ოზურგეთის მუნიციპალიტეტის კულტურული მემკვიდრეობის ძეგლებზე ტურისტული ინფრასტრუქტურის მოწყობისა და ინტეგრირების პროექტს კულტურული მემკვიდრეობის დაცვის ეროვნული სააგენტო მუნიციპალური განვითარების ფონდთან და ადგილობრივ თვითმმართველობასთან თანამშრომლობით გეგმავს. გურიის რეგიონში სააგენტოსა და ფონდის ერთობლივი სამუშაო ჯგუფის ვიზიტისას უკვე განისაზღვრა საკულტო და საფორტიფიკაციო ნაგებობების წინასწარი ნუსხა, რომლებზეც მცირე სარეაბილიტაციო სამუშაოებთან ერთად ინფრასტრუქტურული კეთილმოწყობის პროცესიც წარიმართება.
რეგიონის სახელმწიფო რწმუნებულთან და ადგილობრივი ხელისუფლების წარმომადგენლებთან ერთად, ხელსაყრელი ადგილმდებარეობისა და ტურისტული პოტენციალის განსაზღვრის მხრივ უწყებათა ხელმძღვანელების მიერ, პირველ ეტაპზე 4 კულტურული მემკვიდრეობის ძეგლი შეირჩა. სათანადო საპროექტო დოკუმენტაციის საფუძველზე ფიზიკური სამუშაოები ლიხაურის ციხეზე, ასკანის ციხეზე, კონჭკათის მამათა მონასტერზე და ჯუმათის ეკლესიაზე მიმდინარე წელს დაიწყება. კონჭკათის მონასტრის გარდა, სადაც სააგენტოს დაფინანსებითა და ორგანიზებით დასრულდა ტაძრის სარეაბილიტაციო პროცესი, კულტურული მემკვიდრეობის ძეგლებზე დაგეგმილი სამუშაოები მოიცავს არქიტექტურული ნაგებობების რეაბილიტაციას, მათ სტრუქტურულ გამაგრებას, ტერიტორიებზე გადასახედი მოედნებისა და საფეხმავლო ბილიკების მოწყობას, საკომუნიკაციო გზების მოწესრიგებასა და განათების სისტემების მონტაჟს. მოსამზადებელ და ძირითად ეტაპებზე პროექტში მონაწილე უწყებებს შორის წინასწარ უკვე განსაზღვრულია სამოქმედო პროგრამა. კულტურული მემკვიდრეობის დაცვის ეროვნული სააგენტო ოთხივე ობიექტზე განსახორციელებელი სამუშაოებისთვის პროექტებს მოამზადებს. ადგილობრივი თვითმმართველობები ძეგლების სარეაბილიტაციო-ინფრასტრუქტურული პროექტის მოსამზადებელ ეტაპს უზრუნველყოფენ, რაც ტერიტორიისა და არქიტექტურული ნაგებობების ხე-მცენარეებისაგან დადგენილი წესით გაწმენდას ითვალისწინებს. მუნიციპალური განვითარების ფონდი კი ფიზიკური სამუშაოების პროცესს დააფინანსებს.
კულტურული მემკვიდრეობის ძეგლების სარეაბილიტაციო-ინფრასტრუქტურული პროექტების განხორციელება რეგიონის ტურისტული პოტენციალის ათვისების ერთ-ერთი მნიშვნელოვანი კომპონენტი იქნება, რაც თავის მხრივ ადგილობრივი თემისთვის ეკონომიკური განვითარების მყარ საფუძველს შექმნის. სამომავლოდ კულტურული მემკვიდრეობის დაცვის ეროვნული სააგენტო რეაბილიტირებული ძეგლების ბაზაზე საგანმანათლებლო ცენტრების ამოქმედებასაც გეგმავს.
კულტურული მემკვიდრეობის 4 ძეგლზე სარეაბილიტაციო-ინფრასტრუქტურული პროექტი გაზაფხულიდან დაიწყება. ფიზიკური სამუშაოები არქიტექტურულ ნაგებობებსა და მიმდებარე ტერიტორიებზე 2020 წლის ბოლომდე უნდა დასრულდეს.
0