საქართველოს პარლამენტის თავმჯდომარემ, რომელიც ოფიციალური ვიზიტით პოლონეთის რესპუბლიკაში იმყოფება, ვიზიტის პირველ დღე ჟურნალისტებთან საუბრისას შეაჯამა.
ირაკლი კობახიძის განცხადებით, დღეს გამართულ მნიშვნელოვან შეხვედრებზე საქართველოსა და პოლონეთს შორის არსებულ მეგობრობასა და თანამშრომლობის გაღრმავების პერსპექტივებზე ისაუბრეს. პარლამენტის თავმჯდომარემ ყურადღება საქართველოსა და პოლონეთის პარლამენტებს შორის დღეს გაფორმებული შეთანხმების მნიშვნელობაზე გაამახვილა.
„დღეს გვქონდა ძალიან მნიშვნელოვანი შეხვედრები პოლონეთის პრემიერ-მინისტრთან, ასევე, ორივე პალატის სპიკერებთან. ვისაუბრეთ ჩვენს თანამშრომლობაზე, მეგობრობაზე პოლონელებსა და ქართველებს, პოლონეთის სახელმწიფოსა და საქართველოს სახელმწიფოს შორის. ვისაუბრეთ ჩვენი თანამშრომლობის გაღრმავების პერსპექტივაზე. ძალიან მნიშვნელოვანი იყო, რომ ჩვენ დღეს გავაფორმეთ სტრატეგიული პარტნიორობის შესახებ შეთანხმება საქართველოს პარლამენტსა და პოლონეთის პარლამენტს შორის. ამ დოკუმენტს ხელი მოაწერა პოლონეთის პარლამენტის ორივე პალატის სპიკერმა“,- განაცხადა პარლამენტის თავმჯდომარემ.
მისივე თქმით, გამართულ შეხვედრებზე ეკონომიკური თანამშრომლობის პერსპექტივები განიხილეს. ბიზნეს-ფორუმის ორგანიზების შესახებ პოლონეთის რესპუბლიკის პრემიერ-მინისტრის ინიციატივაზე საუბრისას ირაკლი კობახიძემ აღნიშნა, რომ ეს იქნება კარგი პლატფორმა დამატებითი პროგრესისთვის. მისივე თქმით, საპარლამენტო თანამშრომლობას ახალ დონეზე გადაიყვანს ქართულ-პოლონური საპარლამენტო ასამბლეის შექმნა.
„პოლონეთის პრემიერ-მინისტრმა თავად დასვა ბიზნეს-ფორუმის ორგანიზების საკითხი, რაც იქნება ძალიან კარგი პლატფორმა იმისთვის, რომ გვქონდეს დამატებითი პროგრესი ეკონომიკური ურთიერთობების კუთხით და ამ კუთხით ძალიან აქტიურად ვიმუშავებთ. ასევე, ვისაუბრეთ ერთობლივი ასამბლეის შექმნაზე. ასეთი თანამშრომლობის შექმნის გამოცდილება აქვს პოლონეთს რამდენიმე ქვეყანასთან, მათ შორის, მოლდოვასთან, ლიტვასთან და ჩვენ მოხარული ვართ, რომ ასეთი ინიციატივა განხორციელდება საქართველოსთან მიმართებით, რაც ახალ დონეზე, სტრატეგიულ დონეზე გადაიყვანს ჩვენი პარლამენტების თანამშრომლობას“,- განაცხადა საქართველოს პარლამენტის თავმჯდომარემ.
0