ილია ელოშვილი საქართველოს ენერგეტიკისა და წყალმომარაგების მარეგულირებელი ეროვნული კომისიის მიერ ორგანიზებულ კონფერენციას „ნეტო აღრიცხვის რეგულირება საქართველოში“ დაესწრო

ენერგეტიკის მინისტრი ილია ელოშვილი საქართველოს ენერგეტიკისა და წყალმომარაგების მარეგულირებელი ეროვნული კომისიის მიერ ორგანიზებულ კონფერენციას „ნეტო აღრიცხვის რეგულირება საქართველოში“ დაესწრო. საქართველოს მთავრობის ინიციატივით, „ელექტროენერგეტიკისა და ბუნებრივი გაზის შესახებ“ საქართველოს კანონში მიმდინარე წელს განხორციელებული ცვლილებების შესაბამისად, განისაზღვრა მიკროსიმძლავრის ელექტროსადგური (ე.წ. ნეტო აღრიცხვა), როგორც საცალო მომხმარებლის მფლობელობაში არსებული განახლებადი ენერგიის წყარო, რომელიც მიერთებულია ელექტროენერგიის გამანაწილებელ ქსელთან და მისი დადგმული სიმძლავრე არ აღემატება 100 კილოვატს.
აღნიშნული ცვლილებით, საცალო მომხმარებელს მიეცა შესაძლებლობა, დაამონტაჟოს მიკროსიმძლავრის ელექტროსადგური, აწარმოოს ელექტროენერგია საკუთარი მოხმარებისთვის, ამავდროულად პარალელურ რეჟიმში ჩაერთოს ელექტროსისტემაში და გამანაწილებელ კომპანიას მიაწოდოს ჭარბად გამომუშავებული ელექტროენერგია, ხოლო იმ შემთხვევაში, თუ გამომუშავებული ელექტროენერგია ვერ დააკმაყოფილებს მის მოხმარებას, გამანაწილებელი კომპანიის ქსელიდან მიიღოს შესაბამისი რაოდენობის ელექტროენერგია.
საქართველოს ენერგეტიკისა და წყალმომარაგების მარეგულირებელი ეროვნული კომისიის ნორმატიულ აქტში „ელექტროენერგიის (სიმძლავრის) მიწოდებისა და მოხმარების წესებში” განხორციელებული ცვლილებებით უზრუნველყოფილია მიკროსიმძლავრის ელექტროსადგურის მფლობელის ელექტრომომარაგების სტაბილურობა ძვირადღირებული აკუმულატორებისა და სხვა დანადგარების გამოყენების გარეშე.
მიკროსიმძლავრის ელექტროსადგურის დადგმული სიმძლავრე არ უნდა აღემატებოდეს მომხმარებლის გამანაწილებელ ქსელთან მისაერთებელ სიმძლავრეს.
ელექტროენერგიის გამანაწილებელ ქსელთან მიკროსიმძლავრის ელექტროსადგურის მიერთების პროცედურები
საცალო მომხმარებელმა, რომელსაც სურს მის მფლობელობაში არსებული მიკროსიმძლავრის ელექტროსადგურის გამანაწილებელ ქსელთან მიერთება, უნდა მიმართოს ელექტროენერგიის გამანაწილებელ კომპანიას და შეავსოს განაცხადი.
„ელექტროენერგიის (სიმძლავრის) მიწოდებისა და მოხმარების წესებით“ განსაზღვრულია მიკროსიმძლავრის ელექტროსადგურის გამანაწილებელ ქსელთან მიერთების ვადები და მიერთების საფასური, მიერთების ძაბვის საფეხურისა და მისაერთებელი სიმძლავრის შესაბამისად. ამასთან, დადგენილია მომსახურების სტანდარტი, რომელიც ითვალისწინებს “ერთი სარკმლის” პრინციპს და გულისხმობს ელექტროენერგიის გამანაწილებელი კომპანიის ვალდებულებას, გაუწიოს მომხმარებელს მომსახურება სრული ციკლით და ხელი შეუწყოს მიკრო სიმძლავრის ელექტროსადგურის გამანაწილებელ ქსელთან მიერთებას.
ანგარიშსწორება ნეტო აღრიცხვის დროს
თუ თვეში მიკროსიმძლავრის ელექტროსადგურის მიერ წარმოებული და გამანაწილებელი კომპანიის ქსელისათვის მიწოდებული ელექტროენერგიის რაოდენობა მეტია მომხმარებლის მიერ გამანაწილებელი ქსელიდან მიღებული ელექტროენერგიის რაოდენობაზე, სხვაობა (ქსელში მიწოდებული ჭარბი ელექტროენერგია) აისახება მომდევნო თვის ანგარიშსწორების ქვითარში კრედიტის სახით.
თუ თვეში მიკროსიმძლავრის ელექტროსადგურის მიერ წარმოებული და გამანაწილებელი კომპანიის ქსელისათვის მიწოდებული ელექტროენერგიის რაოდენობა ნაკლებია გამანაწილებელი ქსელიდან მიღებული ელექტროენერგიის რაოდენობაზე, მომხმარებელი კომპანიასთან ანგარიშსწორებას ახდენს მხოლოდ სხვაობის შედეგად მიღებული ელექტროენერგიის რაოდენობაზე.
საანგარიშო წლის ბოლო თვეს, ანგარიშსწორების ქვითარში კრედიტის სახით ასახული ელექტროენერგია ჩაითვლება გამანაწილებელი კომპანიის მიერ შესყიდულად. შესაბამისად, კომპანია ვალდებულია მიკროსიმძლავრის ელექტროსადგურის მფლობელს გადაუხადოს კრედიტის სახით ასახული ელექტროენერგიის საფასური, სამომხმარებლო ტარიფში კომისიის მიერ გათვალისწინებული, შესყიდული ელექტროენერგიის საშუალო შეწონილი ფასით.