საქართველოს საგარეო საქმეთა მინისტრის მოადგილე ვახტანგ მახარობლიშვილი გერმანიის ბუნდესტაგის წევრს, ქრისტიან-დემოკრატიული კავშირის/ქრისტიან-სოციალური კავშირის საპარლამენტო ფრაქციის თავმჯდომარის მოადგილეს, დოქტ. ფრანც იოზეფ იუნგს შეხვდა.
შეხვედრაზე ყურადღება დაეთმო საქართველოსა და გერმანიის ფედერაციულ რესპუბლიკას შორის ურთიერთობებში გამოკვეთილ მზარდ დინამიკას, ევროპული და ევროატლანტიკური ინტეგრაციის პროცესსა და მიმდინარე პრიორიტეტებს, ოკუპირებული ტერიტორიების პრობლემატიკას და ასევე, რეგიონალურ საკითხებს.
ვახტანგ მახარობლიშვილმა მადლობა გადაუხადა გერმანელ პარლამენტარს გერმანიის ფედერალური მთავრობისა და პარლამენტის მიერ საქართველოს ევროპული და ევროატლანტიკური ინტეგრაციის, სუვერენიტეტისა და ტერიტორიული მთლიანობის თანმიმდევრული მხარდაჭერისათვის. მინისტრის მოადგილის შეფასებით, ბუნდესტაგის მიერ 2017 წლის 27 ივნისს მიღებული რეზოლუცია აღმოსავლეთ პარტნიორობის პროგრამისა და მასში მონაწილე ქვეყნების შესახებ, საქართველოს წინაშე და ზოგადად რეგიონში არსებული გამოწვევების ფონზე, გერმანიის მხრიდან მხარდაჭერის მკაფიო და უმნიშვნელოვანეს გამოხატულებას წარმოადგენს.
0