პარლამენტის გარემოს დაცვისა და ბუნებრივი რესურსების კომიტეტის თავმჯდომარე, მაია ბითაძე ქალაქ რუსთავში საწარმო „ჯეოსტილს“ ესტუმრა, სადაც ის ატმოსფერული ჰაერის დაბინძურების თვითმონიტორინგის სისტემის მუშაობას გაეცნო.
ეს უკვე მეორე კომპანიაა, რომელიც საქართველოს პარლამენტმა, რუსთავის მერიამ და გარემოს დაცვისა და სოფლის მეურნეობის სამინისტრომ ერთობლივი კამპანიის ფარგლებში შეამოწმეს. ისინი ადგილზე გაეცნენ ჰაერის მონოტორინგის სისტემის გაუმჯობესების მიზნით გაწეულ სამუშაოებს და ამ მიმართულებით დაგეგმილი ღონისძიებების შესახებ საწარმოს ხელმძღვანელებთან ისაუბრეს.
„ჯეოსტილი“ არის მეორე კომპანია, სადაც განვახორციელეთ მონიტორინგი, და ერთი რამ არის თვალსაჩინო, კომპანიას ბევრად გამოსწორებული აქვს თვითმონოტორინგის და ჰაერის დაბინძურების კონტროლის სისტემა, კვლავ რჩება გარკვეული ღონისძიებები, რომელიც უნდა გატარდეს კომპანიის მხრიდან, თუნდაც, ჯართის მართვის კუთხით. ზოგადი ინსპექტირების ფარგლებში, ჩვენ ამ პროცესებს შემდეგშიც კონტროლს გავუწევთ. ეს მონიტორინგი გაგრძელდება რუსთავში არსებულ ყველა ქარხანაში, შევალთ თითოეულ ქარხანაში, თითოეულ ობიექტზე, რომლებსაც წლებია პრობლემები აქვს ატმოსფერული ჰაერის დაბინძურებასთან და თვითმონიტორინგის სისტემასთან დაკავშირებით. ჩვენი მიზანია, რომ არა მხოლოდ რუსთავში, არამედ არსად საქართველოში აღარ დარჩეს ისეთი საწარმო, რომლის ტექნოლოგიური ციკლი, არა მარტო ჰაერის, არამედ გარემოს შემადგენელ სხვა ელემენტებსაც დააბინძურებს“, – განაცხადა მაია ბითაძემ.
მონიტორინგის ციკლის ფარგლებში, საწარმოში იმყოფებოდნენ ქალაქ რუსთავის მერი ნინო ლაცაბიძე, გარემოს დაცვისა და სოფლის მეურნეობის მინისტრის მოადგილე ნინო თანდილაშვილი და ბიზნეს ასოციაციის წარმომადგენლები.
0