ბიურომ რიგგარეშე სესიის დღევანდელი სხდომის დღის წესრიგის შესახებ იმსჯელა. კენჭსაყრელ და განსახილველ საკითხებს რამდენიმე კანონპროექტი დაემატა. პარლამენტის თავმჯდომარის, არჩილ თალაკვაძის განცხადებით, საორგანიზაციო საკითხებშია ეკა ბესელიას საკანონმდებლო ინიციატივა „საარჩევნო კოდექსში“ განსახორციელებელ ცვლილებასთან დაკავშირებით, რომელზეც ინიციატორმა კიდევ ერთხელ მიმართა ბიუროს. დამოუკიდებელმა დეპუტატმა, ეკა ბესელიამ კანონპროექტის მიმდინარე კვირაში განხილვის მნიშვნელობაზე ისაუბრა. „ევროპული საქართველოს“ წარმომადგენელმა სერგი კაპანაძემ მხარი დაუჭირა ეკა ბესელიას კანონპროექტს და მისი დაჩქარებული წესით განხილვა მოითხოვა. როგორც კაპანაძემ აღნიშნა, გაუგებარია „ქართული ოცნების“ პოზიცია, თუ რატომ სურს, რომ გადადოს კანონპროექტის განხილვა მომდევნო სესიისთვის. სერგი კაპანაძეს პარლამენტის თავმჯდომარემ, არჩილ თალაკვაძემ უპასუხა და აღნიშნა, რომ გუნდმა, რომელმაც მხარი არც საკონსტიტუციო ცვლილებას და არც საარჩევნო ცვლილებებს არ დაუჭირა, ნიშნის მოგებით საუბარი, რომ „ქართული ოცნება“ როგორც წესი, კანონპროექტებს აგდებს, სასაცილოა.
„თქვენ რომ საუბრობთ, საარჩევნო კანონმდებლობასთან დაკავშირებულ ცვლილებებს, როგორც წესი, ჩააგდებთო, ეს არის სასაცილო ამბავი. თქვენ ამას როგორ გვეუბნებით, როცა ხართ იმ გუნდის წარმომადგენელი, რომელმაც საკონსტიტუციო ცვლილებას მხარი არ დაუჭირა და საარჩევნო კოდექსის კენჭისყრაზე საერთოდ არ შემოხვედით“, – მიმართა სერგი კაპანაძეს არჩილ თალაკვაძემ.
რაც შეეხება ელექტრონულ კომუნიკაციებს, პარლამენტის თავმჯდომარემ აღნიშნა, რომ სერგი კაპანაძე იყო ერთადერთი, რომელიც კომიტეტის სხდომებზე ამ თემასთან დაკავშირებით აქტიურად გამოდიოდა.
„როგორც ჩანს, თქვენ განსაკუთრებული დაინტერესება გაქვთ ამ საკითხზე და ღრმად ხართ ამაში ჩახედული. თუ ღრმად ხართ ჩახედული, პირდაპირ გეტყვით, რომ საკითხი ეხება ქვეყნისთვის სტრატეგიულ, კრიტიკულ ინფრასტრუქტურას და სახელმწიფოს აქ აქვს ერთადერთი მოტივაცია, რომ კრიტიკული და სტრატეგიული ინფრასტრუქტურა იყოს დაცული და უსაფრთხოების სტანდარტი ამ მიმართულებით იყოს უზრუნველყოფილი. ყველა დანარჩენ სადავო საკითხზე ჩვენ გვაქვს სამუშაო პროცესი სექტორთან და სექტორთან ერთად ვცდილობთ, რომ რაც შეიძლება ფართო კონსენსუსით მივიღოთ ცვლილებები. რა ლოგიკასაც თქვენ ავითარებთ ახლა ქალბატონი ეკა ბესელიას ინიციატივაზე, ის ლოგიკა არის დანარჩენ ინიციატივებზეც. დაჩქარებული წესით რაც შემოდის, ეს არის შეთანხმების შედეგად ინიცირებული პროექტები“, – მიმართა სერგი კაპანაძეს არჩილ თალაკვაძემ.
რაც შეეხება ეკა ბესელიას ინიციატივას, არჩილ თალაკვაძის განცხადებით, ეს თემა იყო განხილული 1 წლის განმავლობაში სამუშაო ჯგუფის ფარგლებში.
მისივე ინფორმაციით, ამ საკითხზე შეთანხმება ვერ შედგა. „ჩვენ გამოვიტანეთ ის ცვლილებები, რომელზეც შეთანხმება შედგა და „ქართულმა ოცნებამ“ ყველა ამ შეთანხმებას მხარი პირნათლად დაუჭირა და კიდევ რამდენიმე პოლიტიკურმა ჯგუფმა“, – აღნიშნა პარლამენტის თავმჯდომარემ.
საკითხს ფრაქცია „ნაციონალური მოძრაობის“ თავმჯდომარე რომან გოცირიძე მემორანდუმის გაფორმებაზე და კანონში შეტანაზე წინადადებით გამოეხმაურა. მისი თქმით, მმართველი გუნდი კანონებს არ ასრულებს. მისივე მტკიცებით, აუცილებელია, რომ ეს კანონპროექტი გავიდეს დაჩქარებული წესით.
„ჩვენ არ გვინდა საარჩევნო უბანთან ვინმე იმყოფებოდეს. გვაქვს დრო, არის საკნონმდებლო ინიციატივა, რომელიც სხვა ძალიან კარგ ცვლილებებსაც ითვალისწინებს, რომელიც უფრო სამართლიანს გახდის არჩევნებს. მოგიწოდებთ, შეასრულეთ საკუთარი მოწოდება – დავაკანონოთ, რომ არავინ იყოს საარჩევნო უბანთან“, – განაცხადა გოცირიძემ.
რომან გოცირიძის წინადადებას პარლამენტის თავმჯდომარემ უპასუხა:
„თქვენი დარღვეული კანონების საფასურს დღემდე იხდიან საქართველოს მოქალაქეები. მათ შორის, აგერ ბოლო თვეების განმავლობაში სტრასბურგის სასამართლომ მილიონობით ჯარიმა დააკისრა სახელმწიფოს და თქვენ როგორ გველაპარაკებით იმაზე, რომ კანონებს ჩვენ არ ვასრულებთ? სანამ ჩვენ დაგეხმარებით, სჯობს პარტიაში შეაგროვოთ ფული და გადაიხადოთ ის ჯარიმები, რაც სახელმწიფოს გადასახდელია“.
არჩილ თალაკვაძემ ოპოზიციის წარმომადგენლებს განუმარტა, რომ რეფორმაზე მუშაობისას, საკანონმდებლო და აღმასრულებელი ხელისუფლების თანამშრომლობა კანონშემოქმედებითი საქმიანობის ჩვეულებრივი ნაწილია.
„როგორც ჩანს, ერთწლიანმა ბოიკოტმა და სხდომების გაცდენამ ძალიან ცუდი გავლენა მოახდინა თქვენზე. გეტყობათ, რომ ძალიან გაოცებული ხართ ელემენტარული რამით, რომელიც არის საპარლამენტო სამუშაოს ანი და ბანი. ნუ გიკვირთ, როდესაც, მაგალითად, საფინანსო-საბიუჯეტო კომიტეტი მთავრობასთან ერთად მუშაობს ბიუჯეტზე, ან განათლების კომიტეტი თანხმდება რეფორმის საკანონმდებლო პაკეტზე და მერე ხდება ინიცირება, ეს არის კანონშემოქმედებითი საქმიანობის ანი და ბანი. ამიტომ, სხდომებს ნუ გააცდენთ – როგორც ჩანს, დაგავიწყდათ, რა არის საპარლამენტო პროცესი“, – მიმართა ოპონენტებს არჩილ თალაკვაძემ.
პარლამენტის თავმჯდომარე გამოეხმაურა ოპოზიციის წარმომადგენელთა კიდევ ერთ განცხადებას იმის შესახებ, რომ მმართველი გუნდი კანონებს არ აღასრულებს. მან ოპონენტებს შეახსენა, რომ ოპოზიციამ 120-30-ზე ინიციატივას მხარი არ დაუჭირა.
„ერთი მაგალითი მარტო ის კმარა, რომ 120/30-ზე იყო თქვენი ინიციატივა – პროპორციულთან მიახლოებული სისტემა 2020 წელს. ეს ინიციატივა შეთანხმდა ფართო პოლიტიკურ ჯგუფში, პარტნიორებთან ერთად, მერე ყველანი გამოვედით, საზოგადოებას ვუთხარით, რომ ამას დავამტკიცებდით, დავაინიცირეთ და თქვენ მხარი არ დაუჭირეთ. პირიქით მოხდა, კი არ ჩავაგდეთ, ჩვენ მივიღეთ და თქვენ ოპოზიციამ თქვენს საკუთარ მოთხოვნას არ დაუჭირეთ მხარი, ხალხს ეუბნებოდით, რომ მხარს ვუჭერთ, მაგრამ ხმას ვერ ვაძლევთო. ასეთი გასაოცარი პოლიტიკური კლასი შესთავაზეთ საზოგადოებას“, – განაცხადა პარლამენტის თავმჯდომარემ.
მან ოპონენტებს შეახსენა ის დარღვევებიც, რომელიც წინა ხელისუფლების დროს ხდებოდა და რომლის გამოც, სახელმწიფოს სტრასბურგის სასამართლოს მიერ დაკისრებული ფინანსური ჯარიმების გადახდა უწევს.
„გინდათ ფინანსური შედარება გავაკეთოთ, გინდათ უფლებრივი შეფასება. წამებას და არაადამიანურ მოპყრობას ადარებთ კონკრეტული ავტორიზაციის აქტის გასაჩივრებას? სიცოცხლის უფლების დარღვევას ადარებთ იმას, რომ თეა წულუკიანი ერთი კვირის წინ რომ იყო მოსული, ამ კვირაშიც მოვიდეს? ან ბიზნესებს ღამღამობით რომ იბარებდით და ართმევდით ქონებას, მაგ საკუთრების უფლების დარღვევას ადარებთ აქ თქვენი ფრაქციის პროცედურულ მოთხოვნას, რომ მაინცდამაინც პლენარული სხდომის დღეს გამართეთ საკომიტეტო შეხვედრა? ან რომან გოცირიძე აქ ფინანსების სპეციალისტი რომ არის და 6 მილიონი მარტო ამ თვეში რომ დაგვაკისრა სტრასბურგმა თქვენი ხელისუფლების დარღვევებზე, რა ფინანსურ ჯარიმებზე მელაპარაკებით და საერთოდ, ვის ადარებთ? ვერანაირი ფული ვერ გამოხატავს იმ დარღვევებს, რაზეც თქვენ ხართ პასუხისმგებელი. სტრასბურგში 3 ათასი საჩივარი შედიოდა ყოველწლიურად, 10 წელია გასული იმ დარღვევების მერე და საქართველოს მოქალაქეებს თქვენი დარღვევების გადახადა უწევთ ჯარიმების სახით. გსურთ, რომ ისტორიული მიმოხილვა გავაკეთოთ და დავუბრუნდეთ იმას, რაზეც ათასჯერ გვისაუბრია? მოდი, დავანებოთ ამას თავი, მოდი, მომავალზე ვიფიქროთ. ჩვენ ვართ მომავალზე ორიენტირებული პოლიტიკური ძალა. პარლამენტი არის მომავალზე ორიენტირებული და ფიქრობს, რა უნდა გააკეთოს მომავალში იმისთვის, რომ ჩვენი ქვეყნის განვითარების პროცესს ხელი შეუწყოს და ჩვენმა მოქალაქეებმა უკეთეს ქვეყანაში იცხოვრონ. მოდით, ამ ამოცანაზე ჩამოვყალიბდეთ“, – განაცხადა არჩილ თალაკვაძემ.
რომან გოცირიძეს ასევე ვიცე-სპიკერმა, მამუკა მდინარაძემ უპასუხა. მისი თქმით, კოდექსში ვერ ჩაიწერება, რომ 25-მეტრის რადიუსში საარჩევნო უბნებთან არავინ იდგეს, თუმცა, ამის დარეგულირება მემორანდუმით შეიძლება, რაზეც ოპოზიცია არ თანხმდება, რადგან მათი მოტივაცია „ქაოსის მოწყობაა“.
„მემორანდუმი არის ყველას პასუხისმგებლობა და ამის აღება არ გინდათ, მერე ვიღაც მობილური ტელეფონით გადაიღებს, რომ შევარდნენ „ნაციონალური მოძრაობის“ პარტიული აქტივის წარმომადგენლები და იქ რაღაცები აკეთეს. ეს არ გინდათ. ჩვენი მოტივაცია გითხარით რა არის. თქვენი მოტივაციაა, რომ ვიღაცებმა ირბინონ, რაღაც არიონ, ქაოსი მოაწყონ. არ გინდათ და ხელს არ აწერთ. ატყუებთ ხალხს, ეს ხალხი არ ტყუვდება “, – მიმართა მამუკა მდინარაძემ რომან გოცირიძეს.
რაც შეეხება კომუნიკაციებს, მამუკა მდინარაძის თქმით, მსგავსი რეგულაცია რომ ჰქონოდა წინა ხელიუსუფლებას, სტრატეგიულ ობიექტებს რუსეთს ვეღარ მიყიდიდა.
„თქვენ მგონი მართლა რაღაც იმედი გაქვთ ერთმანეთს რომ ელაპარაკებით ხოლმე პარტიაში, არ გაწყობთ მსგავსი რეგულაციის განხილვაც კი. თეორიულადაც არ გინდათ დაშვება ამის, იმიტომ, რომ როგორც გააკეთეთ 2012 წლამდე სტრატეგიული ობიექტების რაღაც მნიშვნელოვანი ნაწილი მიყიდეთ რუსებს და ვითომ ანტირუსულ კამპანიებს თქვენ ალაგებთ ამ ქვეყანაში, ეს გინდათ ალბათ გააგრძელოთ და ეს გაწუხებთ და ეს შინაგანი შფოთვები გაქვთ და როცა კრიტიკულ ინფრასტრუქტურაზეა ლაპარაკი, რას ქვია ამ თემას განიხილავთო, რას ქვია ეროვნული ინტერესებიდან გამოდიხართო ამბობთ. აი აქ ხართ დღემდე და ვერ ხვდებით, რომ ამას ვეტყვით ხალხს და ხალხიც გაიგებს“, – განაცხადა მამუკა მდინარაძემ.
პარლამენტის თავმჯდომარის პირველი მოადგილის გიორგი ვოლსკის განცხადებით, საერთაშორისო სტანდარტის საარჩევნო კოდექსი, რომელიც მიღებულია პარტიების, არასამთავრობო ორგანიზაციების, ექსპერტების, ძალიან ფართო ჩართულობით, არ ტოვებს რაიმე მანიპულაციის საშუალებას.
„ვინც ამ დებატებს ადევნებს თვალ-ყურს, შთაბეჭდილება შეექმნება ისეთი, თითქოს ოპოზიციამ ყველაფერი მაღალ დონეზე გააკეთა და ახლა დარჩათ ერთი საკითხი, რომელსაც ჩვენ ხელის „სავსავით“ არ ვიღებთ იმიტომ, რომ თურმე გვინდა დავიტოვოთ რაღაც გასაძრომი, რაღაც მოვშალოთ ან არასწორად ჩავატაროთ. ყველას გაუჩნდა ეჭვი, რომ ამათ არჩევნები არ უნდათ და აქედან გამომდინარე, დღეს ხდება ამის კომპენსირება. ამაში იყენებენ თუ არა ეკა ბესელიას შემოთავაზებულ წინადადებას, ეს მეორე საკითხია. არ მინდა ვიფიქრო, რომ ეს არის შეთანხმებული. მთავარი თემა არის, რომ „საარჩევნო კოდექსი“, რომელიც მივიღეთ პარტიების, არასამთავრობო ორგანიზაციების, ექსპერტების, ძალიან ფართო ჩართულობით, არ ტოვებს რაიმე მანიპულაციის საშუალებას და ჩვენ ამ მანიპულაციას არ ვაპირებთ. ვინც აპირებს ეგ ჩვენ ვიცით“, – განაცხადა გიორგი ვოლსკიმ.
0