ჩვენ გვექნება პრევენციული ღონისძიებები გასატარებელი, რათა არ მოხდეს კორცხელის მსგავსი ინციდენტები, – ამის შესახებ ვიცე პრემიერმა, საქართველოს ენერგეტიკის მინისტრმა განაცხადა. როგორც კახა კალაძემ კორცხელში მომხდარ დაპირისპირებაზე საუბრისას განაცხადა, რაც კორცხელში მოხდა, სამარცხვინო იყო და ამას მმართველი პოლიტიკური ძალა ყველანაირად ემიჯნება, თუმცა ინციდენტი პროვოცირებული სწორედ ”ერთიანი ნაციონალური მოძრაობის” მხრიდან იყო.
”კორცხელის ინციდენტი იყო ძალიან ცუდი და სამარცხვინო ფაქტი. ჩვენ ამასთან დაკავშირებით არაერთხელ გავაკეთეთ განცხადება, რომ ვემიჯნებით ყველანაირ ძალადობას და მოვუწოდეთ შესაბამის სამსახურებს, დაწყებულიყო გამოძიება. გამოძიება დაწყებულია, დაკითხვაზე იყო რამდენიმე პირი, რომელმაც ჩვენება მისცა და საქმე წარმოებაშია. რაც შეეხება აქტივის მობილიზებას, როდესაც მიზანმიმართულად გაკეთდა განცხადებები, რომ ეს ახალგაზრდები იყვნენ ზონდერები, მე ვთქვი, რომ ესენი იყვნენ ჩვენი მხარდამჭერები. არჩევნები არა მხოლოდ კორცხელში, არამედ 9 ოლქში გაიმართა და ყველგან დაპირისპირების გარეშე ჩაიარა. ყველგან იყო მობილიზებული ”ქართული ოცნების” და ”ნაციონალური მოძრაობის” აქტივი. ასევე იყვნენ იმ პარტიების მხარდამჭერები, რომელთა კანდიდატებიც იღებდნენ არჩევნებში მონაწილეობას. თუმცა არსად ინციდენტი არ მომხდარა. ერთადერთი ინციდენტი სადაც მოხდა და რომლის პროვოკაციაც წამოიწყო ”ნაციონალურმა მოძრაობამ”, ეს იყო კორცხელი. მიმდინარე პროცესებზე მთავრობაა პასუხისმგებელი და პრევენციული ღონისძიებები გვექნება გასატარებელი, რომ ასეთი ფაქტები არ მოხდეეს. ეს ”ნაციონალურ მოძრაობას” აძლევს ხელს. მივმართავ მხარდამჭერებს, ასეთ პროვოცირებებს არ წამოვეგოთ”, -განაცხადა კალაძემ.
0