ქართული სახელმწიფო დღეს არის სუვერენული, როგორც არასდროს

პრემიერ-მინისტრმა ირაკლი კობახიძემ პრესკონფერენცია გამართა:
“მოგესალმებით, როგორც მოგეხსენებათ, ხვალ და ზეგ საქართველოს პარლამენტი გეგმავს „უცხოური გავლენის გამჭვირვალობის შესახებ” კანონის მიღებას მესამე მოსმენით. ხვალ დაგეგმილია კანონპროექტის საკომიტეტო მოსმენა, ხოლო ზეგ – მისი მიღება პარლამენტის პლენარულ სხდომაზე. პირველ რიგში, აღვნიშნავ, რომ საქართველო არის საპარლამენტო დემოკრატია და ჩვენ ქვეყანაში გადაწყვეტილებები მიიღება ხალხის უმრავლესობის ინტერესების შესაბამისად და არა პოლიტიკური უმცირესობის მოთხოვნების მიხედვით. სოციოლოგიური კვლევების თანახმად, საქართველოს მოსახლეობის 80 პროცენტზე მეტი მხარს უჭერს არასამთავრობო ორგანიზაციების გამჭვირვალობას, ხოლო 60 პროცენტზე მეტი – უშუალოდ კანონს „უცხოური გავლენის გამჭვირვალობის შესახებ”. აქედან გამომდინარე, საქართველოს პარლამენტი ხვალ და ზეგ აღასრულებს ქართული საზოგადოების ნებას, უზრუნველყოს არასამთავრობო ორგანიზაციებისა და შესაბამისი მედიასაშუალებების შემოსავლების, ხარჯების გასაჯაროება და, შესაბამისად, შექმნას უფრო მყარი გარანტიები საქართველოში გრძელვადიანი მშვიდობის, სიმშვიდისა და სტაბილურობის უზრუნველსაყოფად. არ შეიძლება, ქვეყანა მუდმივად ცხოვრობდეს ე.წ. პოლარიზაციის ჩაკეტილ წრეში, რომელიც საქართველოსთვის ხელოვნურად არის გარედან თავსმოხვეული და რაშიც განსაკუთრებულ როლს არასამთავრობო ორგანიზაციებისა და შესაბამისი მედიასაშუალებების გაუმჭვირვალე დაფინანსება ასრულებს. გარედან ხელოვნურად თავსმოხვეული ე.წ. პოლარიზაციის დაძლევა, ანუ რადიკალიზმის დასრულება, არის ჩვენი პასუხისმგებლობა ქართველი ხალხის წინაშე, რომელმაც ქვეყნის მართვის მანდატი უკვე რვაჯერ მოგვანიჭა და ოქტომბერში მეცხრედაც მოგვანიჭებს. გვაქვს უტყუარი ინფორმაცია, რომ რადიკალური ოპოზიციის მიერ ორგანიზებულ და უცხოეთიდან დაფინანსებულ ძალადობრივ ახალგაზრდულ დაჯგუფებებს ხვალ და ზეგ დაგეგმილი აქვთ ძალადობრივი მოქმედებები საქართველოს პარლამენტისა და პოლიციის წინააღმდეგ. მინდა, გავაფრთხილო რადიკალური ოპოზიციის ძალადობრივი დაჯგუფებების თითოეული წევრი, რომ ძალადობისთვის კანონის წინაშე ყველა უმკაცრესად აგებს პასუხს. ამასთანავე მინდა ვთხოვო სამართალდამცავებს, გამოიჩინონ მაქსიმალური მოთმინება და ძალადობაზე, შეურაცხყოფაზე რეაგირებისას იმოქმედონ ევროპულზე მაღალი სტანდარტით. სამართალდამცავებს მინდა კიდევ ერთხელ გადავუხადო მადლობა იმისათვის, რომ ძალადობის დიდი მასშტაბისა და სრულიად მიუღებელი ხარისხის მიუხედავად, გასული რამდენიმე კვირის განმავლობაში არსებითად ისინი სწორედ ამერიკულსა და ევროპულზე მაღალი სტანდარტებით მოქმედებდნენ. გასული კვირების განმავლობაში იყო რამდენიმე გამონაკლისი ინციდენტი, რომელიც ვერავისთვის იქნება მოსაწონი და მისაღები. საქართველო არის პატარა ქვეყანა, სადაც ადამიანები ერთმანეთს განსაკუთრებულად უნდა მოვუფრთხილდეთ. შესაბამისად, მოძალადეების მიმართ რეაგირების ის უხეში ფორმები, რომლებიც ჩვეულებრივი მოვლენაა ამერიკული ან ფრანგული პოლიციისთვის, არ უნდა იყოს მისაღები ქართველი სამართალდამცავებისთვის. აქვე მინდა ყველას შევახსენო, რომ ნებისმიერი ინციდენტი რადიკალური ოპოზიციის მიერ მათ მიერ დაგეგმილი ძალადობის გადასაფარად იქნება გამოყენებული. მინდა, გავაფრთხილო რადიკალური ოპოზიციის თითოეული წარმომადგენელი, ვისაც ხვალ და ზეგ დაგეგმილი აქვს ძალადობა, რომ მათი დანაშაული არ დარჩება დაუსჯელი და დიდი ალბათობით ვერც სალომე ზურაბიშვილის მხრიდან შეწყალებას ვეღარ დაექვემდებარება. გასული საუკუნის 90-იანი წლებიდან მოყოლებული საქართველო და ქართული საზოგადოება თავს იწონებდა მშვიდობიანი პროტესტის კულტურით. ძალადობრივი პოლიტიკური დაჯგუფება, კოლექტიური ნაცმოძრაობა, რომლის მმართველობის მთავარი საყრდენი 2004-2012 წლებში, სიცრუესთან ერთად, სწორედ ძალადობა იყო, ახლა ცდილობს, ქართული კულტურის ეს ნიშანიც წაშალოს და ძალადობრივი პროტესტის ე.წ. კულტურა დაამკვიდროს. თუ დისიდენტური და „ქართული ოცნების” აქციების მთავარი შტრიხი გულწრფელი ლოცვა და სიმღერა იყო, ახლა რადიკალური ოპოზიციის მიტინგების მთავარი შტრიხი მოლოტოვის კოქტეილისა და ქვების სროლაა”.

„ნაცმოძრაობა”, რომელიც თავის დროზე გარე ძალებმა ხელისუფლებაში ძალადობითა და ქვების სროლით მოიყვანეს და რომლის ერთ-ერთი მთავარი მახასიათებელი ხელისუფლებაში ყოფნისას მშვიდობიან მომიტინგეებზე ძალადობა იყო, დღეს უკვე ოპოზიციის რიგებიდან ძალადობს. სახელმწიფო კოლექტიურ „ნაცმოძრაობას” და მის უცხოელ პატრონებს, ბუნებრივია, ვერ და არ მისცემს იმის საშუალებას, რომ მშვიდობიანი პროტესტის ქართული კულტურა ძალადობრივი პროტესტის არაქართული უკულტურობით ჩაანაცვლოს.

ეს ძალადობა და უკულტურობა, რომლითაც „ნაცმოძრაობა” ჯერ ხელისუფლებაში გამოირჩეოდა და ახლა უკვე ოპოზიციაში გამოირჩევა, არ არის ქართული და სრულიად უცხოა ქართული კულტურისთვის. საქართველოში მისი დამკვიდრებაც სწორედ იმ შავ ფულს უკავშირდება, რომლის დამალვისთვისაც დღეს ასეთი გამალებით იბრძვიან რადიკალური ოპოზიცია და მისი უცხოელი მეგობრები. ქართული სახელმწიფო დღეს არის სუვერენული, როგორც არასდროს და ეს სუვერენიტეტი კიდევ უფრო განმტკიცდება. მასთან ერთად განმტკიცდება სამართლისა და კანონის უზენაესობაც საქართველოში. შესაბამისად, კიდევ ერთხელ ვპირდებით ყველას, რომ სახელმწიფოზე, სახელმწიფო ინსტიტუტსა და პოლიციელზე ხელის აღმართვისთვის კანონის წინაშე ყველა კანონის მთელი სიმკაცრით აგებს პასუხს. დასასრულ, კიდევ ერთხელ მინდა გადავუხადო მადლობა სამართალდამცავებს სახელმწიფო ინტერესებისა და საზოგადოებრივი წესრიგის დაცვისთვის და ვთხოვო, მომიტინგეების მხრიდან ძალადობასა და შეურაცხყოფას მაქსიმალური მოთმინებით უპასუხონ.

რუსთავი 2, ელიტა ანდღულაძე – ჩემი კითხვა, ბუნებრივია, ეხება გამჭვირვალობის შესახებ კანონს და ო’ბრაიენს, რომელიც ხვალ ჩამოდის საქართველოში. ამერიკის სახელმწიფო მდივნის თანაშემწის მხრიდან გაკეთებული განცხადებები ჩვენ მოგვისმენია არაერთხელ. ის საუბრობს, რომ შეშფოთებულია ამ მოვლენებით, რომელიც საქართველოშია, ასევე საუბრობს სანქციების გამოყენებაზეც. რას ველოდებით ამერიკის სახელმწიფო მდივნის თანაშემწის ვიზიტიდან, შეიძლება თუ არა სანქციების ამოქმედება, ანუ რაზეც ის საუბრობს, რეალურად მოხდეს?
პრემიერ-მინისტრი – მე ძალიან მარტივად შემიძლია გიპასუხოთ – სანქციებზე საუბარი არის აბსოლუტურად არასერიოზული. მადლობა.

ფორმულა, ნიკა საჯაია – ბატონო ირაკლი, თქვენ ისაუბრეთ, რომ ჩატარდა კვლევა. თუ შეგიძლიათ გვითხრათ, ვინ ჩაატარა კვლევა, როდის ჩატარდა ეს კვლევა, საიდანაც გაქვთ მონაცემი, რომ უმცირესობა აპროტესტებს რუსული კანონის მიღებას. ამავდროულად, თუ ნახეთ გუშინაც გამოსული ადამიანების რაოდენობა, საკმაოდ ბევრი ადამიანი აპროტესტებდა ამას და თქვენ ისაუბრეთ, რომ გაქვთ უტყუარი ინფორმაცია იმაზე, რომ მოსალოდნელია გარკვეული ძალადობრივი ქმედებები, ანუ შესაბამისი უწყებები უკვე არიან ინფორმირებული. რას აკეთებთ პრევენციისთვის, რომ არ მოხდეს ძალადობრივი ქმედება?
პრემიერ-მინისტრი – შინაგან საქმეთა სამინისტრო ყველაფერს გააკეთებს იმისთვის, რომ მოხდეს ძალადობის პრევენცია, თუმცა შეუძლებელია ამის სრულად გამორიცხვა. თუ ძალადობა არის დაგეგმილი, ყველაფერს გააკეთებენ შესაბამისი რადიკალური ძალები იმისთვის, რომ ის განხორციელდეს. მთავარია, შინაგან საქმეთა სამინისტრო ამ შემთხვევაშიც იმოქმედებს არა ევროპული სტანდარტებით, არამედ ევროპულსა და ამერიკულზე მაღალი სტანდარტებით, ეს არის დღევანდელი ჩვენი ხელისუფლების და კონკრეტულად სამართალდამცავი ორგანოების ხელწერა, რითაც განსხვავდება დღევანდელი შსს, მაგალითად, მერაბიშვილის და გახარიას მოქმედებებისგან. ეს არის სტანდარტი, რომელიც აუცილებლად იქნება დაცული შსს-ს მიერ, ყველაფერი გაკეთდება პრევენციისთვის. რაც შეეხება უმრავლესობას და უმცირესობას – ჩვენ ჩავატარეთ სოციოლოგიური კვლევა. ეს კვლევა ჩაატარა ერთ-ერთმა კომპეტენტურმა ორგანიზაციამ, რომელსაც არ დავასახელებ, თუმცა შეგიძლიათ, დაახლოებით ივარაუდოთ, ვისთან შეიძლება ჩვენ ვმუშაობდეთ. ეს არის ერთ-ერთი მაღალი კვალიფიკაციით გამორჩეული გუნდისგან შემდგარი ორგანიზაცია. 80 პროცენტზე მეტი მხარს უჭერს არასამთავრობო ორგანიზაციების საქმიანობის გამჭვირვალობას. როცა უშუალოდ კანონთან დაკავშირებით დაისვა კითხვა, ზუსტად 61 პროცენტი დაფიქსირდა მხარდაჭერა ამ შემთხვევაში, შესაბამისად, ყველა ვხედავთ, სად არის საზოგადოების მხარდაჭერა. რაც შეეხება აქციებს, მინდა შეგახსენოთ, რომ ჩვენს აქციაზე იგივე გუშინდელთან შედარებით, რამდენჯერმე მეტი ადამიანი იყო გამოსული, რაც ასევე აჩვენებს თანაფარდობას. აქედან გამომდინარე, ცალსახად შეიძლება იმის თქმა, რომ ჩვენ უნდა გავყვეთ საზოგადოების უმრავლესობის ნებას, თან მით უმეტეს, რომ ეს არის სწორედ რაციონალური გადაწყვეტილება. ის უნდა იყოს ასახული პარლამენტის მიერ გამოცემულ აქტში.

რუსთავი 2, ელიტა ანდღულაძე – ბატონო პრემიერო, ისევ დავუბრუნდები ჩემს კითხვას. მაინტერესებს, რას ველოდებით ზოგადად ამერიკის შეერთებული შტატების სახელმწიფო მდივნის თანაშემწის ვიზიტიდან და ხომ არ გაქვთ მოლოდინი იმისა, რომ მაგალითად სანქციებს შეუერთდნენ და რომელიმე პირს დაუწესდეს სანქცია საქართველოში?
პრემიერ-მინისტრი – მოკლე პასუხი უკვე გაგეცით, მაგრამ თუ მაინც არის საინტერესო, უფრო ფართოდ გიპასუხოთ, კიდევ ერთხელ გავიმეორებ იმას, რომ სანქციები არ არის სერიოზული თემა და შეუძლებელია, ასეთი მუქარებით დაშანტაჟდეს ხელისუფლება და მით უმეტეს ქართული საზოგადოება. ქართულ საზოგადოებას იმდენი რამ აქვს გამოვლილი გასული 30 წლის განმავლობაში, რომ მისი დაშანტაჟება აბსოლუტურად შეუძლებელია.რაც შეეხება ხელისუფლებას, ჩვენ გვაქვს არაჩვეულებრივი მაგალითი ჩვენი პარტიის საპატიო თავმჯდომარისგან, პარტიის დამფუძნებლისგან, ბატონი ბიძინა ივანიშვილისგან, რომელმაც დასავლეთს მიანდო 2 მლრდ დოლარი და რომელსაც გაუყინეს ეს 2 მლრდ დოლარი და, შესაბამისად, არის დე-ფაქტო სანქციების ქვეშ, მაგრამ, რა თქმა უნდა, ამ დე-ფაქტო სანქციას არ უმოქმედია მის გადაწყვეტილებებზე. როდესაც საქმე ეხება ქვეყნისა და სახელმწიფოს ინტერესებს, ჩვენ ვერავითარი შანტაჟი და მუქარა უკან ვერ დაგვახევინებს. თქვენ იცით, როგორია საქართველოს ისტორია. ამ ქვეყანაში 3 ათასი წლის მანძილზე ადამიანები თავს სწირავდნენ ქვეყნის დამოუკიდებლობისთვის, მისი სუვერენიტეტისთვის და როცა ასეთ დროს ვიღაც შანტაჟით ცდილობს შენს გადაწყვეტილებაზე ზემოქმედებას, რა თქმა უნდა, ამას ვერავითარი ეფექტი ვერ ექნება. მგონი, ვერ იცნობენ, არ იცნობენ ქართველებს და შეიძლება, შორიდან სხვანაირად ჩანს ქართველის ბუნება.

რუსთავი 2, ელიტა ანდღულაძე – ზოგადად, ამ ვიზიტისგან რას ველოდებით?
პრემიერ-მინისტრი – იმედი მაქვს, საუბარი იქნება საქართველო-ამერიკის შეერთებული შტატების დაახლოებაზე, არა დაშორებაზე ხელოვნურად, არამედ დაახლოებაზე. თქვენ იცით, რა არის ჩვენი მოწოდებები ჩვენი ამერიკელი პარტნიორების მიმართ. ეს არის ჩვენი მოქალაქეებისთვის ვიზალიბერალიზაცია, თავისუფალი ვაჭრობის შეთანხმების ხელმოწერა. იმედი გვაქვს, რომ ასეთ თემებზე იქნება საუბარი ამ ვიზიტის დროს. რა თქმა უნდა, ეს დააახლოებს ორ ქვეყანას ერთმანეთთან. თუ საუბარია სტრატეგიულ პარტნიორობაზე, საუბარი უნდა იყოს სწორედ ასეთი ტიპის დაახლოებაზე, როგორიც არის პირდაპირი ფრენები, თავისუფალი ვაჭრობა, ვიზალიბერალიზაცია. ეს იქნებოდა სწორი დამოკიდებულება ქართველი ხალხის მიმართ და იმედია, ასეთი ტიპის გზავნილებით ჩამოდის საქართველოში ბატონი ო’ბრაიენი.

ფორმულა, ნიკა საჯაია – ამ ეტაპის მოცემულობიდან გამომდინარე, ლოგიკას თუ გავყევით, ამერიკა არ არის სტრატეგიული პარტნიორი ახლა?
პრემიერ-მინისტრი – მე სხვა რამეს ვამბობ. სტრატეგიული პარტნიორობა უნდა იყოს გამოხატული კონკრეტული ქმედითი ნაბიჯებით. ასეთი ქმედითი ნაბიჯი იქნებოდა სწორედ ვიზალიბერალიზაცია, პირდაპირი ფრენების მხარდაჭერა და თავისუფალი ვაჭრობის შეთანხმების ხელმოწერა, რასთან დაკავშირებითაც ჩვენ გვაქვს ენთუზიაზმი, მოწოდებები, თუმცა იქიდან ვერ ვიღებთ შესაბამის პასუხს, რაც ძალიან სამწუხაროა. სტრატეგიული პარტნიორობა უნდა იყოს გამოხატული კონკრეტულ ქმედებებში, თუმცა უკვე ამდენი, ძალიან ბევრი, წელია, არც ვიზალიბერალიზაციაზე მიდის საუბარი, არც თავისუფალ ვაჭრობაზე, არც პირდაპირ ფრენებზე, რაც არ შეესატყვისება სტრატეგიული პარტნიორობის ბუნებას.

ფორმულა, ნიკა საჯაია – ამერიკის შეერთებული შტატები, ასევე სხვა ბევრი ევროპული ქვეყანა დაგვხმარებია, არაერთი მნიშვნელოვანი პროექტი განხორციელებულა, მათ შორის, ორმხრივი თანამშრომლობით, ამაში თქვენც დამეთანხმებით იმიტომ, რომ ამ ხელისუფლების პირობებშიც მოხდა ეს სხვადასხვა მიმართულებით. თქვენ საუბრობთ ვიზალიბერალიზაციის საკითხზე, რაც მნიშვნელოვანია და ეს სიკეთე ვნახეთ საქართველოს მოქალაქეებმა ევროპულ ქვეყნებში გადაადგილებისთვის, თუმცა დღეს უკვე ღიად საუბრობენ, რომ შესაძლოა ესეც კი შეჩერდეს და ფაქტობრივად ყველა პარტნიორი ქვეყანა აკრიტიკებს ხელისუფლებას სწორედ ამ კანონის გამო. გიღირთ, რომ ეს ყველაფერი სასწორზე დადოთ და გაფუჭდეს მინიმუმ ურთიერთობები?
პრემიერ-მინისტრი – ორი დღის წინ თქვენმა კოლეგამ თქვენი ტელევიზიიდან აღნიშნა, რომ თუ შეჩერდება ვიზალიბერალიზაცია, ეს, რა თქმა უნდა, არის ასევე არასერიოზული თემა, მაგრამ მან თქვა, რომ თუ შეჩერდება ვიზალიბერალიზაცია, ეს იქნება რუსეთის ინტერესებში. თავად შეგიძლიათ განსაჯოთ, რატომ შეიძლება მიიღოს ევროკავშირმა ისეთი გადაწყვეტილება, რომელიც შედის რუსეთის ინტერესებში. ხომ ხედავთ, რა დონის აბსურდზე გვიწევს საუბარი. მე მგონია, რომ თუ ვინმეს რამეზე ექნება საუბარი, შეიძლება ვინმემ დაგვაშანტაჟოს პერსონალური სანქციებით, პირობითად, მაგრამ ის, რომ ვიღაცა გამოვიდეს ქართველი ხალხის მიმართ მუქარით, რომ ქართველ ხალხს შეუწყვეტენ ვიზალიბერალიზაციას, ეს კიდევ უფრო მეტად არასერიოზული იქნება. პერსონალურ სანქციებზე საუბარი იქნება არასერიოზული და ხალხის მიმართ შანტაჟი – 10-ჯერ უფრო მეტად არასერიოზული, ამიტომ მგონი ჯობია, სერიოზულ თემებზე ვისაუბროთ.

მთავარი არხი, დავით კობიძე – ბატონო ირაკლი, თქვენც აღნიშნეთ, რომ ყველა ძალადობრივი ქმედება, რომლის შესახებაც გაქვთ ინფორმაცია, რომ მომდევნო საპროტესტო აქციებზე იქნება მონაწილეების მხრიდან, იქნება კანონის მთელი სიმკაცრით დასჯილი. მინდა, გკითხოთ იმ ძალადობრივ ქმედებებზე, რომლებსაც ვხედავდით თავად შინაგან საქმეთა სამინისტროს წარმომადგენლების მხრიდან მოქალაქეებზე. ამ შემთხვევაში დაწყებულია თუ არა გამოძიება, რატომ არ არიან ეს პირები ჯერჯერობით იდენტიფიცირებულები, როგორც ვიცი არ არიან და ოფიციალური განცხადება სახელმწიფო სტრუქტურებს ამასთან დაკავშირებით არ გაუკეთებიათ.
პრემიერ-მინისტრი – ჩვენ არ გვაქვს ორმაგი სტანდარტი ოპოზიციისგან განსხვავებით. თქვენ მუდმივად ხედავთ იმავე ძალადობასთან დაკავშირებით ჩვენი ოპონენტები, რადიკალური ოპოზიცია თავისი NGO-ებით, ტელევიზიებით მოქმედებს ყოველთვის ორმაგი სტანდარტით და ხშირად იწონებენ კიდეც ძალადობას. მას არა მარტო არ გმობენ, მაგალითად, თუნდაც კოლეგებზე, ჟურნალისტებზე, დეპუტატზე და ა.შ., პირიქით, იწონებენ კიდეც ძალიან ხშირად ასეთი ძალადობის ფაქტებს. ჩვენი ოპონენტებისგან განსხვავებით, გვაქვს არა ორმაგი, არამედ ერთმაგი სტანდარტი, რაც ნიშნავს იმას, რომ ძალადობას ვგმობთ ყველა მიმართულებით და რეაგირება გვექნება მასზე. რაც შეეხება გამოძიების დაწყებას, ყველა შესაბამის საკითხთან დაკავშირებით არის დაწყებული გამოძიება, ამას გარკვეული დრო სჭირდება, თუმცა ყველა ნახავს იმას, რომ ბოლომდე გავყვებით გამოძიების პროცესს.

მთავარი არხი, დავით კობიძე – კიდევ ერთი კითხვა მექნება კანონთან დაკავშირებით. ვეტოს დაადებს პრეზიდენტი, როგორც ვიცით, შემდგომ ალბათ მოტივირებული შენიშვნებიც იქნება, ვენეციის კომისიის დასკვნასაც დაელოდება ალბათ ხელისუფლება, შემდგომ გაითვალისწინებს თუ არა მმართველი უმრავლესობა შენიშვნებს, რომელსაც სავარაუდოდ მიიღებს ვენეციის კომისიისგან?
პრემიერ-მინისტრი – ყველამ ვიცით, რომ პრეზიდენტი თავად არ წერს ხოლმე საკუთარ ვეტოებს. ან NGO-ები უწერენ, ან გარედან უწერენ ხოლმე, რაც ერთი და იგივეა. ჩვენთვის მთავარია მოლაპარაკება სწორედ იმ სუბიექტებთან, რომლებმაც უნდა დაუწერონ სალომე ზურაბიშვილს ვეტო და ჩვენ ამაზე უკვე გვქონდა საუბარი. მე პირადად მქონდა საუბარი ევროკავშირის, ეუთოს წარმომადგენლებთან იმასთან დაკავშირებით, რომ ვართ აბსოლუტურად ღია ამ მსჯელობისა და დისკუსიისთვის, თუ იქნება კონკრეტული, სამართლებრივი, დასაბუთებული შენიშვნები წარმოდგენილი კანონპროექტთან დაკავშირებით. აბსოლუტურად ღია ვართ მსჯელობისთვის. თქვენ იცით, რომ დღემდე არცერთი კონკრეტული სამართლებრივი შენიშვნა არ წარმოუდგენიათ, ახლა არის დრო, იმედია, ამისთვის. თუ იქნება კონკრეტული სამართლებრივი შენიშვნები წარმოდგენილი, რა თქმა უნდა, დაიწყება მსჯელობა და მზად ვართ, ყველამ ერთად ავსახოთ ეს საკითხები კანონპროექტში.

ფორმულა, ნიკა საჯაია – მოქალაქეები აცხადებენ, რომ უცხო ქვეყნიდან ურეკავენ ამ დროისთვის დაუდგენელი პირები, აყენებენ სიტყვიერ შეურაცხყოფას, არის მუქარის არაერთი შემთხვევა, ისევე როგორც ვნახეთ კონკრეტულ პირებთან, სახლთან ე.წ ჩასაფრებები, თავდასხმა და ა.შ. ამ მიმართულებით ხართ თუ არა დაინტერესებული და დაავალეთ თუ არა იგივე შინაგან საქმეთა სამინისტროს, რაც შეიძლება მალე და ობიექტურად გამოიძიოს ეს საქმეები, რეალურად ვინ დგას ამ ყველაფრის უკან და რამდენად იქნებიან ეს ადამიანები დასჯილი?
პრემიერ-მინისტრი – ყველა საკითხზე გვქონდა მსჯელობა ძალოვან სტრუქტურებთან და ყველა საკითხზე, ნებისმიერ ფაქტზე იქნება რეაგირება, იქნება ეს ძალადობა თუ მუქარა. ყველაფერი ოპერატიულად გაკეთდება, თუმცა ფაქტების დადგენას დრო სჭირდება. მაგალითად, შარშან ლამის მთელი ქალაქი გადაწვეს, ძალადობის უამრავი ფაქტი იყო. მანქანები, ავტობუსები დაწვეს, პარლამენტი ლამის გადაწვეს, უამრავი ზიანი, მათ შორის ქონებრივი, მიადგა სახელმწიფოს და სულ ერთი კაცი იყო დაჭერილი ამ მასშტაბის ძალადობის ფონზე. რა თქმა უნდა, გამოძიებას აქვს სტანდარტი და საქართველოს შემთხვევაში აქვს ევროპულსა და ამერიკულზე მაღალი სტანდარტი, შესაბამისად, ყველა ფაქტის დადგენას სჭირდება დრო. ყველაფერი ოპერატიულად იქნება გამოძიებული.

ფორმულა, ნიკა საჯაია – პოლიცია რომ არ მიდის გამოძახებებზე, ამაზე რას იტყვით?
პრემიერ-მინისტრი – იყო რაღაც ინფორმაცია „ტვ პირველთან” დაკავშირებით, თუმცა სინამდვილეში იქ არავითარი ძალადობა არ მომხდარა. რა სპექტაკლი დაიდგა იქ, არ ვიცი. ნოდარ მელაძეს, ზოგადად, სჩვევია სპექტაკლების დადგმა. ფაქტია, რომ არანაირი ძალადობა იქ არ ყოფილა.

იმედი, ნინი მაისურაძე – მინდა, გკითხოთ იმ ვიდეოჩანაწერებზე, რომლებიც პროკურატურამ გაავრცელა და რაც ეხება აქციების ერთ-ერთ აქტიურ მონაწილე პირს, უჩა აბაშიძეს და მის მეუღლეს. როგორ შეაფასებდით თქვენ ამ ყველაფერს, ოპოზიციისგან ისმის, რომ ეს ვიდეომასალა, რაც გავრცელდა, არის ფალსიფიცირებული.
პრემიერ-მინისტრი – წარმოუდგენელი რამის მომსწრე ვართ და შემიძლია გითხრათ, რომ მხოლოდ „ნაციონალმა” შეიძლება ჩაიდინოს ასეთი სავარაუდო დანაშაული, ამ მასშტაბის გარყვნილება უბრალოდ წარმოუდგენელია. არის საუბარი ისეთი ტიპის სავარაუდო დანაშაულზე, რომელიც პირდაპირ კავშირშია გარყვნილების უმაღლეს ხარისხთან. თქვენ გახსოვთ ეს გარყვნილება ამ პოლიტიკური პარტიისგან. ეს ადამიანები იყვნენ სწორედ, ვინც კასრებში ინახავდა ათასობით კომპაქტ-დისკს, რომლებზეც ადამიანების პირადი ცხოვრება იყო ასახული. ეს სავარაუდო დანაშაული, რაც ამ შემთხვევაში არის სახეზე, იმეორებს ზუსტად იმ ხელწერას, რომელიც დამახასიათებელი იყო „ნაცმოძრაობისთვის”. აქედან გამომდინარე, გასაკვირი არაა, რომ ეს კონკრეტული სავარაუდო დამნაშავე, უჩა აბაშიძე, არის კოლექტიური „ნაცმოძრაობის” ერთ-ერთი აქტიური მხარდამჭერი. ის აქტიურად მონაწილეობდა შესაბამისი აქციების ორგანიზებაში, ეს არის აბსოლუტურად გასაგები და ლოგიკური მოვლენა. დანარჩენი გამოძიების საქმეა, მაგრამ რეალურად მე რა ინფორმაციაც მაქვს, იმ რაოდენობის ვიდეოჩანაწერზეა ლაპარაკი, რომ ამის ფალსიფიცირებაზე ვერც იქნება საუბარი, აქ არის უბრალოდ წარმოუდგენელი მასშტაბი გარყვნილებისა. რაც შეეხება დანაშაულს, დანაშაული საბოლოოდ იქნება დადგენილი სათანადო წესით სამართალდამცავი სტრუქტურების მხრიდან, მაგრამ გარყვნილება და „ნაცმოძრაობა” რომ იდენტური ცნებებია, ეს კიდევ ერთხელ გამოჩნდა ამ საქმეზე.

საზოგადოებრივი მაუწყებელი, კესო ქაფიანიძე – ბატონო ირაკლი, რამდენიმე დღის წინ მედიასთან აღნიშნეთ, რომ პარტნიორებთან შეხვედრის შემდეგ დაგრჩათ შთაბეჭდილება, რომ არსებობს დისკუსიის მზაობა. თქვენ ასევე აღნიშნეთ, რომ ვეტოს პროცედურა შეიძლება იყოს ამისთვის გამოყენებული. კონკრეტულად თუ შეგიძლიათ გვითხრათ, რას გულისხმობთ? მაგალითად, იგულისხმება თუ არა კანონპროექტისთვის სახელის შეცვლა. ოპოზიციის მხრიდან არანაირი დისკუსია არ განიხილება, მათი მოთხოვნაა კანონის გაწვევა. ვისთან დისკუსიას გულისხმობთ და კონკრეტულად რა შეიძლება შეიცვალოს?
პრემიერ-მინისტრი – ჩვენ ვგულისხმობთ უცხოელ პარტნიორებთან დისკუსიას, მე საუბარი მქონდა ევროკავშირთან და ეუთოსთან, ანუ მათთან დისკუსიისთვის ვართ მზად, რაც შეეხება ოპოზიციის დამოკიდებულებას, ეს არის აბსოლუტურად გასაგები – როგორც აქამდე ეშინოდათ მათ დისკუსიაში შემოსვლა, ზუსტად ასევე ეშინიათ დღესაც. იმიტომ, რომ სინამდვილეში კანონთან დაკავშირებით შენიშვნის წარმოდგენაც კი შეუძლებელია. როდესაც კანონი ითვალისწინებს ერთადერთ რამეს – წელიწადში ერთხელ ენჯეოების მიერ დეკლარაციის ჩაბარებას, აქ უბრალოდ რა შენიშვნა შეიძლება წარმოადგინონ, მე თეორიულადაც ვერ წარმომიდგენია. ამიტომ გაურბიან საბოლოო ჯამში თუნდაც ამ ვეტოზე საუბარს. ჩვენი მხრიდან არის მაქსიმალურად კონსტრუქციული დამოკიდებულება გამოვლენილი და ეს ინიციატივაც სწორედ ამის გამოხატულებაა. მადლობელი ვართ იმისთვის, რომ პირველად მოვისმინეთ უცხოელი პარტნიორებისგან მზაობა დისკუსიასთან დაკავშირებით. დანარჩენი ვნახოთ. ჩვენი მხრიდან იქნება აბსოლუტურად კონსტრუქციული დამოკიდებულება. ოპოზიციას რომ აქვს ეს დესტრუქციული დამოკიდებულება, გასაკვირი საერთოდ არ არის, რადგან შეუძლებელია რაიმე კონკრეტული სამართლებრივი შენიშვნა წარმოადგინო ამ კანონპროექტთან დაკავშირებით.

საზოგადოებრივი მაუწყებელი, კესო ქაფიანიძე – თქვენი მხრიდან რა იქნება მთავარი არგუმენტი, რაც გაძლევთ რწმენას, რომ თქვენი ოპონენტების ან თუნდაც საერთაშორისო პარტნიორების დარწმუნებას შეძლებთ?
პრემიერ-მინისტრი – მთავარი არგუმენტი არის ის, რომ კანონი არის კარგი. თუ ვინმე მეორე რამეს დამისახელებს, კი ბატონო, მაგრამ კანონი ითვალისწინებს ერთადერთ რამეს – ეს არის ის, რომ ორგანიზაციებმა წელიწადში ერთხელ უნდა წარადგინონ საკუთარი დეკლარაცია. დანარჩენი ყველაფერი არის ტექნიკური ნორმები, მათ შორის რას აკეთებს იუსტიციის სამინისტრო, შემდეგ რა არის სანქცია. ეს არსებითად არის ტექნიკური დანართი, რაც აქვს ძირითად რეგულაციას. ერთადერთი მთავარი რეგულაცია არის ის, რომ წელიწადში ერთხელ წარადგინონ დეკლარაცია, რაც არის გამჭვირვალობის მინიმალური სტანდარტი. ეს არის მინიმალური ევროპული სტანდარტი, რომელიც არასამთავრობო ორგანიზაციამ უნდა დააკმაყოფილოს. ამიტომ ვერავითარი სამართლებრივი შენიშვნა ვერ იქნება წარმოდგენილი კანონთან დაკავშირებით და სწორედ ამას უკავშირდება ოპოზიციის დესტრუქციული დამოკიდებულება.

ფორმულა, ნიკა საჯაია – თქვენ ისაუბრეთ უცნობ გარე ძალებსა და იქიდან მართულ პროცესზე. გვესმის ბოლო წლების განმავლობაში აქტიურად იგივე გლობალური ომის პარტია და ა.შ. ვინ არიან ესენი, რომელი ქვეყანაა, რომელი პოლიტიკოსები არიან, რომელი პარტიაა, კონკრეტულად ვის გულისხმობთ, ვინ არის საქართველოს მტერი თქვენი აზრით?
პრემიერ-მინისტრი – პირდაპირ გეტყვით, აქ საუბარი არ არის ქვეყანაზე. აქ არ იგულისხმება არც ევროკავშირი, არც აშშ, პირიქით, ევროკავშირი არის ამ ძალების ერთ-ერთი მთავარი მსხვერპლი. მისი ეკონომიკა 16,3 ტრილიონი იყო 16 წლის წინ და ახლა არის 17,3 ტრილიონი, თან ეს ინფლაციის ფონზე ხდება. ეს ნიშნავს იმას, რომ ევროკავშირის ეკონომიკამ თვისებრივად დაიხია უკან 16 წლის განმავლობაში, როცა მანამდე 5-6 წლის განმავლობაში ჰქონდათ ორმაგი ზრდა – 7 ტრილიონიდან გადასცდა 16 ტრილიონს და ამის შემდეგ დარჩა პრაქტიკულად იმავე მაჩვენებელზე. მხოლოდ ერთი ტრილიონით გაიზარდა ნომინალური ეკონომიკა, რაც ნიშნავს იმას – ინფლაციას რომ გამოაკლებ, რეალური ეკონომიკა ქვემოთ არის წასული. შესაბამისად, ევროკავშირი მთავარი მსხვერპლია ამ ძალების – ვინ არიან ეს ძალები, ეს ძალიან ბევრმა იცის. ჩვენ ვერ ვიტყვით, ეს არის იმდენად დელიკატური საკითხი, რომ ამაზე საჯაროდ საუბარმა, შეიძლება, პრობლემა შეუქმნას ჩვენს ეროვნულ უსაფრთხოებას. ამიტომ ვერავითარ შემთხვევაში ასეთი რისკის ქვეშ ჩვენ ეროვნულ უსაფრთხოებას ვერ დავაყენებთ, თუმცა იგულისხმება ძალიან კონკრეტული ძალები.