ეუთოს საპარლამენტო ასამბლეის რეზოლუციის პროექტში ასახული შესწორებები კარგია – ახლა მთავარია ქართულმა დიპლომატიამ, ქართულმა მხარემ კიდევ უფრო აქტიურად იმუშაოს, – აღნიშნული განცხადება ეუთოს საპარლამენტო ასამბლეის პოლიტიკისა და უსაფრთხოების საერთო კომიტეტის სხდომის დასრულების შემდეგ, ქართული დელეგაციის წარმომადგენელმა თედო ჯაფარიძემ გააკეთა.
“ეუთოს რეზოლუციის პროექტი საკმაოდ რთული დოკუმენტია. გაიმართა მწვავე დებატები, თუმცა ჩვენი დელეგაციის შესწორებები გავიდა. ერთადერთი ქვეყანა, რომელიც მის მხარდაჭერას ეწინააღმდებოდა, რუსეთი იყო. თუმცა ჩვენს ერთ შესწორებას რუსეთმა მხარი დაუჭირა, რომელიც აფხაზეთში ჰუმანიტარული ტვირთის შეტანას ეხება. ეუთოს საპარლამენტო ასამბლეის რეზოლუციის პროექტში ასახული შესწორებები კარგია – ახლა მთავარია ქართულმა დიპლომატიამ, ქართულმა მხარემ კიდევ უფრო აქტიურად იმუშაოს. ასეთი მაღალი დონის დოკუმენტები მიღებულია, სამოქმედო გეგმა ჩვენ უკვე ხელთ გვაქვს“, – განუცხადა ჯაფარიძემ.
ეუთოს საპარლამენტო ასამბლეის პოლიტიკისა და უსაფრთხოების საერთო კომიტეტის სხდომაზე, ეუთოს რეზოლუციის პროექტში საქართველოს საპარლამენტო დელეგაციის მიერ შეთავაზებულ ცვლილებებს მხარი დაუჭირეს. 87-პუნქტიან რეზოლუციის პროექტში საქართველოს მხარემ 4 ცვლილება წარმოადგინა, რომლითაც საპარლამენტო ასამბლეა რუსეთის ფედერაციას დაბეჯითებით მოუწოდებს, სრულად შეასრულოს 2008 წლის 12 აგვისტოს ხელმოწერილი ექვსპუნქტიანი შეთანხმება; საპარლამენტო ასამბლეა რუსეთის ფედერაციას მოუწოდებს, უზრუნველყოს ჰუმანიტარული ტვირთის თავისუფლად გადაადგილების ხელშეწყობა აფხაზეთსა და ცხინვალის რეგიონში; ხაზს უსვამს საქართველოს კონფლიქტების მშვიდობიანად მოგვარების პროცესში ეუთოს როლის გაძლიერებას, მათ შორის ჟენევის საერთაშორისო დისკუსიის ფორმატში; სთავაზობს მონაწილე სახელმწიფოებს გაააქტიურონ საერთაშორისო დიალოგის მექანიზმები საერთაშორისო უსაფრთხოებისა და სტაბილურობისთვის აფხაზეთში და ცხინვალის რეგიონში. რეზოლუციის პროექტის განხილვა დებატების ფორმატში წარიმართა და პროექტის თითოეული პუნქტის მომხრე და საწინააღმდეგო განცხადებები გაკეთდა. აღსანიშნავია, რომ რუსეთის ფედერაციის დელეგაციის მიერ მომზადებული ცვლილებები, რომელთა შინაარსიც უკრაინასა და ყირიმში განხორციელებულ მოვლენებს შეეხებოდა, კომიტეტის წევრთა უმრავლესობამ არ გაიზიარა. კომიტეტის მორიგი სხდომა ხვალ 09.00 საათზე გაიმართება. ხვალინდელ სხდომაზე ქართული მხარის მიერ მომზადებული – “კონფლიქტი საქართველოში“ განხილვა იგეგმება, რომელსაც ქართული დელეგაციის ხელმძღვანელი პარლამენტის თავმჯდომარე დავით უსუფაშვილი წარადგენს.
0