როცა ჩემგან ინტერვიუს იღებენ, ქიმიის გაკვეთილზე მგონია თავი, მასწავლებელმა ყველაფერი რომ იცის და შენ, როგორც მოსწავლეს, ფორმულის დასახელებას გთხოვს, – ამის შესახებ საქართველოს პრეზიდენტმა მასმედიის წარმომადგენლებთან შეხვედრისას განაცხადა.
მისივე თქმით, ახლა ქვეყანა ძალზე მნიშვნელოვან, დემოკრატიული განვითარების პროცესში იმყოფება, სადაც ძალიან ბევრია დამოკიდებული მასმედიაზე.
“ქართველებს ძალიან აინტერესებს მასმედია და პოლიტიკა, მასმედია უყვართ და პოლიტიკოსები ეზიზღებათ. უყვართ რეპორტიორები და კითხვები, რომლებსაც ისინი სვამენ. მათ ვეზიზღებით ჩვენ, პოლიტიკოსები, მაგრამ საზოგადოება პოლიტიზირებულია. მე ყოველთვის შთაბეჭდილების ქვეშ ვიყავი იმ დონით, რომელიც საქართველოს მასმედიაში არის. როგორ მუშაობს, როგორ ფუნქციონირებს, რამდენად კარგად არიან განათლებული ჟურნალისტები. რამდენად კარგად ემზადებიან ინტერვიუსთვის. როცა ინტერვიუს იღებენ ჩემგან, თითქოს სკოლის მოსწავლე ვარ, ქიმიის გაკვეთილზე ვაბარებ გაკვეთილს, მასწავლებელმა ყველაფერი იცის, და მერე შენ, როგორც მოსწავლეს გთხოვს ფურმულის დასახელებას. შენ იძაბები თუ რთული კითხვები ისმის. მე ყოველთვის განცვიფრებული ვარ რამდენად კარგად იცნობენ ჟურნალისტები იმ საკითხებს, რომელზეც საუბარია. გაცილებით მომზადებული არიან, ვიდრე მე. როცა ინტერვიუ სრულდება და მივდივარ, შთაბეჭდილება მიმყვება”, – განაცხადა მარგველაშვილმა.
0