საგარეო საქმეთა მინისტრის დავით ზალკალიანის შეფასებით გერმანიის კანცლერის ანგელა მერკელის ვიზიტი საქართველოში კიდევ ერთხელ გახლავთ იმის დადასტურება, თუ რამდენად მნიშვნელოვანი ადგილი უჭირავს საქართველოს გერმანიის პოლიტიკურ დღის წესრიგში.
„ძალიან მნიშვნელოვანია ევროკავშირის ერთ-ერთი წამყვანი ქვეყნის – გერმანიის კანცლერის ვიზიტი საქართველოში. გამომდინარე იქიდან, რომ ბოლოს იგი საქართველოში 10 წლის წინ იყო, ასევე იმ რეალობიდან და იმ გამოწვევებიდან გამომდინარე, რომელიც ჩვენს ქვეყანას დღეს აქვს. ეს არის კიდევ ერთხელ მხარდაჭერა საქართველოს ხელისუფლების მიერ განხორციელებული რეფორმების, ასევე, იმ საგარეო პოლიტიკური კურსის, რომელსაც საქართველოს ხელისუფლება ატარებს, არის მხარდაჭერა საქართველოს ევროპული და ევროატლანტიკური ინტეგრაციის, ასევე, საქართველოს სამშვიდობო პოლიტიკის,“-განაცხადა მინისტრმა.
დავით ზალკალიანი დიდი ბრიტანეთის საგარეო საქმეთა მინისტრის ჯერემი ჰანტის მიერ და აშშ-ის სენატის საგარეო ურთიერთობათა კომიტეტში რუსეთის საკითხზე გამართული მოსმენისას გაკეთებულ საქართველოს მხარდამჭერ განცხადებებს დადებითად აფასებს. მისი თქმით, აღნიშნული განცხადებები ადასტურებს, რომ საქართველოს საერთაშორისო თანამეგობრობის დღის წესრიგში მნიშვნელოვანი ადგილი აქვს დათმობილი:
„მაშინ, როდესაც, გერმანიის კანცლერი ჩამოდის საქართველოში, მაშინ როდესაც ბრიტანეთის საგარეო საქმეთა მინისტრი აშშ-ში ვიზიტის დროს, თავის გამოსვლაში მნიშვნელოვან ადგილს უთმობს საქართველოს და ოკუპირებულ ტერიტორიებზე შექმნილ სიტუაციას, მაშინ, როდესაც აშშ-ს სენატში იმართება მოსმენა, რომელზეც წარსდგნენ აშშ-ს მაღალი თანამდებობის პირები და დასმულ კითხვებშიც და მათ მიერ გაკეთბულ განცხადებაშიც მნიშვნელოვანი ადგილი აქვს დათმობილი საქართველოს. იყო განცხადებები გაკეთებული, როგორც სენატორების მხრიდან, ისე ვეს მიჩელის მხრიდან და ეს კიდევ ერთხელ მიანიშნებს იმაზე, რომ საერთაშორისო თანამეგობრობის დღის წესრიგში საქართველოს მნიშვნელოვანი ადგილი უკავია“- განაცხადა დავით ზალკალიანმა.
მინისტრის თქმით, აღნიშნული წარმოადგენს მკაფიო პასუხს ოპონენტების კრიტიკაზე, რომ თითქოსდა საქართველო გამქრალია საერთაშორისო თანამეგობრობის დღის წესრიგიდან.
0