საპარტნიორო ფონდის დელეგაციამ შეხვედრები მადრიდსა და ბარსელონაში გამართა

საპარტნიორო ფონდის აღმასრულებელმა დირექტორმა დავით საგანელიძემ და საინვესტიციო დეპარტამენტის ხელმძღვანელმა გიორგი ჩერქეზიშვილმა ესპანეთში ვიზიტის ფარგლებში, ცნობილი ხორცპროდუქტების მწარმოებელი ესპანური კომპანია DeRAZA Iberico მოინახულეს და საწარმოო პროცესი დაათვალიერეს. კომპანია ესპანეთში იბერიკოს ჯიშის ღორების ფერმებს ფლობს და ხორცპროდუქტების ერთ ერთი უმსხვილესი მწარმოებელია.
ფონდის დელეგაცია კომპანიის დამფუძნებლებს რეხინო დიაზ დელ რიოსა და ლუის სანზ კასადოს შეხვდა. შეხვედრას ესპანეთში სამუშაო ვიზიტით მყოფი საქართველოს გარემოსა და ბუნებრივი რესურსების დაცვის მინისტრი გიგლა აგულაშვილი დაესწრო. მხარეებმა სამომავლო თანამშრომლობის პერსპექტივები განიხილეს. კომპანია საქართველოში კახური ღორის ჯიშითა და საერთაშორისო ბაზრებზე მისი კომერციალიზაციის საკითხით არის დაინტერესებული.
ფონდის დელეგაციის წევრები ვიზიტის ფარგლებში მსოფლიოში აღიარებული გამაჯანსაღებელი სპა და ბალნეოლოგიული ცენტრების მფლობელი კომპანია Relais of Termal Group-ის დამფუძნებელს, ესპანეთის ტურიზმის ხარისხის კონტროლის ინსტიტუტისა და ბალნეოლოგიური ცენტრების ასოციაციის პრეზიდენტს მიგელ მირონესს შეხვდნენ. შეხვედრის ფარგლებში მხარეებმა საქართველოში სამედიცინო ტურიზმის განვითარებაზე ისაუბრეს და ერთმანეთს სამკურნალო ტურიზმის დარგში არსებული გამოცდილება გაუზიარეს. Relais of Termal Group-ი დამფუძნებელი მიგელ მირონესი ფონდის მოწვევით საქართველოში ჩამოსვლას ივნისში გეგმავს.
ესპანეთის დედაქალაქ მადრიდში ფონდის დელეგაცია საინვესტიციო ჯგუფ EEI Network -ის პარტნიორს პაბლო ბოტეიას შეხვდა. კომპანია ახლო აღმოსავლეთ ევროპის ქვეყნებში საინვესტიციო პროექტებს ახორციელებს. შეხვედრაზე მხარეებმა საქართველოს საინვესტიციო გარემოზე, ქვეყნის საინვესტიციო პოტენციალსა და ერთობლივი პროექტების განხორციელების შესაძლებლობებზე ისაუბრეს. კომპანია EEI Network -ის პარტნიორი პაბლო ბატეიასი საქართველოს ჯანდაცვისა და ტურიზმის სფეროებში ინვესტირებით არის დაინტერესებული.
მადრიდში ოფიციალური ვიზიტის ფარგლებში შეხვედრა შედგა კომპანია Nemesis Сapital-ის მმართველ დირექტორებთან, ხოსე სანტოს ვალვერდესა და ანტონიო დურან ლოპესთან. ასევე, Inercia 24-ის აღმასრულებელ დირექტორთან ჰუგო სანჩეს მუნოზთან. საპარტნიორო ფონდის დელეგაციამ ტურიზმის ინდუსტრიაში ჩართულ კომპანიებს ფონდის მუშაობის პრინციპები და ქვეყნის საინვესტიციო გარემო გააცნო. საერთშორისო კომპანიების მთავარი საქმიანობა მსოფლიოს ტურისტული ქვეყნების შესწავლა და სასტუმროების ბიზნესში სტრატეგიული ინვესტორის მოძიებაა. აღნიშნული კომპანიები სხვადასხვა ფონდების კაპიტალს მართავენ და რენტაბელურ ბიზნესებში აბანდებენ. მათი ინტერესის სფერო მცირე და საშუალო ზომის ჰიდროსადგურების მშენებლობა და ტურისტული ინდუსტიის სექტორია.
საპარტნიორო ფონდის დელეგაციის საქმიანი ვიზიტი ესპანეთში დასრულდა.