პარლამენტმა „საავტორო და მომიჯნავე უფლებების შესახებ“ კანონში ცვლილებები პირველი მოსმენით, 79 ხმით მიიღო.
კანონპროექტი ცვლილებების ერთ-ერთმა ინიციატორმა, უმრავლესობის წევრმა გრეტა წიწავამ წარადგინა. მისი თქმით, მოქმედი კანონის თანახმად, ექსკლუზიურად კითხვის უნარის შეზღუდვის მქონე პირებისათვის ნაწარმოების მისაწვდომ ფორმატში რეპროდუცირება და გავრცელება საჭიროებს ავტორის ან საავტორო უფლების სხვა მფლობელის თანხმობასა და მოთხოვნის შემთხვევაში, საავტორო ჰონორარის გადახდას. წარმოდგენილი ცვლილების მიზანია, აღნიშნული წესის მოქმედების პარალელურად, კონკრეტულ პირთა ჯგუფისათვის (ბენეფიციარი, ავტორიზებული პირი) შექმნას სამართლებრივი შესაძლებლობა ნაწარმოების მისაწვდომ ფორმატში რეპროდუცირებისა და გავრცელებისათვის ავტორის ან საავტორო უფლების სხვა მფლობელის თანხმობისა და მისთვის საავტორო ჰონორარის გადახდის წინაპირობების გარეშე. კანონპროექტის მიღების შემდეგ, კითხვის უნარის შეზღუდვის მქონე პირი მიიღებს სპეციალურ სტატუსს – ბენეფიციარი და შედეგად, მიენიჭება უფლება მარტივად და ფინანსური დანახარჯების გარეშე მოიპოვოს არსებული ნაბეჭდი ნაწარმოებების ადაპტირებული ფორმატები. ეროვნულ დონეზე გაიზრდება მისაწვდომ ფორმატში რეპროდუცირებული ნაწარმოებების რაოდენობა ადგილობრივი ავტორიზებული პირის მიერ რეპროდუცირებისა და უკვე რეპროდუცირებული მასალის სხვა სახელმწიფოდან იმპორტის საშუალებით, თუ საქართველო გახდება შესაბამისი ორმხრივი ან მრავალმხრივი საერთაშორისო შეთანხმების მონაწილე.
0