“კონსერვატორების“ რამდენიმე წევრმა არჩევნებში მონაწილეობა შესაძლოა “ოცნების“ სიით ან მაჟორიტარი კანდიდატის სახით მიიღოს

განიხილება “კონსერვატიულ პარტიასთან“ არა კოალიციური გაერთიანების შექმნის, არამედ პარტიის ცალკეულ წევრებთან ინდივიდუალური თანამშრომლობის საკითხი, – ამის შესახებ პარლამენტის ვიცე-სპიკერმა მანანა კობახიძემ განაცხადა.
დეპუტატი ხაზგასმით აღნიშნავს, რომ საუბარია პარტიასთან არა საარჩევნო ბლოკის რეჟიმში თანამშრომლობაზე, არამედ “ქართული ოცნების“ მიერ მათი ცალეული წევრის მაჟორიტარ კანდიდატებად ან საარჩევნო სიით წარდგენაზე.

“აქ საუბარი არ არის რაიმე კოალიციურ გაერთიანების ჩამოყალიბებაზე, საარჩევნო ბლოკის შექმნაზე. “ქართული ოცნება“ საპარლამენტო არჩევნებში დამოუკიდებლად გადის – როგორც ითქვა, ზუსტად ასე ხდება. თუმცა მოსალოდენლია, ინდივიდუალური თანამშრომლობა “კონსერვატიული პარტიის“ გარკვეულ წევრებთან. ეს შეიძლება წარმოდგენილი იყოს მაჟორიტარი დეპუტატობის კანდიდატის სახით, შეიძლება იყოს პარტიულ სიაში ანუ საუბარია ცალკეულ ადამიანებზე, ინდივიდებზე და არა პარტიაზე, საუბარია იმაზე, რომ ამ პარტიის რამდენიმე წევრი “ქართული ოცნების“ სიით თუ “ქართული ოცნებისგან“ დაყენებული მაჟორიტარი დეპუტატობის კანდიდატის სახით შეიძლება წარსდგეს საპარლამენტო არჩევნებში. ამის პრეცედენტი უკვე იყო, როცა გია ჟორჟოლიანი და გია გაჩეჩილაძე “ქართული ოცნების“ სიაში იყვნენ, თუმცა სხვა პარტიის წარმომადგენლები არიან. ჯერჯერობით სიის ფორმირების და მაჟორიტარების შერჩევის პროცესი გრძელდება, რაც უახლოეს პერიოდში დასრულდება. ამჟამად სამუშაო პროცესი დასრულებული არ არის“, – განაცხადა კობახიძემ.

“კონსერვატიულმა პარტიამ”, როგორც დამოუკიდებელმა საარჩევნო სუბიექტმა, საპარლამენტო არჩევნებში, შესაძლოა მონაწილეობა არ მიიღოს. თუმცა განიხილება “კონსერვატორთა“ არჩევნებში “ქართული ოცნების“ სიით კენჭისყრის საკითხი. ამასთან, პარლამენტში არსებული ინფორმაციით, დაგეგმილია რამდენიმე მაჟორიტარულ ოლქში, მაჟორიტარობის კანდიდატებად “ქართული ოცნების“ მიერ “კონსერვატორთა“ ლიდერების წარდგენა. საუბარია ზვიად ძიძიგურზე, გიგა ბუკიასა და პაატა კვიჟინაძეზე.