უმრავლესობა პირადი ცხოვრების ამსახველ ფარულ ჩანაწერებთან დაკავშირებით პარლამენტში საგამოძიებო კომისიის შექმნის და ამ მიმართულებით “გირჩის” ინიციატივის მხარდაჭერის აუცილებლობას ვერ ხედავს. მმართველი გუნდის წარმომადგენლები ფიქრობენ, რომ საქმეს პარლამენტი პროკურატურაზე უკეთესად ვერ გამოიძიებს.
როგორც prof-news-ს დეპუტატმა ნუკრი ქანთარიამ განუცხადა, დროებითი საგამოძიებო კომისია შედეგს ვერ დადებს, “გნიასი და წიოკი კი იქნება”. ქანთარია ფიქრობს, რომ პირადი ცხოვრების ამსახველი ფარულ ჩაწერების გავრცელების უკან “ნაციონალური მოძრაობის” ლიდერები დგანან.
“არა მგონია, გამოძიება პროკურატურაზე უკეთესად პარლამენტის წევრებმა შესძლონ. მითუმეტეს, ამ კომისიაში ისინიც უნდა შევიდნენ, ვინც ვფიქრობ, რომ ეს კადრები გაავრცელა – ვგულისხმობ “ნაციონალური მოძრაობის” ლიდერებს, რადგან ეს ჩანაწერები მათ ჰქონდათ, თავის დროზე ისინი აკეთებდნენ ამას, მათ აქვთ გატანილი საზღვარგარეთ და ახლა ისინი ამავე დროს ამ კომისიაში იყვნენ, მიმაჩნია, რომ ძალიან მცდარი იქნება. ალბათ პირიქით, უფრო კვალის დაფარვის მცდელობა იქნება”, – განუცხადა prof-news-ს ნუკრი ქანთარიამ.
უმრავლესობის კიდევ ერთი წარმომადგენლის თამაზ მეჭიაურის თქმით კი, ის დროებითი საგამოძიებო კომისიის შექმნის საკითხს მხარს იმ შემთხვევაში დაუჭერს, თუკი ინიციატორები პროკურატურის არასათანადოდ მუშაობას დაასაბუთებენ. მეჭიაური ამბობს, რომ პირადად პროკურატურისადმი უნდობლობის გამოცხადების საფუძველს ვერ ხედავს.
“მაშინ პროკურატურა საერთოდ გავაუქმოთ და კომისიები შევქმნათ. პარლამენტის საგამოძიებო კომისიას პროკურატურაზე რა უფრო მეტი ბერკეტი გააჩნია, რომ აღნიშნული საკითხის უფრო მასშტაბურად გამოძიება შესძლოს, ვიდრე მას პროკურატურა და სხვა საგამოძიებო ორგანოები იძიებს?! ამ ლოგიკით შეგვიძლია უსასრულოთ მხოლოდ საპარლამენტო კომისიები შევქმნათ და საბოლოოდ ვერაფერზე ვერ მივიდეთ, მხოლოდ პოლიტიკური განცხადებების დონეზე ავწიოთ ტემპერატურა”, – განაცხადა თამაზ მეჭიაურმა.
პარლამენტის ვიცე-სპიკერი ზვიად ძიძიგური დარწმუნებულია, რომ საქმეს დეპუტატებზე უკეთესად პროფესიონალი გამომძიებელი გამოიძიებს. მისივე თქმით, საგამოძიებო კომისიების შექმნას ძირითადად პოლიტიკური ამოცანა გააჩნია. ძიძიგური იმასაც ამბობს, რომ “პირადი ცხოვრების ამსახველი ჩანაწერების ბევრი პირადი, კერძო არქივი არსებობს და ტვინნაღრძობი ადამიანები მას სხვადასხვა ცუდი მიზნებისათვის იყენებენ”.
“დეპუტატები უფრო კარგად გამოიძიებენ საქმეს თუ პროფესიონალი გამომძიებლები? პირადად მე მიმაჩნია, რომ საქმეს პროფესიონალი გამომძიებლები უკეთესად გამოიძიებენ. რა თქმა უნდა, არ მიმაჩნია, რომ ფარულ ჩანაწერებთან დაკავშირებით საგამოძიებო კომისია პარლამენტში უნდა შეიქმნას. მთავრობამ, პარლამენტმა, ყველამ საქმე სერიოზულ კონტროლზე უნდა ვიყოლიოთ და რაც შეიძლება ხშირად მოვიკითხოთ, თუ როგორ მიდის ძიების პროცესი. უფრო კარგი გამოსავალი ასეთი ინტენსიური დაკვირვებაა, ვიდრე ის, რომ დამატებით საგამოძიებო სტრუქტურებზე ვიფიქროთ”, – განუცხადა ჟურნალისტებს ზვიად ძიძიგურმა.
პოლიტიკური გაერთიანება “გირჩის” წარმომადგენელი დეპუტატები პირადი ცხოვრების მიყურადებისა და ფარული ჩაწერა-გადაღების საქმეზე პარლამენტში დროებით საგამოძიებო კომისიის შექმნას ითხოვენ და შესაბამისი საკითხის ინიცირების მიზნით, ხელმოწერების შეგროებას იწყებენ.
როგორც პარლამენტის წევრმა ზურაბ ჯაფარიძემ განაცხადა, “აღნიშნულმა კომისიამ უნდა გამოიძიოს მარაზმი, რაც საქართველოში წლების განმავლობაში ტრიალებდა”.
მისივე თქმით, პარლამენტის საგამოძიებო კომისიის მხარდაჭერის საკითხი პარლამენტის წევრებისათვის ტესტი იქნება.
0