ბოლნისის, დმანისის, თეთრიწყაროსა და წალკის მაჟორიტარმა დეპუტატმა გოგი მეშველიანმა, ბოლნისის მუნიციპალიტეტის მერის პირველმა მოადგილე ბუბა გობეჯიშვილმა და ბოლნისის საკრებულოს, ფრაქცია „ქართული ოცნების“ თავმჯდომარე გიორგი მირიანაშვილმა მოწყვლადი კატეგორიის 160 ოჯახს, რომელთა ყოველდღიურ უფასო კვებას ბოლნისის მუნიციპალიტეტი უზრუნველყოფს, დამდეგი შობა-ახალი წელი მიულოცეს და მათ წინასაახალწლო საჩუქრები გადასცეს. საშობაო ნობათები „შინ მოვლის სერვისით“ მოსარგებლე მარტოხელა ხანდაზმულ ბენეფიციარებსაც გადაეცათ. ქალაქ ბოლნისსა და დაბა კაზრეთში მოხუცებს საახალწლო ნობათები გოგი მეშველიანმა, ბუბა გობეჯიშვილმა და გიორგი მირიანაშვილმა პირადად მიუტანეს. აღსანიშნავია, რომ მუნიციპალიტეტის მერია საახალწო საჩუქრებს მოწყვლადი კატეგორიის ოჯახებსა და მოხუცებს რამდენი წელია გადასცემს. აქციამ უკვე მიიღო ტრადიციული სახე და ის მომავალშიც გაგრძელდება. საახალწლო ნობათებისთვის მუნიციპალიტეტმა 5912 ლარი გამოყო.
„წინასაახალწლოდ ბოლნისის მუნიციპალიტეტის მერია მოწყვლადი კატეგორიის ოჯახებს საახალწლო ნობათებს გადასცემს, ეს ტრადიცია წელსაც არ დაღვეულა, საახალწლო ნობათები დღეს 160-მა ოჯახმა მიიღო. პანდემიის პირობებში მსგავსი დახმარება ვფიქრობ ორმაგად მნიშვნელოვანია. ბოლნისის მუნიციპალიტეტი ყოველთვის დიდი ყურადღებას აქცევს სოციალურ პროგრამებს და ჩვენ ვცდილობთ ვიზრუნოთ და შესაბამისი დახმარება გავუწიოთ შეჭირვებულ ოჯახებსა და მოხუცებს. მსურს დამდეგი შობა-ახალი წელი თითოეულ ჩვენს მოქალაქეს მივულოცო და მათ ჯანმრთელობა და ბედნიერება ვუსურვო“, – განაცხადა ბოლნისის მუნიციპალიტეტის მერის პირველმა მოადგილე ბუბა გობეჯიშვილმა.
0