევს, პასპორტები უნდა მოსთხოვონ. ამ მხრივ კანონმდებლობები გავამკაცროთ, მაგრამ ბიზნესზე უარს ნუ ვიტყვით”, – განაცხადა ივანიშვილმა.
0