„ჩვენი მხრიდან, – კანონმდებლებისგან სახელმწიფო უსაფრთხოების სამსახური უმაღლეს შეფასებას იმსახურებს“, – განაცხადა ნდობის ჯგუფის ხელმძღვანელმა, თავდაცვისა და უშიშროების კომიტეტის თავმჯდომარემ, ირაკლი ბერაიამ ნდობის ჯგუფის შეხვედრის შემდეგ, სადაც საქართველოს უსაფრთხოების სამსახურის უფროსს, გრიგოლ ლილუაშვილს მოუსმინეს.
უსაფრთხოების სამსახურის უფროსმა 2022 წელს განხორციელებული საიდუმლო საქმიანობისა და სპეციალური პროგრამების შესახებ ანგარიში წარადგინა; ნდობის ჯგუფს გრიგოლ ლილუაშვილმა უსაფრთხოების გარემოზე მიაწოდა ინფორმაცია და ისაუბრა ქვეყნის წინაშე არსებული საფრთხეების და გამოწვევების პრევენციისთვის გადადგმულ ნაბიჯებზე.
„უსაფრთხოების სამსახური, ანგარიშვალდებულების მაღალი ხარისხით გამოირჩევა და არის უწყება, რომელიც გასულ წელს ყველაზე მეტჯერ წარსდგა ნდობის ჯგუფის წინაშე. ნდობის ჯგუფსა და უსაფრთხოების სამსახურს შორის თანამშრომლობა უპრეცენდენტოდ მაღალ ნიშნულზეა. მინდა განსაკუთრებული მადლობა ვუთხრა უსაფრთხოების სამსახურის თითოეულ თანამშრომელს, როგორც ფარული, ასევე ღია შემადგენლობის წარმომადგენლებს, რომელებიც 24 საათიან რეჟიმში ჩვენი ქვეყნის უსაფრთხოებისთვის მუშაობენ. სამსახურის უფროსს, სამსახურის ხელმძღვანელობას და პირად შემადგენლობას კანონმდებლების მხრიდან აქვთ და ყოველთვის ექნებათ სრული მხარდაჭერა“, – განაცხადა ირაკლი ბერაიამ.
ნდობის ჯგუფის ფორმატში, საკანონმდებლო ორგანოსთან თანამშრომლობის მნიშვნელობა, სახელმწიფო უსაფრთხოების სამსახურის უფროსმა შეაფასა და აღნიშნა, რომ უწყება პარლამენტთან თანამშრომლობას აქტიურად აგრძელებს.
„ნდობის ჯგუფის შეხვედრაზე აქტუალურ საკითხებზე, უსაფრთხოების მიმართულებით არსებულ გამოწვევებზე ვისაუბრეთ და განვიხილეთ ისეთი მნიშვნელოვანი მიმართულებები, როგორიც არის ოკუპაცია, ტერორიზმი და სწორი მიგრაციული პოლიტიკა“, – აღნიშნა გრიგოლ ლილუაშვილმა.
0